Liafuan Di'ak (São Marcos)

MARCOS

 1

Joao Baptista

            ¹Hahu liafuan diak nian kona ba Jesus Kristu, Maromak nia Oan Mane: ²nudar hakerek tiha iha livru profeta Isaias nian: “Ha’u haruka Ha’u nia anju la’o iha O nia oin, atu hadia dalan ba O.  ³Lia ida nebe hakilar iha rai fuik  maran, ‘Hadia dalan ba Na’i, halos dalan kiik sira ba Nia.’” ⁴Nune'e Joao Baptista mosu iha rai fuik maran, hodi haklaken baptismu ida penitensia nian atu kasu sala. ⁵Ema rai Judeia tomak, ema Jerusalem hotu ba hasouru nia, no wainhira sira konfesa tiha sira nia sala, sira simu baptismu housi nia iha mota Jordaun. ⁶Joao hatais kuda kamelu nia fulun ho futukabun kulit nian no han lalaek no baniben fuik. ⁷Nia haklaken hodi dehan: “Tuir Ha’u sei to'o mai ida nebe maka'as liu ha’u.  Ha’u la soi atu hakru'uk hodi kore Nia sandalias tali. ⁸Ha’u sarani imi ho be, maibe Nia sei sarani imi ho Espiritu Santu.”

Jesus nia baptismu. Diabu babeur Nia

            ⁹Iha loron hirak ne'e duni mak Jesus mai housi Nazare Galileia nian, hodi simu baptismu housi Joao iha Jordaun. ¹⁰Wainhira Nia sai housi be, ema hare  kedas lalehan nakloke; no Espiritu, hanesan manu falur ida, tun ba Nia leten. ¹¹Housi lalehan lia ida dehan: “O Ha’u nia Oan doben. Ha’u haksolok teb-tebes iha O.” ¹²Ne'e hotu tiha Espiritu Santu lori kedas Nia ba rai fuik maran.¹³Nia hela iha rai fuik maran loron haat nulu, Satanas babeur Nia. Nia hela ho balada fuik sira, no anju sira serbi Nia. 

Jesus bolu ema peskador sira

            ¹⁴Wainhira ema dadur ona Joao, Jesus ba Galileia hodi haklaken Maromak nia liafuan diak hodi dehan: ¹⁵“Tempu to'o ona; Maromak nia reinu besik ona. Hakribi imi nia sala hodi fiar liafuan diak.”  ¹⁶Liu housi tasi ibun Galileia nian, Nia hare Simao ho Simao nia alin Andre soe sira nia dai ba tasi, basa sira peskador. ¹⁷Jesus dehan ba sira, “Tuir Ha’u mai; Ha’u sei halo imi peskador ema nian.” ¹⁸Sira husik kedas dai hodi tuir Nia. ¹⁹Liu tan uitoan ba oin, Nia hare Tiago, Zebedeu nia oan, ho nia  alin Joao iha sira nia  ro laran, hadia hela dai.  ²⁰Nia bolu sira kedas. Sira husik  sira nia aman Zebedeu iha ro laran ho nia emar sira hodi tuir Jesus.

Ema ida ho espiritu foer

            ²¹Sira ba to'o Kafarnaum. Wainhira loron Sabadu to'o, Nia tama iha sinagoga hodi hanorin. ²²Ema sira hakfodak ho Nia hanorin, basa Nia hanorin hanesan ema nebe iha kbiit, la'os hanesan eskriba sira. ²³Teki-teki, mane ida ho diabu iha nia laran mosu iha sinagoga hodi hakilar dehan: ²⁴“Iha buat sa iha ami no O nia le’et, Jesus Nazare? O mai atu halakon ami? Ha’u hatene O se los: O Maromak nia  santu!” ²⁵Maibe Jesus lia tun ba nia hodi dehan: “Nonok no sai housi nia!” ²⁶Espiritu foer ne’e doko maka'as ema ne'e hodi hakilar, hafoin sai housi nia. ²⁷Ema sira hakfodak teb-tebes. Nune'e, sira husu ba malu dehan: “Sa mak ne'e? Hanorin foun ida ho kbiit! Nia haruka espiritu foer sira no sira halo tuir Nia.” ²⁸Nia naran sai boot iha fatin hotu iha Galileia tomak.

Jesus fo isin diak ba ema barak

             ²⁹Sai tiha housi sinagoga ho Tiago no Joao, sira ba Simao no Andre nia uma. ³⁰Simao nia banin feto moras isin manas, toba hela. Sira fo hatene kedas ba Jesus kona ba nia. ³¹Jesus hakbesik nia, kaer nia liman hodi halo nia hamriik. Isin manas lakon kedas no nia hahu serbi sira. ³²Iha loraik, loron monu tiha, ema lori ba Nia ema moras sira hotu no sira nebe iha diabu iha laran. ³³Sidade tomak mai halibur an hamutuk iha odamatan. ³⁴Nia fo isin diak ba ema barak nebe terus moras oi-oin, hodi duni sai diabu barak. Maibe Nia la husik diabu sira koalia, basa sira hatene Nia.

Jesus hanorin iha Galileia

            ³⁵Dadersan nakukun, Nia hamriik, sai ba fatin fuik ida hodi harohan. ³⁶Simao ho nia maluk sira buka tuir Nia. ³⁷Hetan tiha Nia, sira dehan: “Ema hotu buka Ita.” ³⁸Nia hatan ba sira, “Ita ba fatin seluk, iha knua sira besik atu Ha’u haklaken mos iha neba, basa tan ne’e mak Ha’u mai.” ³⁹Nia ba haklaken iha sinagoga sira Galileia tomak nian hodi duni sai diabu sira.

Jesus fo isin diak ba ema moras lepra ida

            ⁴⁰Ema moras lepra ida mai hakbesik Nia, hakneak iha rai hodi husu Nia, “Ita hakarak karik, Ita bele hamos ha’u.” ⁴¹Jesus hanoin nia, lolo nia liman hodi kona nia dehan: “Ha’u hakarak; sai mos ba!” ⁴²Iha oras ne'e kedas, moras lepra lakon no nia isin mos ona. ⁴³Jesus haruka nia ba, hodi dehan ho oin maka'as,  ⁴⁴“Keta fo hatene ba ema ida, maibe la'o ba, hatudu o nia an ba amlulik hodi hasa'e buat nebe Moises haruka atu fo hatene katak o hetan ona isin diak.”  ⁴⁵Maibe ema ne'e sai hodi fo hatene kedas buat ne'e iha fatin hotu; nune'e Jesus la bele hatudu Nia An ona iha sidade sira. Nia la'o deit iha liur, iha rai fuik. Maibe housi fatin hotu ema mai buka Nia. 

2

Jesus fo isin diak ba ema isin mate ida

            ¹Liu loron ruma, Jesus fila fali housi Kafarnaum. Ema rona katak Nia iha uma ona. ²Ema barak tebes halibur hamutuk, atu nune'e sai resin iha odamatan. Nia haklaken liafuan diak ba sira. ³Sira hakarak hatudu ba Nia ema moras isin mate ida nebe ema na'in haat mak lori. ⁴Tan ema barak iha neba, sira la bele lori ba to'o Nia. Tan ne'e sira loke uma nia kakuluk iha los fatin nebe Nia hela nia leten. Halo tiha kuak ida, sira hatun  ema ne'e iha nia toba fatin. ⁵Tan hare ema sira nia fiar, Jesus dehan ba ema moras ne'e, “Ha’u oan, o nia sala sira hetan ona perdua.” ⁶Eskriba balun tur iha neba. Sira hanoin iha sira nia laran. ⁷“Tan sa Nia koalia hanesan ne'e? Nia hateten  aat Maromak! Ema se mak bele perdua sala? Maromak deit mak bele!” ⁸Maibe Jesus hatene ona buat nebe sira hanoin iha sira nia laran, tan ne'e Nia husu ba sira, “Tan sa imi hanoin hanesan ne'e iha imi nia laran? ⁹Ida nebe mak lalais liu, dehan ba ema moras ne'e, ‘O simu ona perdua ba o nia sala,’ eh dehan ‘O hamriik, kaer o nia hadak no la'o ba?’ ¹⁰Diak, atu imi hatene katak Oan Mane iha kbiit iha rai ne'e atu fo perdua ba sala, ¹¹‘Ha’u haruka o,’ Nia dehan ba moras isin mate, ‘Hamriik ba, foti o nia hadak no la'o ba uma.’” ¹²Ema ne'e hamriik, foti kedas nia hadak hodi la'o iha ema hotu nia oin. Ema hotu hakfodak hodi hahi Maromak dehan: “Ami la dauk hare buat ida hanesan ne'e.”

Jesus bolu Levi

            ¹³Jesus sai fali ba tasi ibun. Ema barak ba hasouru nia. Nia hanorin sira. ¹⁴Tuir dalan, Nia hare Levi, Alfeu nia oan, tur iha nia fatin hodi kobra osan. Jesus dehan ba nia, “Mai, tuir Ha’u.” Nia hamriik hodi tuir Jesus. ¹⁵Wainhira Jesus han iha nia uma, publikanu balun no ema maksalak sira tur hamutuk ho Jesus ho nia eskolante sira, basa barak housi sira le’et tuir Nia. ¹⁶Eskriba sira housi fariseu sira nia sorin hare katak Nia han hamutuk ho ema maksalak ho publikanu sira. Sira dehan ba Nia eskolante sira, “Tansa Nia han hamutuk ho publikanu no ema maksalak sira?” ¹⁷Jesus, rona hotu ne'e, hatan ba sira, “La'os ema isin diak mak presisa doutor, maibe sira nebe moras. Ha’u la mai  atu bolu ema diak, maibe ema maksalak sira.”                   

Kona ba hadera an

            ¹⁸Loron ida, wainhira  Joao nia eskolante sira no fariseu sira hadera an dau-daun, sira mai dehan ba Jesus, “Tansa Joao no fariseu sira nia eskolante hadera an, O nia eskolante fali lae?” ¹⁹Jesus hatan ba sira, “Noivu nia belun sira bele hadera an wainhira noivu sei hela hamutuk ho sira? Wainhira nia sei hela hamutuk ho sira, sira la bele hadera an. ²⁰Maibe loron sei to'o mai wainhira ema sei hasai tiha noivu housi sira. Iha loron ne'e mak sira sei hadera an.”  ²¹“Ema ida la taka kuak iha hena tuan ho hena foun. Nia halo karik, hena foun sei hales hena tuan, no kuak sei sai boot liu. ²²Ema ida la fui tua foun iha fatin tuan. Nia halo karik, tua sei halo kulit nakles no tua sei nakfakar. Ema tau tua foun iha fatin foun.”

Kona ba Sabadu

            ²³Loron Sabadu ida, Jesus, la'o iha to'os batar nian nia laran. Tuir dalan, Nia eskolante sira han batar musan. ²⁴Fariseu sira dehan ba Nia: “Hare ba, tansa sira halo buat nebe la bele halo iha loron Sabadu?” ²⁵Nia hatan, “Imi la le’e buat nebe David halo wainhira nia iha susar laran no hamlaha; nia ho nia emar sira? ²⁶Oin sa nia tama iha Maromak nia uma, iha tempu amlulik boot Abiatar nian, hodi han paun nebe hasa'e tiha ona ba Maromak,  paun nebe  amlulik sira deit mak bele han? No mos nia fo paun ne'e ba sira nebe hela ho nia?” ²⁷Nia dehan tan ba sira, “Maromak halo Sabadu ba ema nia diak, la'os ema ba Sabadu nian: ²⁸tan ne'e, Oan Mane mak loron Sabadu mos nia Na'in.”

3

Ema ho liman aat

            ¹Jesus tama fali sinagoga ida. Iha neba iha ema nebe liman aat. ²Sira hateke ba Nia atu hare keta Nia fo isin diak ba nia iha loron Sabadu, hodi hein atu foti lia ruma hasouru Nia . ³Nia dehan ba ema ho liman aat: “Hamriik mai iha klaran!”  ⁴Tuir mai, Nia husu sira: “Iha loron Sabadu, bele halo diak eh halo aat, soi ema nia moris eh oho nia?” Maibe sira  nonok deit.  ⁵Hateke ba ema hotu nebe hale’u Nia, no laran nakali tebes hodi laran susar tan sira  nia laran tos, Nia dehan ba ema ne'e, “Lolo o nia liman.” Nia lolo duni nia liman, no nia liman diak kedas.  ⁶Fariseu sira sai ba liur hodi la'o hamutuk ho Herodes nia emar sira hodi buka oin sa sira bele oho Nia.

Jesus iha tasi ibun

            ⁷Jesus la’o ba tasi ibun Galileia nian ho Nia eskolante sira. Ema lubun boot housi Galileia la'o tuir Nia.  ⁸Housi Judeia, housi Jerusalem, housi Jordaun nia sorin no housi rai Tiro no Sidonia nia sorin sira, ema lubun boot nebe  rona kona ba buat hotu nebe Nia halo mai buka Nia. ⁹Nia haruka Nia eskolante sira atu hadia ro ida ba Nia atu ema lubun boot ne'e la bele hanehan Nia, ¹⁰basa Nia fo isin diak ba ema barak, no sira hotu nebe moras buka atu hakbesik no kona Nia. ¹¹Espiritu foer sira nebe  hare Nia, monu iha Nia ain hodi hakilar ho lia maka'as, “Ita Maromak nia Oan!” ¹²Maibe Nia si’ak sira maka’as atu la bele fo hatene Nia se.

Jesus fihir Nia emar sanulu resin rua

            ¹³Jesus sa'e ba foho no bolu  sira nebe Nia hakarak, no sira la'o ho Nia. ¹⁴Nia fihir ema na'in sanulu resin  rua atu la'o hamutuk ho Nia no haruka sira atu haklaken ¹⁵hodi hetan kbiit atu duni sai diabu sira. ¹⁶Nia hili sira sanulu resin rua ne'e: Simao, nebe Nia hanaran Pedro: ¹⁷Tiago, Zebedeu nia oan, no Joao, Tiago nia alin. Sira ne'e Nia hanaran Boanerges, katak rai tarutu nia oan: ¹⁸Andre, Filipe, Bartolomeu, Mateus, Tome, Tiago, Alfeu nia oan, Simao  Kananeo ¹⁹no Judas Iscariotes, nebe sei saran Nia.

Jesus no diabu sira nia na’i ulun

            ²⁰Jesus tama ba uma ida, no dala ida tan, ema lubun boot buka Nia.  Tan ne'e Nia la bele han.  ²¹Wainhira Nia parenti sira rona kona ba ida ne'e, sira sai atu kaer Nia, basa sira dehan katak Nia bulak ona. ²²Eskriba sira nebe mai housi Jerusalem  dehan: “Nia iha diabu,” no “Nia  duni sai diabu sira hodi diabu sira nia ulun nia naran.” ²³Ne’e duni Jesus bolu sira hodi haktuir aiknanoik ida ba sira dehan: “Oin sa mak diabu bele duni sai diabu? ²⁴Reinu ida fahe an karik, reinu ne'e la bele tahan. ²⁵Umakain ida la iha unidade karik, umakain ne'e la bele hela kleur; ²⁶nune’e mos Satanas hamriik hasouru nia an karik, nia fahe  an ona;  nia la bele tahan; nia rohan to'o ona ²⁷Ema ida la bele tama iha ema maka'as nia uma hodi na’ok nia rikusoi molok nia, uluk knanain, kaer ema maka'as ne'e. Foin mak nia bele na’ok rikusoi sira.”

            ²⁸“Tebes Ha’u ba imi: ema sira nia sala no sira nia lia aat hasouru Maromak sei hetan perdua, ²⁹maibe ema nebe hateten aat Espiritu Santu sei la hetan perdua ba nafatin. Nia halo sala rohan laek nian.”  ³⁰Ne'e tamba sira dehan: “Nia iha diabu.”

Jesus Nia inan no maun alin

            ³¹Nia inan no maun alin sira to'o iha neba. Sira hamriik iha liur hodi hameno lia atu bolu Nia. ³²Ema barak tur haleu Nia no sira dehan ba Nia, “O nia inan no maun alin sira hela iha liur buka O.” ³³Nia hatan ba sira: “Se mak Ha’u nia inan no maun alin sira?” ³⁴Hodi hateke ba sira nebe tur hale’u Nia, Nia dehan: “Sira ne'e mak Ha’u nia inan no maun alin sira. ³⁵Basa ema nebe halo tuir Maromak nia hakarak, ema ne'e mak Ha’u nia maun alin, bin feton no inan.”

4

Aiknanoik kona ba fini

            ¹Dala ida tan, Nia hahu hanorin iha tasi ibun.  Ema lubun boot liu mai atu rona Nia. Tan ne'e Nia tur iha ro ida  iha tasi laran. Ema sira hela iha tasi ibun, iha rai maran. ²Nia hanorin sira buat barak ho aiknanoik. Nia hanorin dehan  ³“Rona ba. Ema ida ba kari fini. ⁴Nia kari fini dau-daun, fini balun monu iha dalan. Manu sira mai hodi  han sira hotu. ⁵Balun monu iha fatuk leten. Iha neba rai uitoan deit. Fini sira ne'e moris lalais, basa rai la klean, ⁶maibe wainhira loron sa'e hamanas sira, sira namlaek, basa sira abut la iha. ⁷Fini balun monu iha aitarak laran. Aitarak moris maka'as hodi hanehan sira. Fini sira ne'e la fo fuan ida. ⁸Fini balun monu iha rai diak, hodi moris buras no fo fulin maka’as, balun dala tolu nulu, balun neen nulu, no balun dala atus ida.” ⁹Nia dehan tan, “Ema nebe iha tilun atu rona, rona ba!”

                        ¹⁰Wainhira Nia mesa-mesak ona, sira sanulu resin rua no mos sira seluk nebe tuir Nia husu aiknanoik ne'e katak sa. ¹¹Nia hatan ba sira: “Maromak  fo sai tiha ona ba imi misteriu Ninia reinu nian, maibe ba sira nebe hela iha liur, buat hotu mai deit housi aiknanoik sira,¹²atu sira hare fila fila maibe la hare mos; sira rona fila fila maibe la hatene los, keta sira fila ba diak karik no hetan perdua.

Jesus fo hatene sai aiknanoik  fini nian katak sa

            ¹³Hafoin Nia dehan ba sira, “Imi la komprende aiknanoik ida ne'e? Oin sa imi bele komprende aiknanoik sira hotu? ¹⁴Fini nebe ema kari mak liafuan. ¹⁵Sira nebe iha dalan iha nebe ema kari fini, rona tiha liafuan, Satanas mai kedas hodi hasai housi sira liafuan nebe foin kari. ¹⁶Nune'e mos, fini sira nebe kari iha fatuk leten mak sira nebe, wainhira sira foin rona liafuan, simu nia ho ksolok; ¹⁷maibe sira nia abut la iha. Sira la tahan. Susar ruma mosu karik, eh terus ruma tamba liafuan mai hasouru karik, sira monu lalais. ¹⁸Hafoin fini sira seluk nebe kari iha aitarak laran, sira ne'e rona tiha liafuan, ¹⁹maibe hanoin mundu ne'e nian no mos babeur housi  rikusoi no babeur sira seluk hanehan liafuan ne'e. Nune'e nia la fo fuan ida. ²⁰Sira nebe kari iha rai diak, sira rona liafuan  hodi simu nia no fo fuan barak; balun dala tolu nulu, balun dala neen nulu eh dala atus ida.”

Ahi oan iha balde okos

            ²¹Nia dehan tan ba sira, “Imi sunu lakan ahi oan ida hodi tau nia iha balde okos eh iha tobafatin okos?  Imi la tau nia iha ahi oan fatin? ²²La iha buat ida nebe subar nebe ema sei la fo sai; la iha buat ida nebe haksumik nebe ema sei la fo hatene. ²³Ema nebe iha tilun atu rona, rona ba.”

             ²⁴Nia dehan mos ba sira, “Rona di-diak buat nebe imi rona dau-daun. Sasukat nebe imi usa sei usa mos ba imi, no barak liu tan, ²⁵basa ba ema nebe iha ona sei fo tan; no ema nebe la iha, buat nebe nia iha sei hasai tan housi nia.”

Aiknanoik musan nia

            ²⁶Nia dehan mos, “Maromak nia reinu hanesan ne'e: Ema kuda musan iha rai. ²⁷Kalan loron, nia toba ka hader, musan ne'e moris no sai boot; oin sa los, nia la hatene. ²⁸Housi nia kbiit rasik, rai lori nia atu fo fuan: uluk dikin, hafoin fulin, no ikus mai trigu nebe tasak ona.²⁹Wainhira trigu tasak ona, ema ne'e kaer tudik, basa tempu atu ko'a trigu to'o ona mai.”

Aiknanoik mustarda musan nian

            ³⁰Nia dehan tan; “Ita sei usa ilas ida nebe atu hatudu Maromak nia reinu? Ho aiknanoik sa mak ita sei hatudu nia? ³¹Nia hanesan mustarda musan ida nebe wainhira ema kari iha rai mak kiik liu musan sira hotu iha  raiklaran, ³²maibe kuda tiha, nia moris no sai boot liu hodi hatubun sanak bo-boot atu nune'e manu sira iha lalehan bele subar an iha nia mahon.”

            ³³Ho aiknanoik barak hanesan ne'e, Nia haklaken ba sira tuir buat nebe sira bele komprende. ³⁴Ba sira, Nia koalia ho aiknanoik deit, maibe ba eskolante sira, wainhira sira mesa-mesak deit, Nia fo hatene mo-mos buat hotu.

Jesus halo tasi hakmatek                   

            ³⁵Iha loron ne'e rasik, wainhira loraik ona, Nia dehan ba sira, “Ita hakur tiha ba tasi sorin balun ba.”  ³⁶Sira husik ema lubun boot hodi lori deit Nia iha ro laran. Ro seluk mos ba hamutuk ho Nia. ³⁷Tuir mai, anin hahu sai boot. Laloran baku maka'as ro, halo be tama iha ro laran, besik atu nakonu. ³⁸Nia iha ro ikun, toba hela ho Nia ulun iha somasu leten. ³⁹Sira fanu Nia hodi dehan: “Mestre, la halo buat ida ba Ita katak ita atu mate ona?” Nia hamriik. Nia hateten ba anin no dehan ba tasi, “Hakmatek ba!” Anin nonok kedas; buat tomak hakmatek. ⁴⁰Hafoin Nia lia tun ba sira, “Tan sa imi tauk hanesan ne'e? Imi seidauk fiar?”  ⁴¹Sira tauk teb-tebes hodi dehan ba malu, “Ema ne'e se los? Anin no tasi mos halo tuir Nia!”

5

Jesus fo isin diak ba ema nebe iha espiritu foer

            ¹Sira to'o rai Gerasa iha tasi nia sorin balun. ²Wainhira Nia tun housi ro, ema ida ho espiritu foer sai housi rate sira le’et hodi ba hasouru Nia. ³Ema ne'e horik iha rate sira laran. La iha ema nebe bele tahan nia ho korente, ⁴basa ema kesi tiha ona nia dala barak ho korente no kadeiadu, maibe nia halo kotu korente no halo aat kadeiadu sira. La iha ema nebe maka'as atu tahan nia. ⁵Kalan loron, iha rate no mos iha foho leten, nia hakilar hodi baku nia an ho fatuk. ⁶Wainhira nia hare Jesus housi dook, nia halai hasouru Nia hodi monu ain ba Nia, ⁷no hakilar ho lia maka'as, “Iha sa ida ho ha’u no Ita, Jesus, Maromak aas liu nia Oan? Ha’u husu Ita hodi Maromak katak Ita sei la halo aat ha’u.” ⁸Basa Jesus hateten tiha ona ba nia, “Sai housi ema ne'e, espiritu foer!” ⁹Jesus husu, “O nia naran sa?” “Ha’u naran Lubun Boot,” nia hatan, “basa ami barak.” ¹⁰Nia husu ho laran manas atu la bele duni sai sira housi fatin neba. ¹¹Iha neba iha foho nia sorin, iha fahi barak nebe han dau-daun. ¹²Espiritu foer sira husu Nia: “Haruka ami tama iha fahi sira, husik ami ba sira.” ¹³Jesus husik sira, nune'e espiritu foer sai housi ema ne’e hodi tama iha fahi sira. Fahi sira nebe sura besik rihun rua halai housi foho ba tasi laran. Iha neba sira mout hotu.

            ¹⁴Sira nebe hein fahi halai hodi haktuir buat ne'e hotu iha sidade no iha toos iha neba. Ema sira mai atu hare buat nebe mosu. ¹⁵Sira hakbesik Jesus no hare ema nebe uluk espiritu foer sira hela, tur hela ho hatais. Nia isin diak no hanoin mos ona; nia nebe uluk iha espiritu foer barak iha nia laran. Sira hotu tauk. ¹⁶Sira nebe hare oin sa buat ne’e mosu kona ba ema ne'e no kona ba fahi sira haktuir ba sira. ¹⁷Tan ne'e, ema sira hahu husu Jesus atu husik ona fatin neba. ¹⁸Wainhira Nia atu sa'e ona ro ida, ema nebe uluk iha espiritu foer husu Nia atu husik nia la'o hamutuk ho Nia. ¹⁹Jesus la husik maibe dehan ba nia, “Ba ona uma, ba o nia familia, hodi haktuir ba sira buat nebe Na’i halo ona ba o no Nia hatudu laran luak ba o.” ²⁰Nune’e ema ne'e la'o ba hodi haklaken iha rai Dekapoli tomak buat hotu nebe Jesus halo ba nia. Ema hot-hotu hakfodak.

Jairo nia oan feto

            ²¹Wainhira Jesus hakur fali iha ro laran ba tasi nia sorin balun, ema lubun boot hakbesik hale’u Nia. Nia hamriik iha tasi ibun. ²²Na’i ulun sinagoga nian ida, naran Jairo,  to'o mai. Hare tiha Jesus, nia monu ain ²³hodi husu nune'e, “Ha’u oan feto besik atu mate. Hiit an mai ba,  tau liman ba nia atu soi nia, nune'e nia bele moris.” ²⁴Jesus la'o hamutuk  ho nia. Ema lubun boot tuir Nia. Ema ida-ida buka atu hakbesik Nia.

            ²⁵Iha neba iha feto ida nebe, ba tinan sanulu  resin rua ona mak fakar ran. ²⁶Nia terus teb-tebes iha doutor barak  sira liman hodi halakon nia rikusoi  tomak, maibe nia la hetan diak ida; hetok nia sai aat liu tan. ²⁷Nia rona kona ba Jesus. Nia mai housi kotuk iha ema lubun boot sira le’et hodi kona Jesus nia hena. ²⁸Nia dehan ba nia an rasik, “Ha’u kona deit karik nia hena, ha’u sei hetan isin diak.” ²⁹Iha oras ne'e kedas, ran la fakar tan. Nia isin lolon tomak hetan diak. ³⁰Jesus hatene kedas katak kbiit ruma sai housi Nia. Nia fila oin ba ema lubun boot hodi husu, “Ema se mak kona ha’u nia hena?” ³¹Eskolante sira dehan ba Nia , “Hare ba ema lubun boot nebe habit dau-daun Ita.  Ita sei husu, ‘Se mak kona Ha’u nia hena?’” ³²Maibe Nia hateke hale’u nafatin atu hare ema nebe halo buat ne'e. ³³Feto ne'e hakat ba oin, nakdedar no tauk, tan nia  hatene  buat nebe mosu ba nia.  Nia hakneak iha nia oin hodi dehan sai lialos hotu. ³⁴“Ha’u oan feto,” Jesus dehan: “o nia fiar mak soi o. La'o ba iha dame laran. O hetan diak housi o nia moras ba!”

            ³⁵Jesus sei koalia hela wainhira ema sira  housi na’i ulun sinagoga nian nia uma mosu mai hodi dehan: “Na’i, ita boot nia oan feto mate ona. Tansa ita boot  hakole tan Mestre?” ³⁶Maibe, rona tiha liafuan hirak ne'e, Jesus dehan ba sinagoga nia na’i ulun, “O keta tauk. Fiar deit  ba.” ³⁷Nia la husik ema ida tuir Nia. Nia lori deit Pedro, Tiago no Joao, Tiago nia alin. ³⁸ Sira to'o tiha na’i ulun sinagoga  nian nia uma,  Jesus hetan ema barak book an maka’as; hodi tanis,  no hakilar.  ³⁹ Nia tama hodi dehan ba sira, “Tansa imi book an maka'as hodi tanis? Labarik feto ne'e la mate; nia toba deit!” ⁴⁰Sira hasara Nia. Nia haruka sira sai hotu. Nia lori labarik nia aman no inan, ho tan sira nebe mai hamutuk ho Nia ba fatin nebe labarik hela. ⁴¹Nia kaer labarik nia liman hodi dehan ba nia, “Talitha, kum!” katak “Noy, hamriik ba.” ⁴²Labarik feto ne'e hamriik kedas hodi hahu la'o mai la'o ba, basa nia iha ona tinan sanulu resin rua. Ema hotu hakfodak no bilan teb-tebes. ⁴³Jesus lia tun ba sira hodi bandu atu ema la bele hatene buat ne'e. Hafoin Nia haruka sira atu fo han ba nia.

6

Ema hewai Jesus iha Nazare

            ¹Sai tiha housi fatin ne'e, Jesus fila fali ba nia rai. Nia eskolante sira tuir Nia.  ²To’o tiha  loron Sabadu, Nia tama iha sinagoga atu hanorin. Ema sira nebe rona Nia koalia hakfodak hodi dehan ba malu, “Nia simu buat hirak ne'e hotu housi los nebe? Sa matenek mak fo tiha ba Nia? Oin sa mak Nia bele halo milagre bo-boot hirak ne'e?  ³Nia la'os badaen ai nian, Maria nia oan; Tiago, Jose, Judas no Simao nia maun alin? Nia feton sira la horik iha ita le’et?”  ⁴Sira sai bilan kona ba Nia. ⁵Jesus lia tun ba sira dehan: “Iha deit nia rai, iha deit nia uma no parenti sira le’et mak profeta ida la hetan naran boot.” Tan ne'e, Nia la bele halo milagre iha neba; Nia fo isin diak ba ema moras balun deit hodi tau liman ba sira. ⁶Nia hakfodak tamba sira fiar laek liu. Nune'e Nia la'o tiha ba knua sira nebe besik hodi hanorin iha neba.

Sira sanulu resin rua

            ⁷Nia bolu sira sanulu resin rua hodi haruka sira na'in rua rua no haraik mos ba sira kbiit atu ukun espiritu foer sira. ⁸Nia haruka sira lori deit iha dalan aitonka ida; la bele lori bukae eh kohe, ka doit iha futukabun. ⁹Sira bele usa sandalias maibe la bele lori hatais tahan rua. ¹⁰Nia dehan ba sira, “Tama tiha iha uma ida, horik iha neba to'o imi fila. ¹¹Fatin ruma la simu eh la rona imi karik, sai tiha housi neba hodi liki rai rahun housi imi nia ain nudar sasin hasouru sira.” ¹²Sira sai ba dau-daun hodi hanorin atu hakribi sala. ¹³Sira duni sai diabu barak no kose  mina ba ema moras barak hodi halo sira hetan isin diak.

Liurai Herodes

            ¹⁴Liurai Herodes rona kona ba Jesus, basa iha tempu ne'e nia naran boot ona teb-tebes. ¹⁵Ema balun dehan katak Joao Baptista moris hi’as housi mate, tan ne'e Nia halo milagre sira. Ema balun mos dehan: “Nia Elias.” Ema seluk tan dehan: “Nia profeta ida hanesan profeta sira uluk nian.” ¹⁶Maibe, wainhira Herodes rona sira ne'e, nia dehan: “Joao Baptista nebe ha’u tesi tiha nia ulun moris hi’as housi mate; mak Nia!”

Herodes haruka Joao nia ulun

            ¹⁷Herodes rasik haruka kaer Joao Baptista, hodi hatama nia iha dadur laran tamba Herodiade, Herodes nia alin Filipe nia kaben nebe nia hola fali. ¹⁸Basa Joao dehan ba Herodes, “Tuir ukunfuan, o la bele hola fali o nia alin nia kaben!” ¹⁹Herodiade laran moras teb-tebes hasouru nia hodi hakarak oho nia, maibe nia la bele, ²⁰basa Herodes tauk Joao, nebe nia hatene nudar ema diak no santu ida. Herodes tau matan ba nia. Wainhira nia rona nia koalia, nia laran taridu barak, maibe nia haksolok atu rona nia.

            ²¹Tempu diak ida mosu mai wainhira Herodes halo tinan. Nia halo festa boot ida ba soldadu sira nia na’i ulun sira no mos ba ema boot sira rai Galileia nian. ²²Wainhira Herodiade nia oan feto mai dansa,  nia fo ksolok boot ba Herodes ho nia maluk sira nebe tur iha meja. Tan ne'e, liurai dehan ba feto ne'e, “Husu buat naran deit nebe o hakarak, Ha’u sei fo ba o.” ²³Nia dehan tan hodi jura, “Ha’u sei fo buat naran  deit  nebe o sei husu, maski ha’u nia reinu nia sorin balun ida.” ²⁴Feto ne'e sai hodi husu nia inan, “Ha’u sei husu sa los?” Nia hatan, “Joao Baptista nia ulun.” ²⁵Feto ne'e halai kedas ba liurai hodi hateten, “Ha’u hakarak katak ita boot fo mai ha’u, ohin kedas, Joao Baptista nia ulun iha bandeja ida.” ²⁶Liurai laran susar teb-tebes tan nia juramento  no mos tamba nia maluk sira, nia lakohi la halo tuir nia. ²⁷Nune’e, liurai haruka kedas soldadu ida atu  lori Joao nia ulun. Ema ne’e la’o ba hodi tesi Joao nia ulun iha dadur laran. ²⁸Tuir mai, nia lori fali ulun ne'e iha bandeja ida nia laran hodi fo nia ba feto. Feto ne'e fo fali nia ba nia inan.

            ²⁹Wainhira Joao nia eskolante sira rona kona ba buat hirak ne'e, sira mai hodi lori nia isin mate hodi hakoi iha rate.

Milagre uluk paun ninian

            ³⁰Apostolu sira fila halibur an ho Jesus, hodi haktuir ba Nia buat hotu nebe sira halo no hanorin.³¹Nia lia tun ba sira dehan: “Mai mesak ba fatin fuik ida atu tur halimar uitoan.” Basa ema barak tebes la'o mai la'o ba, sira la biban atu han. ³²Sira sa'e ro hodi hadook an ba fatin fuik ida. ³³Ema hare sira dada an, no ema barak hatene kedas. Nune'e, housi knua sira hotu, ema barak halai housi rai, no to'o uluk liu sira iha fatin neba. ³⁴Wainhira Jesus tun housi ro, Nia hetan ema lubun boot ida. Nia hanoin ema sira ne'e teb-tebes, basa sira hanesan bibi nebe bibi atan la iha. Nia hahu hanorin sira buat barak.

            ³⁵Wainhira kalan besik ona, Nia eskolante sira hakbesik Nia hodi dehan: “Fatin ne'e fuik, no mos kalan besik ona. ³⁶Ne’e duni, haruka sira ba atu sira bele la'o ba knua sira nebe besik hodi sosa buat ruma atu han.”  ³⁷Nia hatan hodi dehan ba sira, “Imi rasik fo han sira ba.” Sira simu, “Ami atu sosa paun osan atus rua nia folin ba sira ne'e?” ³⁸Nia husu sira, “Imi iha paun fuan hira? Ba, hare ba!” Sira ba, no wainhira hatene ona, sira dehan: “Paun fuan lima no ikan rua.” ³⁹Tuir mai, Nia haruka sira atu halo ema sira tur hamutuk iha grupu iha du’ut modok nia leten. ⁴⁰Sira tur, ema atus ida - atus ida eh lima nulu - lima nulu. ⁴¹Tuir mai, Nia kaer paun fuan lima no ikan rua, foti matan ba lalehan, fo bensa hodi silu no fo ba Nia eskolante sira atu fahe ba ema sira. Nune'e mos Nia fahe ikan ba ema hotu. ⁴²Ema hot-hotu han to'o bosu. ⁴³Sira halibur hamutuk paun no ikan nia resin, luhu sanulu resin rua nakonu. ⁴⁴Sira nebe han besik rihun lima.

Jesus la'o iha be leten

            ⁴⁵Ne’e hotu tiha, Nia haruka Nia eskolante sira atu sa'e ro hodi ba uluk Betsaida. Nia rasik haruka ema lubun boot ne'e ba ona uma. ⁴⁶Sira ba tiha ona, Nia sa'e ba foho tutun atu resa. ⁴⁷Wainhira kalan ona, ro dook ona iha tasi laran, Nia mesak hela iha rai. ⁴⁸Nia hare katak sira kbiit la to'o atu hean, basa anin hu’u hasouru sira. Besik rai hun mutin, Nia hakbesik sira hodi la'o iha tasi leten. Nia halo sira hanoin katak Nia atu liu deit, ⁴⁹maibe wainhira sira hare Nia la'o iha tasi leten, sira hanoin katak Nia mateklamar ida. ⁵⁰Sira hakilar maka'as, basa sira hotu hare Nia. Sira hotu tauk teb-tebes. Maibe Nia koalia kedas ba sira dehan: “Aten berani ba. Ha’u mak ne'e, keta tauk!” ⁵¹Tuir mai , Nia tama ba ro laran. Anin hakmatek ona. ⁵²Sira bilan deit, basa sira la komprende milagre paun nian katak sa. Sira nia hanoin sei nakukun hela.

Jesus fo isin diak ba moras sira

            ⁵³Wainhira sira hakur tiha ona ba tasi nia sorin balun, Jesus ho nia eskolante sira la'o ba Genesare. Ro kona rai iha neba. ⁵⁴Wainhira sira tun tiha housi ro, ema barak hatene kedas Nia. ⁵⁵Sira halai ba knua nebe besi-besik hodi lori fali ema moras sira iha sira nia tobafatin ka biti, ba fatin nebe sira rona katak Jesus horik hela. ⁵⁶Wainhira Nia tama iha knua eh sidade ruma, ka la'o iha dalan, sira tau ema moras sira iha fatin luan ida hodi husu Nia atu husik sira kona nia hatais nia ninin. Sira hotu nebe kona nia hetan isin diak.

7

Bei ala sira nia hanorin

            ¹Loron ida, eskriba no fariseu balun mai housi Jerusalem, hakbesik an ba Jesus. ²Sira hare katak Nia eskolante sira han paun ho liman foer, katak seidauk fase liman. ³Ema fariseu no Judeu sira hotu la han wainhira sira seidauk fase di-diak sira nia liman, tuir lisan bei ala sira nian. ⁴Sira fila housi merkadu, sira la tur atu han wainhira sira la dauk fase an tuir sira nia lisan. Sira moris tuir lisan selu-seluk tan hanesan fase kopu no buli, solur sana riti. ⁵Tan ne'e fariseu no eskriba sira husu ba Nia, “Tan sa O nia eskolante sira la tuir bei ala sira nia lisan, maibe sira han paun ho liman foer?” ⁶Nia lia tun ba sira,  “Profeta Isaias koalia lo-los duni kona ba imi, ema laran makerek sira, wainhira nia hakerek dehan: ‘Povu ne'e hanai Ha’u ho ibun tutun deit, maibe nia laran dook liu housi Ha’u. ⁷Sira hahi Ha’u le’et deit, maibe buat nebe sira hanorin mesa ema nian.’ ⁸Husik tiha Maromak nia ukunfuan, imi tuir fali ema nia lisan.”

            ⁹Nia dehan tan ba sira, “Imi hatene bobar Maromak nia ukunfuan atu halo tuir imi nia lisan sira. ¹⁰Moises rasik dehan: ‘Hamtauk o nia aman no inan’ no ‘Ema nebe hateten aat nia aman ka nia inan sei mate.’ ¹¹Imi fali dehan: ‘Ema ruma dehan ba nia aman ka nia inan karik: ‘korban’, katak sai tiha presente ida buat nebe imi bele simu housi ha’u, ¹²no imi la husik ona nia atu halo buat ruma ba nia aman ka inan, ¹³nune’e imi halo folin laek Maromak nia liafuan ho imi nia lisan nebe imi fo sai ba imi nia oan sira. Imi halo tan buat barak hanesan ne’e.”

Buat nebe hafoer ema

            ¹⁴Jesus halibur fali ema lubun boot hodi dehan ba sira, “Imi hotu, rona Ha’u hodi komprende ba! ¹⁵La iha buat ida iha liur nebe tama hodi halo foer ema nia laran, maibe buat nebe sai housi ema nia laran rasik mak halo foer ema. ¹⁶Ema nebe iha tilun atu rona, rona ba!”                      

            ¹⁷Wainhira Nia no tama ona iha uma laran dook housi ema lubun ne'e, nia eskolante sira husu Nia kona ba aiknanoik ne'e. ¹⁸Nia hatan ba sira, “Imi mos la komprende?  Imi la hare katak buat naran deit nebe tama iha ema nia laran housi liur la bele halo nia foer ¹⁹basa la tama iha nia fuan maibe iha nia kabun deit hodi sai ba liur.” Nune'e ia fo sai katak aihan hotu la foer. ²⁰Nia simu tan, “Buat nebe mai housi ema nia laran mak halo  nia sai foer,  ²¹basa housi ema nia laran, housi ema nia fuan,  mak hakarak aat nebe lori nia atu halo aat, atu na’ok, atu oho, halo sala foer, ²²atu sai karakten no halo buat aat sira hanesan lohi ema, hahalok foer, laran moras, lia bosok, loko an no hahalok beik mosu mai. ²³Buat sira ne'e hotu mai housi laran no halo foer ema.”

Feto ida nia fiar          

            ²⁴ Hafoin Jesus sai housi neba, la'o ba rai Tiro no Sidonia. Nia tama iha uma ida, basa Nia lakohi katak ema ruma hatene, maibe Nia la bele subar an. ²⁵Feto ida rona kedas kona ba Nia. Feto ne’e nia oan feto iha diabu iha nia laran. Feto ne'e hakbesik no tuku tur ba Nia. ²⁶Nia ema gentiu nebe mai hous rai Siro Fenisia.  Nia husu Jesus atu duni sai diabu housi nia oan feto. ²⁷Jesus dehan ba nia, “Husik oan sira han di-diak lai. Hasai aihan housi oan sira hodi soe fali ba asu oan sira la diak.” ²⁸Feto ne'e hatan ba Nia, “Los duni, Na’i, maibe asu oan sira mos iha meja okos han paun rahun nebe monu housi oan sira.” ²⁹Jesus dehan ba feto ne’e, “Tan o nia liafuan sira ne'e, ba uma ona. Diabu sai tiha ona housi o nia oan.” ³⁰Wainhira feto ne'e to'o uma, nia hetan nia oan feto toba hela iha tobafatin. Diabu la iha ona.

Jesus halo ema monok koalia

            ³¹Tuir mai, Jesus sai housi rai Tiro, hodi la'o housi rai Sidonia ba tasi Galileia, liu to'o baliza Dekapoli nian. ³²Sira lori ba nia ema tilun diuk no monok, hodi husu Nia atu tau liman ba nia. ³³Hadook tiha ema ne'e housi ema lubun boot, Jesus hatama nia limanfuan iha nia tilun, tafui hodi kona nia nanal, ³⁴hafoin Nia foti matan ba lalehan, dada iis hodi dehan ba nia, “Effatha,” katak “Loke ba.” ³⁵Ema ne'e nia tilun nakloke kedas, no buat nebe halo nia ibun tos sai tiha. Nia hahu koalia mo-mos. ³⁶Jesus bandu sira atu la bele fo hatene buat ne’e, maibe liu Nia bandu sira, hetok sira fo hatene liu tan. ³⁷Sira hakfodak hodi dehan: “Nia halo diak buat hotu; tilun diuk sira rona, monok sira mos koalia.”

8

Jesus fo han ema rihun hat

            ¹Iha tempu neba, ema lubun boot ida halibur an. Sira aihan la iha. Tan ne'e, Jesus bolu nia eskolante sira hodi dehan ba sira, ²“Ha’u hanoin ema sira ne'e; sira hela ona ho Ha’u loron tolu no sira aihan la iha. ³Ha’u haruka sira ba uma ho kabun mamuk karik, sira sei monu iha dalan. Sira balun mai housi dook.” ⁴Eskolante sira hatan ba nia: “Iha fatin fuik ne'e, ema bele habosu sira ne'e hotu ho paun housi los nebe?” ⁵Nia husu ba sira, “Imi iha paun fuan hira?” “Hitu,” sira hatan. ⁶Nia haruka sira atu tur iha rai, kaer paun fuan hitu ne'e, fo agradese, silu hodi fo ba eskolante sira atu fahe. Sira fahe duni ba ema sira hotu. ⁷Iha mos ikan kiik balun. Nia fo bensa ba sira ne'e, no haruka atu fahe ba ema sira. ⁸Sira han to'o bosu. Sira halibur hamutuk paun rahun resin luhu hitu nakonu. ⁹Ema sira ne'e besik rihun haat. ¹⁰Nia haruka sira ba uma. Tuir mai, Nia sa'e kedas ro ida ho nia eskolante sira hodi la'o ba rai Dalmanuta.

Fariseu sira husu sinal ida 

            ¹¹Fariseu sira hakbesik Jesus hodi hahu haksesuk malu ho Nia, hodi husu sinal ida housi lalehan atu koko Nia. ¹²Ho laran susar, Nia dehan: “Tan sa ema sira otas ne'e nian husu sinal ida? Tebes Ha’u dehan imi: sei la fo sinal ida ba ema sira otas ne'e nian.” ¹³Nia husik sira, hodi sa'e fali ro atu hakur ba tasi nia sorin balun.

Fariseu no Herodes nia fermentu

            ¹⁴Eskolante sira haluha lori paun. Sira iha paun fuan ida deit iha ro laran. ¹⁵Nia hateten ba sira dehan: “Matan moris neon na'in ba kona ba fariseu no Herodes sira nia fermentu.” ¹⁶Sira dehan ba malu: “Ita la iha paun.” ¹⁷Jesus hatene sira nia hanoin, dehan ba sira, “Tan sa imi haksesuk malu katak imi la iha paun? Imi seidauk hare no komprende? Imi nia fuan sira tos hela ka? ¹⁸Imi matan iha maibe la hare? Tilun iha maibe la rona? Imi la hanoin hetan:¹⁹wainhira Ha’u silu paun fuan lima ba ema rihun lima, imi halibur paun rahun luhu hira?” Sira hatan, “Sanulu resin rua.” ²⁰Wainhira Ha’u silu paun fuan hitu ba ema rihun haat, imi halibur fali paun rahun luhu hira?” Sira hatan, “Hitu." ²¹Nia dehan teni ba sira, “Imi seidauk komprende?”

Jesus halo ema matan delek hare

            ²²Sira to'o ba rai Betsaida. Ema lori ba Nia ema matan delek ida, hodi husu Nia atu tau liman ba nia. ²³Kaer tiha ema matan delek ne'e nia liman, Nia lori nia ba knua nia liur, tafui ba ema ne'e nia matan hodi tau liman ba nia, hodi husu, “O hare buat ruma?” ²⁴Ema ne'e, hateke ba leten, hatan: “Ha’u hare ema sira nudar aihun nebe la'o ba la'o mai.” ²⁵Tuir mai Nia tau fali nia liman ba ema nia matan. Nia hare di-diak ona. Nia bele hare mo-mos buat hotu. ²⁶Nia haruka ema ne'e ba uma hodi dehan: “Keta tama iha knua nia laran.”

Pedro nia lia sasin

            ²⁷Jesus no nia eskolante sira la'o ba knua sira Sesareia Filipe nian. Tuir dalan, Nia husu Nia eskolante sira hodi dehan: “Ema sira dehan katak Ha’u se los?” ²⁸Sira hatan, “Joao Baptista; balun Elias, seluk fali, ema duina ida.” ²⁹Hafoin Nia husu sira, “Imi dehan Ha’u se los?” Pedro hatan, “Ita boot mak Kristu.” ³⁰Jesus haruka sira la bele koalia ba ema ida kona ba Nia.

Jesus koalia kona ba Nia terus no mate

            ³¹Tuir mai, Nia hahu hanorin sira: Oan Mane sei terus barak. Katuas sira no amlulik  boot sira ho eskriba sira sei hakribi Nia, sei oho Nia, maibe liu loron tolu Nia sei moris hi’as. ³²Nia fo hatene sai mo-mos ida ne'e kedas ba sira. Pedro hadook Nia housi sira nia maluk hodi haksi’ak Nia. ³³Maibe Nia fila ba kotuk, hateke ba nia eskolante sira no si’ak Pedro dehan: “Ba Ha’u nia kotuk, Satanas, basa o la hanoin buat nebe Maromak nian maibe buat nebe ema sira nian.” ³⁴Hafoin Jesus bolu fali ema lubun boot ho nia eskolante sira hodi dehan ba sira, “Ema nebe hakarak tuir Ha’u, nia sei hakribi nia an rasik, simu nia krus hodi la'o tuir Ha’u. ³⁵Basa, ema nebe hakarak soi nia moris sei lakon nia; maibe ema nebe lakon nia moris tamba Ha’u no tan liafuan diak sei soi nia.³⁶Ema manan sa los wainhira nia manan mundu tomak maibe lakon nia moris? ³⁷Eh ema sei troka sa los ba nia moris? ³⁸Ema nebe moe kona ba Ha’u no ha’u Nia liafuan sira iha otas maksalak no foer ne'e nian, Oan Mane mos sei moe kona ba nia wainhira Nia mosu mai iha Nia Aman nia kmanek ho Nia anju santu sira.”

9

                        ¹Nia dehan ba sira, “Tebes Ha’u dehan ba imi katak iha balun housi sira nebe iha ne'e dau-daun sei la mate molok sira hare Maromak nia reinu mosu mai ho kbiit tomak.”

Jesus nakfila An

            ²Liu tiha loron ne'en, Jesus lori Pedro, Tiago no Joao mesa-mesak ba foho aas ida. Nia nakfila An iha sira nia oin. ³Nia hena sira sai nabilan liu, mutin teb-tebes; ema fase roupa ida iha rai ne'e la bele halo mutin liu tan. ⁴Hafoin Moises no Elias mosu ba sira hodi koalia ho Jesus. ⁵Pedro koalia dehan ba Jesus: “Mestre, diak tebes mai ami horik ona iha ne'e! Ami halo takabaluk tolu; ida ba Ita, ida ba Moises no ida ba Elias.” ⁶Basa nia la hatene atu dehan sa los, tan sira tauk teb-tebes. ⁷Kalohan ida tun mai, taka sira. Housi kalohan ne'e, sira rona lia ida dehan: “Ida ne'e mak Ha’u Oan doben. Imi rona Nia ba!” ⁸Teki-teki, sira hare ba sorin sorin maibe la hare tan ema ida; Jesus mesak deit ho sira. ⁹Tun dau-daun housi foho, Jesus haruka sira la bele haktuir ba ema ida buat nebe sira hare, molok Oan Mane moris hi’as housi mate. ¹⁰Ne’e duni, sira rai hela liafuan hirak ne’e iha sira nia laran, hodi husu ba sira an rasik moris hi’as housi mate ne'e katak sa. ¹¹Sira husu ba Nia dehan: “Tan sa eskriba sira dehan katak Elias sei mai uluk knanain?” ¹²“Tebes duni,” Nia hatan ba sira, “Elias sei mai uluk atu hametin fali buat hotu, no oin sa Eskritura koalia kona ba Oan Mane katak Nia sei terus maka'as no ema sei hewai Nia? ¹³Maibe Ha’u dehan ba imi katak Elias mai tiha ona, no ema sira halo ba nia buat hotu nebe sira hakarak, lo-los nudar Eskritura haktuir kona ba nia.”

Jesus fo isin diak ba labarik ida nebe iha espiritu foer

            ¹⁴Wainhira Nia to’o ba fatin nebe eskolante sira seluk hela, sira hare ema lubun boot hale’u sira, hamutuk ho eskriba balun nebe haksesuk malu ho sira. ¹⁵Wainhira sira hare Jesus, ema hotu hakfodak hodi halai hasouru Nia no kumprimenta Nia. ¹⁶Nia husu, “Imi haksesuk malu ho sira kona ba sa los?” ¹⁷Ema ida housi lubun ne’e hatan ba Nia, “Mestre, ha’u lori ha’u nia oan ne'e mai Ita. Nia iha espiritu monok iha laran. ¹⁸Wainhira espiritu ne'e book nia, nia soe nia ba rai. Kaben sai housi nia ibun. Nia ruun nehan no nia isin tos. Ha’u husu Ita nia eskolante sira atu duni sai nia maibe sira la bele.” ¹⁹Nia hatan ba sira dehan: “Imi ema fiar laek! To'o wainhira los mak Ha’u sei horik ho imi? To'o wainhira mak Ha’u sei tahan imi? Lori nia mai!” ²⁰Sira lori labarik ba Nia. Wainhira espiritu aat hare Jesus, nia doko maka'as labarik ne'e to'o nia monu ba rai. Nia kaben nakfurin iha nia ibun. ²¹“Houri wainhira mak buat ne'e mosu ba nia?” Jesus husu ba nia aman. “Houri kiik kedas,” aman hatan. ²²“Dala barak espiritu aat ne'e soe nia mos ba ahi no ba be laran atu oho nia. Ita bele halo buat ruma karik, tulun ami no hanoin ami.” ²³“Ita bele karik?” Jesus husu. “Buat hotu bele deit ba ema nebe fiar!”  ²⁴Labarik nia aman dehan kedas, “Ha’u fiar duni; tulun ha’u nia fiar laek ne'e.” ²⁵Wainhira Jesus hare katak ema barak nebe hakbesik Nia, Nia si’ak espiritu aat hodi dehan ba nia: “Espiritu tilun diuk no monok, Ha’u haruka o; sai housi nia no keta tama fali tan iha nia!”. ²⁶Doko fali labarik ne'e, espiritu aat sai housi nia hodi hakilar maka'as. Labarik monu ba rai hanesan ema mate ida. Nune'e ema barak dehan: “Nia mate ona.” ²⁷Maibe Jesus kaer nia liman no halo nia hamriik, to'o nia bele hamriik mesa-mesak.

            ²⁸Wainhira Nia tama ona iha uma laran, eskolante sira husu Nia, “Tan sa ami la bele duni sai nia?” ²⁹Nia hatan ba sira, “Diabu hanesan ne'e bele duni sai deit hodi hamulak no hadera an.”

Jesus koalia fali kona ba Nia mate

            ³⁰Nia ho nia eskolante sira hakat liu ba Galileia nia sorin. Nia lakohi katak ema hatene ne'e. ³¹Tan Nia hanorin dau-daun Nia eskolante sira hodi dehan: “Ema sei saran Oan Mane ba ema sira liman, no ema sira ne'e sei oho Nia. Maibe mate tiha, liu tiha loron tolu, Nia sei moris hi’as fali.” ³²Maibe sira la komprende liu lia hirak ne'e katak sa, no sira tauk atu husu Nia.

Se mak boot liu

            ³³To’o tiha Kafarnaum, Jesus tama iha uma laran no husu Nia eskolante sira, “Imi haksesuk malu kona sa los iha dalan?” ³⁴Sira nonok deit basa sira haksesuk malu kona ba sira ida nebe mak boot liu. ³⁵Hafoin Jesus tur tiha, bolu sira na'in sanulu resin rua hodi dehan ba sira, “Ema se mak hakarak sai boot liu sira seluk nian, nia sei sai ikus liu hotu hodi sai ema hotu nia atan.” ³⁶Tuir mai, kaer tiha labarik oan ida hodi tau nia iha sira nia klaran no hakoak nia, Nia dehan: ³⁷“Ema nebe simu labarik oan ida ne'e hodi Ha’u nia naran, nia simu Ha’u rasik; no ema nebe simu Ha’u, la simu Ha’u maibe simu Ida nebe haruka Ha’u mai.”

Ema nebe la funu hasouru Nia

            ³⁸Joao hasa’e lia ba Nia, “Mestre, ami hare ema ida nebe duni sai diabu hodi Ita nia naran. Nia la la'o ho ita, tan ne'e ami bandu tiha nia.” ³⁹Maibe Jesus hatan, “Keta halo nune'e, basa ema ida la bele halo milagre hodi Ha’u nia naran hafoin hateten aat kedas Ha’u. ⁴⁰Ema nebe la aat hasouru ita, nia ita nian. ⁴¹Ema nebe fo be kopu ida ba imi tan imi Kristu nian, Ha’u hateten kedas ba imi, ema ne'e sei la lakon nia kolen.”

Ema nebe dada labarik ba sala

            ⁴²“Ema ruma dada karik ba aat labarik oan ida nebe fiar Ha’u, diak liu tara fatuk hadulas batar nian ba ema ne'e nia kakorok, hafoin soe nia ba tasi laran. ⁴³O nia liman dada karik o ba sala, tesi tiha nia; tama ba moris ho liman ida deit diak liu fali tama iha inferno ho liman rua tomak. ⁴⁴Iha neba, ular sira sei la mate, ahi mos la mate. ⁴⁵O nia ain lori karik o ba sala, tesi tiha nia. Tama ba moris rohan laek ho ain ida deit diak liu fali tama iha infernu ho ain rua. ⁴⁶Iha neba, ular sira la mate, ahi mos la mate. ⁴⁷O nia matan ida dada karik o ba sala, losu tiha nia. Tama iha Maromak nia reinu ho matan ida deit diak liu fali tama iha infernu ho matan rua. ⁴⁸Iha neba, ular sira la mate, ahi mos la mate. ⁴⁹Ema hotu sei hamer an ho ahi. ⁵⁰Masin diak, maibe wainhira masin lakon nia mer, oin sa mak o bele halo nia mer fali? Iha masin iha imi nia laran ba, hodi moris ho dame ho imi nia maluk sira.”

10

Jesus hanorin kona ba kabennain nebe soe malu

            ¹Housi neba, Nia la'o ba rai Judeia hodi hakur ba Jordaun nia sorin balun ba. Dala ida tan ema lubun boot hakbesik Nia. Tuir Nia lisan, Nia hanorin sira. ²Tuir mai, fariseu balun mai koko Nia hodi husu mane ida bele soe nia kaben ka lae? ³Maibe Nia hatan ba sira, “Moises haruka imi halo sa los?” ⁴Sira hatan, “Moises husik hakerek surat haketak malu nian hodi soe nia.” ⁵Maibe Jesus dehan: “Tan imi fuan tos mak nia hakerek ukunfuan ne'e ba imi. ⁶Maibe houri uluk kedas,  Maromak halo sira mane ho feto; ⁷tan ne'e, mane ida sei husik nia aman no inan sira hodi ba hamutuk ho nia kaben, no sira na’in rua sai isin ida deit. ⁸Ne’e duni, sira la'os tan ema na’in rua, maibe isin ida deit. ⁹Ne'e duni duni, ema ida  keta haketak fali buat nebe Maromak tau hamutuk ona.”

             ¹⁰Wainhira sira to'o ona uma, eskolante sira husu fali kona buat ida ne'e. ¹¹Nia dehan ba sira, “Mane ida nebe soe nia kaben no hola feto seluk halo adulteriu hasouru nia; ¹²no mos feto ida nebe soe nia laen hodi hola fali mane seluk halo adulteriu.”

Jesus fo bensa ba labarik sira

                        ¹³Ema lori labarik sira ba atu Nia tau liman ba sira. Maibe eskolante sira si’ak sira. ¹⁴Wainhira Jesus hare sira, Nia hirus hodi dehan ba sira, “Husik labarik sira mai hakbesik Ha’u; keta taka dalan ba sira. Lo-los, reinu lalehan ba sira nebe hanesan ne'e. ¹⁵Tebes Ha’u dehan ba imi: Ema nebe la simu Maromak nia reinu hanesan labarik oan ida, nia sei la tama iha neba.” ¹⁶Hafoin, Nia hakoak labarik sira, tau liman ba sira hodi fo bensa ba sira.

Foinsa’e ida nebe riku

            ¹⁷Wainhira Nia atu la'o ona, ema ida halai hasouru Nia, tuku tur ba rai hodi husu Nia, “Mestre diak, Ha’u sei halo sa atu bele hetan moris rohan laek?” ¹⁸Jesus hatan ba nia, “Tan sa o dehan Ha’u diak? La iha ema diak; Maromak mesak mak diak. ¹⁹O hatene ukunfuan sira: keta oho, keta halo adulteriu, keta na’ok, keta foti lia bosok hasouru ema, keta lohi ema, hamtauk o nia aman no inan.” ²⁰Nia hatan hodi dehan ba Nia, “Mestre, Ha’u moris tuir sira ne'e hotu houri kiik kedas.” ²¹Jesus fihir nia di-diak, hadomi nia hodi dehan ba nia, “Buat ida deit mak o sei kuran: ba, fa'an o nia sasan tomak, fahe ba ema kiak sira no o sei hetan rikusoi iha lalehan; hafoin, mai tuir Ha’u.” ²²Nia neon sala tebes tan liafuan hirak ne'e; nia ba ho neon nakraik, basa nia iha rikusoi barak.

            ²³Jesus, hateke hale’u, dehan ba Nia eskolante sira, “Susar tebes duni ba ema riku sira atu tama iha Maromak nia reinu.” ²⁴Eskolante sira hakfodak ho liafuan sira ne’e. Maibe Jesus dehan fali ba sira, “Oan doben sira, susar oin sa atu tama iha Maromak nia reinu. ²⁵Kuda kamelu ida atu tama iha daum nia kuak lalais liu fali ema riku ida atu tama iha Maromak nia reinu.” ²⁶Sira hakfodak liu tan hodi hateten ba malu, “Nune'e karik, ema se mak bele hetan maksoin?” ²⁷Jesus hateke ba sira hodi dehan: “Ba ema la bele, maibe ba Maromak lae, basa ba Maromak buat hotu bele deit.” ²⁸Pedro simu dehan ba Nia, “Ami husik buat hotu hodi tuir Ita.” ²⁹Jesus hatan, “Tebes Ha’u dehan ba imi; la iha ema nebe husik uma, maun alin, bin feton, inan, aman, oan sira ka to'os tamba Ha’u no tamba liafuan diak, ³⁰nebe sei la simu iha tempo ne’e uma, maun alin, bin feton, inan, oan no to'os sira dala atus ida liu fali uluk nian hamutuk ho susar oi-oin, no iha tempu nebe atu mai, moris rohan laek. ³¹Maibe, ema barak nebe uluk sei sai ikus, sira nebe ikus sei sai uluk.”

Jesus koalia kona ba Nia mate ba dala tolu

            ³²Sira sa'e dau-daun ba Jerusalem. Jesus la'o iha sira oin. Sira bilan deit. Sira nebe tuir Nia tauk. Dala ida tan, haketak tiha ema sanulu resin rua housi sira seluk, Nia hahu hateten ba sira buat nebe sei mosu ba Nia. ³³“Ohin ita sa'e ba Jerusalem, ema sei saran Oan Mane ba amlulik boot no eskriba sira. Sira sei tesi lia todan ba Nia ba mate, no saran Nia ba ema gentiu sira, ³⁴nebe sei hasara Nia no tafui ba Nia no baku Nia no oho Nia; liu tiha loron tolu Nia sei moris hi’as.”

Tiago no Joao husu buat ida

            ³⁵Tiago no Joao, Zebedeu nia oan sira, hakbesik Nia dehan: “Mestre, ami hakarak katak Ita halo buat nebe ami husu.” ³⁶Nia dehan ba sira, “Imi hakarak katak Ha’u halo sa los ba imi?” ³⁷Sira hatan, “Iha Ita nia gloria, halo ami tur, ida iha Ita nia sorin kuana, ida iha Ita nia sorin karuk.” ³⁸“Imi la hatene buat nebe imi husu,” Jesus dehan ba sira.  “Imi bele hemu kopu nebe Ha’u sei hemu, eh simu baptismu nebe Ha’u sei simu?” ³⁹Sira hatan ba nia, “Ami bele!” Jesus dehan ba sira, “Kopu nebe Ha’u sei hemu, imi sei hemu duni; no baptismu nebe Ha’u sei simu, imi sei simu duni; ⁴⁰maibe tur iha Ha’u nia sorin kuana eh sorin karuk, Ha’u la iha kbiit atu fo ba imi, maibe buat ne’e ba sira nebe hadia tiha ona.”

⁴¹Wainhira sira na'in sanulu seluk rona ne'e, sira hirus Tiago no Joao, ⁴²maibe Jesus bolu sira hotu hodi dehan ba sira, “Imi hatene katak iha gentiu sira le’et, na’i ulun sira ukun ho kbiit, no emboot sira usa sira nia kbiit ba sira nia emar sira. ⁴³Maibe iha imi le’et, la'os hanesan ne'e. Ema se hakarak sai boot iha imi le’et, sei sai imi nia atan; ⁴⁴no ida nebe hakarak sai uluk liu iha imi le’et, nia sei sai imi hotu nia atan; ⁴⁵lo-los Oan Mane rasik la mai atu ema serbi Nia, maibe atu serbi ema, no atu saran Nia moris atu soi ema hotu.”

Jesus halo Bartimeu hare fali

            ⁴⁶Sira ba to'o Jeriko. Wainhira Nia atu sai ona housi neba ho Nia eskolante sira ho ema lubun boot ida, ema matan delek ida, Bartimeu, Timeo nia oan, tur iha dalan ninin, husu esmola.  ⁴⁷Wainhira nia rona katak Jesus Nazare liu housi neba, nia hahu hakilar hodi dehan: “Jesus, David nia Oan, sadia ha’u!” ⁴⁸Ema barak si’ak nia hodi haruka nia atu nonok, maibe nia hetok hakilar maka'as liu tan, “David nia Oan, sadia ha’u!” ⁴⁹Jesus para hodi dehan: “Bolu nia mai.” Sira bolu nia dehan: “Aten berani ba, hamriik ba. Nia bolu o.” ⁵⁰Nia soe nia lipa, hamriik kedas hodi la'o ba Jesus. ⁵¹Jesus lia tun ba nia dehan: “O hakarak Ha’u sei halo sa los ba o?” “Mestre,” ema matan delek ne'e hatan, “Halo Ha’u hare!” ⁵²Jesus lia tun dehan: “Ba, o nia fiar soi o!” Nia hare kedas hodi la'o hamutuk ho Jesus iha dalan.

11

Jesus tama iha Jerusalem

            ¹La’o besik  dau-daun ba Jerusalem, ba Betfage no Betania, besik Foho Oliveira nian, Jesus haruka Nia eskolante na'in rua ²hodi dehan ba sira, “La’o ba knua nebe iha imi nia oin. Wainhira imi tama ba, imi sei hare kedas kuda burru oan ida kesi hela, ema seidauk sa'e. Kore tiha nia, lori mai. ³Ema dehan karik ba imi, ‘Tan sa imi halo ne'e?’ imi sei hatan, ‘Na’i hakarak nia, maibe la kleur, Nia sei haruka lori fali mai.’”

            ⁴Sira ba hodi hetan kuda burro oan ida kesi hela iha liur besik odamatan besik dalan. Sira kore tiha nia. ⁵Ema balun nebe hamriik iha neba husu ba sira, “Tan sai imi kore kuda burru oan ne'e?” ⁶Sira hatan ba sira nudar Jesus hanorin. Ema husik sira. ⁷Sira lori kuda burru oan ba Jesus, tau sira nia hena iha nia leten. Jesus sa'e ba nia. ⁸Ema barak nahe sira nia hena iha dalan; sira seluk nahe ai-sanak matak nebe sira tesi iha to'os. ⁹Sira nebe la'o iha oin no sira nebe la'o iha kotuk haklalak: “Osana! Rahun diak ba Ida nebe mai hodi Na’i nia naran! ¹⁰Rahun diak tebes ba aman David nia reinu nebe to'o mai dau-daun. Osana leten aas ba!”

            ¹¹To'o tiha Jerusalem, Nia tama iha templu. Nia hateke haleu ba buat hot-hotu iha neba, maibe tamba kalan besik ona, Nia sai ba Betania ho nia eskolante sanulu resin rua.

Jesus hateten aat ai figueira ida

            ¹²Loron nebe tuir mai, wainhira sira sai housi Betania, Nia hamlaha. ¹³Sira hare housi dook ai figueira ida ho tahan barak. Nia hakbesik atu hare Nia bele hetan fuan ruma ka lae. To'o tiha neba, Nia hetan tahan deit, basa tempu atu ai figueira fo fuan seidauk to'o duni. ¹⁴Nia dehan: “Ema sei la han tan o nia fuan tinan ba tinan.” Nia eskolante sira rona buat sira ne'e hotu.

Jesus tama iha templu

            ¹⁵To’o tiha Jerusalem, Nia tama iha templu no hahu duni sai sira hotu nebe fa'an no sosa iha templu laran. Nia soe tun meja sira ema nebe troka osan no kadeira sira ema fa'an manu falur nian. ¹⁶Nia la husik ema lori sasan sira liu housi templu laran. ¹⁷Nia hanorin hodi dehan ba sira, “La hakerek nanis, ‘Ha’u nia uma ne’e, povu hot-hotu sei la bolu nia uma orasaun nian?’ Imi fali halo nia nakfila ba na’okten sira nia luhan!” ¹⁸Amlulik boot no eskriba sira rona kona ba buat ne'e no sira buka oin sa sira bele oho Nia, basa  sira tauk Nia; povu tomak hakfodak kona ba Nia hanorin.

            ¹⁹Wainhira kalan tiha ona, sira husik sidade.

Ai figueira namlaek

            ²⁰Iha dader, wainhira sira liu housi neba, sira hare ai figueira namlaek ona to'o abut. ²¹Pedro hanoin hetan hodi dehan ba Nia, “Mestre, hare ba ai figueira nebe Ita fo malisan namlaek ona.” ²²Jesus hatan ba nia dehan: “Fiar Maromak ba! ²³Tebes Ha’u dehan ba imi katak ema nebe hateten ba foho ne'e, ‘Sai housi ne’e no soe o nia an ba tasi laran,’  hodi la namlele iha nia fuan maibe fiar katak buat nebe nia dehan sei mosu, sei mosu duni ba nia. ²⁴Ne’e duni, Ha’u dehan ba imi: buat nebe imi resa hodi husu, fiar ba katak imi sei simu; nia sei mosu duni ba imi. ²⁵Wainhira imi resa, fo perdua ba ema nebe imi hirus atu imi nia Aman iha lalehan sei perdua imi nia sala. ²⁶Imi la fo perdua karik, imi nia Aman nebe iha lalehan mos sei la fo perdua ba imi.”

Ema husu kona ba Nia kbiit

            ²⁷Sira fila fali ba Jerusalem. Wainhira Jesus la'o dau-daun iha templu, amlulik boot sira no eskriba no katuas sira ba hasouru Nia. ²⁸Sira dehan ba Nia, “Ho kbiit ida nebe mak o halo  buat ne'e? Eh, ema se mak fo kbiit ba O atu halo buat hirak ne'e hotu?” ²⁹Jesus hatan, “Ha’u sei husu buat ida deit ba imi. Imi hatan mai Ha’u karik, Ha’u mos sei hateten ba imi ho kbiit ida nebe los mak Ha’u halo buat ne'e hotu. ³⁰Joao nia baptismu housi lalehan ka housi ema? Hatan mai Ha’u ba!” ³¹Sira haksesuk malu hodi dehan: “Ita dehan karik housi lalehan; Nia sei hateten ‘Tan sa imi lakohi fiar nia?’ ³²Maibe ita hateten karik, ‘Housi ema,’ – sira tauk povu basa ema hotu fiar katak Joao ne'e profeta lo-los. ³³Ne’e duni sira hatan ba Jesus dehan: “Ami la hatene.” Jesus dehan ba sira, “Ha’u mos la hateten ba imi ho kbiit ida nebe los mak Ha’u halo buat hirak ne'e hotu.”

12

Aiknanoik kona ba to'os uvas nia na'in

            ¹Nia hahu koalia ba sira ho aiknanoik sira dehan. “Ema ida halo to'os uvas nian, hale’u nia ho lutu, ke’e kuak atu hanehan uvas no harii torre ida. Tuir mai, nia saran to'os ne'e ba ema fila rai sira, no la'o ba rai seluk. ²Wainhira tempu los to'o ona, nia haruka nia emar ida ba ema fila rai sira atu husu aifuan sira housi to’os. ³Maibe sira kaer emar ne'e, baku nia no haruka nia fila ho liman mamuk. ⁴Dala ida tan, nia haruka ema seluk ba sira. Nia mos sira baku no trata aat. ⁵Nia haruka tan ema seluk, maibe sira oho nia no mos ema barak seluk; balun sira baku, balun sira oho. ⁶Nia iha tan oan mane doben. Nia haruka nia ba sira hodi dehan: ‘Sira sei hamtauk ha’u nia oan.’ ⁷Maibe ema fila rai sira dehan ba malu, ‘Ida ne'e mak nia limanrohan na'in! Mai, ita oho nia, nune'e nia limanrohan sei monu mai ita.’  ⁸Sira kaer no oho nia, hafoin soe nia ba liur. ⁹To’os na'in ne'e sei halo sa los? Nia sei mai no halo lakon ema fila rai sira ne'e hodi saran to'os uvas nian ba ema seluk. ¹⁰Imi seidauk le’e lia Eskritura ne'e: ‘Fatuk nebe badaen sira hewai nakfila ba fatuk inan; ¹¹buat ida ne'e Na’i mak halo. Housi Nia mak buat kmanek liu ne’e mosu iha ita nia oin?” ¹²Sira buka atu kaer Nia; maibe sira ta’uk povu; sira hatene katak Nia haktuir aiknanoik ida ne’e ba sira. Sira ba hodi husik Nia.

Kona ba impostu

            ¹³Sira haruka fariseu balun no Herodes nia emar sira atu halo Nia ibun sala. ¹⁴Sira ne'e to’o tiha, sira dehan ba Nia, “Mestre, ami hatene katak Ita ema los, no la tauk ema ida; Ita la fihir ema nia oin, maibe hanorin deit dalan Na’i ninian. Bele selu impostu ba Cesar ka lae? Ami sei fo ka la fo?” ¹⁵Hatene tiha sira nia laran makerek, Nia hatan ba sira, “Tan sa imi koko Ha’u? Lori osan mai Ha’u atu Ha’u bele hare!” ¹⁶Sira lori osan mai. Nia dehan ba sira, “Ida ne'e se nia ilas no hakerek?” “Cesar nian,” sira hatan. ¹⁷Ne’e duni, Jesus dehan ba sira, “Fo fali ba Cesar buat nebe Cesar nian; no ba Maromak buat nebe Maromak nian!” Sira hakfodak kona ba Nia.

Moris hi’as housi mate

            ¹⁸Tuir mai, Saduseu balun nebe dehan katak la iha moris hi’as hakbesik Jesus hodi husu Nia, ¹⁹“Mestre, Moises hakerek ba ami katak wainhira mane ida nia maun mate hodi husik nia kaben no la husik oan, mane ne’e sei hola feto faluk ne'e atu fo oan ba nia maun. ²⁰Iha maun alin na'in hitu. Ida boot liu hola feto, hafoin nia mate, la hetan oan ida. ²¹Ida nebe tuir nia hola feto faluk ne’e, maibe nia mos mate, la hetan oan. Nune'e mos ida nebe tuir nia. ²²Sira na'in hitu ne’e la hetan oan ida. Ikus mai feto ne'e mos mate. ²³Iha moris hi’as, wainhira sira hotu sei moris fali, feto ne'e se los nia kaben, basa sira hotu hola nia?” ²⁴Jesus hatan ba sira, “Imi hanoin sala teb-tebes! Imi la komprende Eskritura sira no Maromak nia kbiit. ²⁵Basa wainhira sira moris hi’as housi mate, sira la hola malu tan; sira sei sai hanesan anju sira iha lalehan. ²⁶Kona ba matebian sira moris hi’as fali, imi la le’e iha Moises nia livru, iha aihun nebe lakan, oin sa Nai Maromak koalia ba nia dehan: ‘Ha’u Abraao nia Maromak, Isaac nia Maromak, no Jacob nia Maromak.’ ²⁷Nia la'os ema mate nia Maromak maibe ema moris nian. Imi hanoin sala teb-tebes!”

Ukunfuan boot liu hotu

            ²⁸Eskriba ida, nebe rona Nia koalia no hare oin sa Jesus hatan diak los ba sira, mai hakbesik Nia hodi husu, “Ukunfuan uluk liu hotu mak ida nebe los?” ²⁹Jesus hatan, “Ida nebe uluk liu mak: ‘Rona ba, Israel. Na’i, ita nia Maromak, mak Na’i ida mesak. ³⁰O sei hadomi Na’i, o nia Maromak ho o nia fuan tomak, ho o nia klamar tomak, ho nia hanoin tomak no ho o nia kbiit tomak.’ ³¹Ida tuir nia mak ne'e: ‘O sei hadomi o nia maluk nudar o nia an rasik. La iha tan ukunfuan nebe boot liu sira ne'e.” ³²Eskriba ne'e dehan ba Nia, “Diak, Mestre.  Ho lialos, Ita dehan katak Maromak ida deit; la iha tan ida seluk, Nia mesak deit. ³³Hadomi Nia ho fuan tomak, no ho hanoin tomak no kbiit tomak, no hadomi maluk hanesan an rasik mak boot liu buat karan sunu no sakrifisiu hotu.” ³⁴Jesus, hare katak nia koalia ho matenek, dehan ba nia, “O la dook housi Maromak nia reinu!” La iha tan ema nebe berani atu husu buat ruma ba Nia.

Lia kona ba Kristu

            ³⁵Tuir mai, wainhira Jesus hatan tiha, Nia hanorin iha templu dehan: “Tan sa eskriba sira dehan katak Kristu ne'e David nia Oan? ³⁶Basa David rasik, ho Espiritu Santu nia naroman, dehan: ‘Na’i hateten ba Ha’u nia Na’i: tur iha Ha’u nia sorin kuana to'o tempu nebe Ha’u tau O nia funubalun sira iha O nia ain okos.’ ³⁷David rasik dehan Nia Na’i; ne'e duni, oin sa mak Nia ninia oan fali?” Ema barak rona Nia ho ksolok.

Jesus halo sira matan moris kona ba eskriba sira

            ³⁸Nia dehan hodi hanorin, “Matan moris ba kona ba eskriba sira, nebe hakarak la'o ho unuk nar-naruk atu ema kumprimenta sira iha merkado, ³⁹atu tur iha sinagoga sira nia oin eh iha ema boot sira nia fatin iha festa. ⁴⁰Sira ne'e tolan feto faluk sira nia uma, maski sira halo ema hare ho laran makerek katak sira resa  barak. Sira ne'e sei hetan susar boot liu.”

Feto faluk nia osan

            ⁴¹Nia tur iha osan fatin nia oin, hodi hare ema sira nebe tau osan iha neba. Ema riku sira tau osan barak. ⁴²Feto faluk kiak ida mos mosu mai hodi tau osan fuan kiik rua. Osan ne'e nia folin kiik tebes. ⁴³Jesus bolu nia eskolante sira hodi dehan ba sira, “Tebes Ha’u dehan ba imi; feto faluk kiak ne'e tau barak liu fali sira seluk iha osan fatin, ⁴⁴basa sira tau osan nebe resin ba sira, maibe housi nia kiak, buat hotu nebe nia iha nia tau hotu, katak buat nebe nia kuran atu moris.”

13

Jesus koalia kona ba Jerusalem

            ¹Wainhira sira husik dau-daun templu, eskolante ida dehan ba Nia, “Mestre, hare ba fatuk bo-boot sira ne'e! Hare ba andar aas sira ne'e!” ²Jesus hatan, “Imi hare andar bo-boot sira ne'e? Fatuk ida mos sei la hela iha fatuk seluk nia leten. Buat hotu ne'e sei sobu tiha.”

Susar boot atu mai

            ³Jesus tur iha Foho Oliveira nian hodi fila oin ba templu. Pedro, Tiago no Joao husu Nia, ⁴“Dehan took mai ami wainhira buat hotu ne'e sei mosu no mos sinal sira nebe sei hatudu katak buat hotu ne'e sei halo tuir duni.” ⁵Nune’e Jesus hahu hateten ba sira, “Matan moris ba atu ema la bele lohi imi! ⁶Ema barak sei mai hodi usa Ha’u nia naran dehan: ‘Ha’u mak Nia,’ no sira sei lohi duni ema barak. ⁷Wainhira imi rona kona ba funu no lia bosok kona ba funu, keta tauk ba. Buat hirak ne'e sei mosu duni, maibe rohan seidauk to'o mai. ⁸Nasaun sei ba hasouru nasaun seluk, no reinu hasouru reinu seluk. Iha fatin balun, rai sei nakdoko; iha fatin seluk tan sei hamlaha boot, maibe terus oi-oin sei hahu deit ho ida ne'e.”

            ⁹“Matan moris ba! Ema sira sei saran imi ba tribunal, sira sei baku imi iha sinagoga; imi sei hamriik iha na’i ulun no liurai sira nia oin tan Ha’u nia naran atu fo sasin ba sira kona ba Ha’u, ¹⁰basa, uluk knanain, liafuan foun diak sei haklaken ba nasaun hotu. ¹¹Wainhira sira lori imi atu sasin ba ema, keta hanoin resin atu dehan sa los. Koalia deit buat nebe sei fo sai ba imi iha tempu neba, basa la'os imi mak sei koalia, maibe Espiritu Santu. ¹²Maun sei saran nia alin; aman sei saran nia oan; oan sira sei ba hasouru sira nia aman inan hodi oho sira. ¹³Ema hotu sei hirus imi tan Ha’u nia naran; maibe ema nebe sei tahan to'o rohan sei hetan maksoin.”

Ida nebe ema hakribi liu

            ¹⁴Wainhira imi hare katak ida nebe ema hakribi liu hamriik iha fatin nebe la'os ninian, (ema nebe le’e, buka komprende ba), sira nebe iha Judeia halai ba foho ba; ¹⁵ema ruma karik iha uma leten, nia keta tun ba uma laran atu hasai buat ruma iha neba; ¹⁶ema ruma iha to'os karik, nia keta fila fali atu hola nia unuk. ¹⁷Susar boot ba sira nebe isin rua eh ho oan nurak, wainhira loron sira ne'e sei mai. ¹⁸Resa ba, atu buat sira ne'e la mai iha tempu rai malirin nian, ¹⁹basa iha loron sira ne'e susar boot sei mosu; seidauk hetan susar ida hanesan nia houri tempu nebe Maromak hakiak mundu ne'e to'o ohin. ²⁰Na’i la habadak karik loron sira ne'e, ema ida la bele tahan. Maibe Na’i sei habadak nia duni tamba sira nebe Nia fihir ona. ²¹Ema ruma dehan karik ba imi, ‘Hare ba, Kristu mak ne'e ona’ eh ‘Hare ba, Nia iha neba,’ keta fiar, ²²basa kristu bosok sira sei mosu mai hodi lori sinal no buat oi-oin atu, bele karik, lohi mos sira nebe Maromak fihir ona. ²³Ne’e duni, matan moris ba! Buat hotu ne'e Ha’u fo hatene nanis ona.”

Oan Mane hiit An mai

            ²⁴Maibe iha loron sira ne'e, susar boot sira ne'e hotu tiha, loron sei sai nakukun, fulan sei lakon nia naroman, ²⁵fitun sira sei monu housi lalehan, no kbiit lalehan nian sei nakdoko hela. ²⁶Tuir mai, sira sei hare housi kalohan sira Oan Mane hiit An mai ho kbiit no kmanek wa’in. ²⁷Nia sei haruka anju sira atu halibur hamutuk sira nebe Nia fihir ona, housi lorosa’e no loromonu, tasi feto no tasi mane, housi rai ikun no rai ulun, to'o lalehan nia rohan."

Hanorin ida housi ai figueira

            ²⁸Housi ai figueira, imi hatene ba aiknanoik ida ne’e: wainhira nia sanak sai mamar no dikin sira mosu, imi hatene katak bainloron to'o ona^{. 29}Nune’e mos, wainhira imi hare buat hirak ne'e mosu, hatene ba katak tempu to'o ona mai, besik ona odamatan. ³⁰Tebes, Ha’u dehan ba imi, molok otas ne'e liu tiha, buat hotu ne'e sei mosu tiha ona. ³¹Lalehan ho rai sei liu tiha, maibe Ha’u nia liafuan sei la liu."

Ema ida la hatene loron eh oras

            ³²Kona ba loron eh oras, ema ida la hatene; anju sira mos iha lalehan no Oan Mane rasik la hatene. Aman deit mak hatene. ³³Loke matan ba! Matan moris ba, hodi resa, basa imi la hatene wainhira tempu ne'e sei to'o mai. ³⁴Buat ne'e, nudar ema la'o rai nebe husik nia uma hodi haraik kbiit ba atan sira, fahe knaar ba sira ida-ida no haruka ida nebe hein odamatan atu sai matan moris neon na'in. ³⁵Ne’e duni, matan moris neon na’in ba, basa imi la hatene wainhira uma na'in sei mai: iha loraik, iha kalan fahe rua, iha rai hun mutin ka iha dader; ³⁶atu wainhira nia teki-teki mai, nia la hetan imi dukur hela. ³⁷Buat nebe Ha’u dehan ba imi, Ha’u dehan ba ema hotu: matan moris ba!"

14

Amlulik boot buka atu oho Jesus

            ¹Sei hela loron rua tan molok festa Paskua no Paun Fermentu Laek nian. Amlulik boot sira no eskriba sira buka namanas atu lohi hodi kaer no oho Nia. ²Sira dehan: "Keta iha festa laran, atu la povu rungu-ranga."

Jesus iha Betania

            ³Jesus hela iha Betania, iha Simao nebe moras lepra nia uma. Nia tur hela iha meja, feto ida lori mai botil alabastru ida nakonu ho mina morin nardu lolos nian, nebe folin boot tebes. Nia fera botil ne'e hodi fui mina morin ba Jesus nia ulun. ⁴Ema balun hirus hodi dehan  ba malu, "Tan sa halo aat le’et mina morin ne'e? ⁵Bele fa'an nardo ne’e ba folin denariu atus tolu resin hodi fo ba ema kiak sira." Sira hateten aat feto ne'e. ⁶Maibe Jesus dehan: "Husik nia ba! Tan sa imi halo terus nia? Nia halo buat diak ida mai Ha’u. ⁷Imi sei hetan nafatin ema kiak sira, no wainhira imi hakarak, imi bele halo diak ba sira. Maibe Ha’u, imi sei la hetan bei-beik. ⁸Nia halo buat nebe nia bele. Nia tau nanis mina morin ba Ha’u isin atu hadia nia ba rate. ⁹Ha’u dehan los ba imi: iha fatin naran deit nebe ema sei haklaken liafoun diak iha mundu tomak, sira sei haktuir buat nebe nia halo ne'e hodi hanoin nia."

Judas hakotu lia atu saran Jesus

            ¹⁰Sira sanulu resin rua ne'e ida, naran Judas Iscariotes, ba amlulik boot sira atu saran Jesus ba sira. ¹¹Rona tiha nia, sira haksolok hodi hakotu lia atu fo osan ba nia. Nia buka namanas tempu diak ida atu saran Nia.

Jesus halo han hemu Paskua nian ho Nia eskolante sira

            ¹²Iha loron uluk Paun Fermentu Laek nian, wainhira sira hasa'e buat karan Paskua nian, eskolante sira husu ba Jesus, “Ita hakarak katak ami hadia han hemu Paskua nian iha los nebe?” ¹³Nia haruka eskolante na’in rua hodi dehan ba sira, “Ba sidade laran. Mane ida nebe lori be iha buli ida sei la'o hasouru imi. Tuir nia ba, no iha fatin nebe nia tama, husu ba uma na'in: ¹⁴‘Mestre husu: fatin nebe Ha’u atu halo han hemu Paskua nian hamutuk ho Ha’u nia eskolante sira iha los nebe?’ ¹⁵Nia sei hatudu fatin luan ida iha andar leten nebe nahe no halo furak ona. Hadia sasan sira iha neba.” ¹⁶Eskolante sira sai hodi tama ba sidade.  Sira hetan buat hotu nudar Nia dehan ba sira. Sira hadia sasan hotu ba Paskua. ¹⁷Wainhira kalan ona, Nia mai ho sira sanulu resin rua. ¹⁸Wainhira sira tur iha meja no han dau-daun, Jesus dehan: “Tebes Ha’u fo hatene ba imi katak imi sira ne'e ida sei saran Ha’u; ida nebe han hamutuk ho Ha’u.” ¹⁹Sira hahu neon kraik. Ida-ida husu ba Nia, “Ha’u karik?” ²⁰Jesus hatan ba sira, “Housi na'in sanulu resin rua ne'e, ida nebe tau liman hamutuk ho Ha’u iha bikan. ²¹Oan Mane sei mate duni, nudar hakerek ona kona ba Nia, maibe susar ba ema nebe tan nia ema saran Oan Mane ne'e. Ema ne'e la moris karik diak liu.”

Han hemu Paskua nian

            ²²Sira han dau-daun, Jesus kaer paun, fo bensa hodi silu no fo ba Nia eskolante sira dehan: “Simu ba. Ne'e Ha’u nia isin.” ²³Tuir mai, Nia foti kalis, fo agradese no fo ba sira. Sira hotu hemu. ²⁴Jesus dehan ba sira, “Ne'e Ha’u nia ran, ran aliansa nian, nebe sei nakfakar tamba ema barak. ²⁵Tebes Ha’u dehan ba imi katak Ha’u sei la hemu tan housi uvas fuan to'o loron nebe Ha’u sei hemu tua foun iha Maromak nia reinu.”

Jesus fo hatene nanis katak Pedro sei heli lia

            ²⁶Hananu tiha knananuk hahi nian ida, sira sa'e ba Foho Oliveira nian. ²⁷Jesus lia tun ba sira, “Imi hotu sei monu, basa hakerek nanis, ‘Ha’u sei hakanek bibi atan; bibi sira sei namkari.’ ²⁸Maibe, moris hi’as tiha housi mate, Ha’u sei ba uluk imi iha Galileia.” ²⁹Pedro dehan ba Nia, “Maski hot-hotu sei monu, Ha’u lae!” ³⁰Jesus lia tun ba nia, “Tebes Ha’u dehan ba o katak iha kalan ne'e kedas, molok manu kokorek dala rua, o sei heli lia kona ba Ha’u dala tolu.” ³¹Maibe Pedro dehan teni maka'as liu tan, “Maski Ha’u mate ho Ita, Ha’u sei la heli lia!” Eskolante sira seluk mos hateten hanesan ne'e.

Jesus resa iha Getsemani

            ³²Sira to'o tiha to'os ida naran Getsemani, Jesus lia tun ba eskolante sira, “Hela iha ne'e ba. Ha’u sei ba atu harohan.” ³³Nia lori Pedro, Tiago no Joao hamutuk ho Nia. Nia hahu laran taridu, laran tauk. ³⁴Nia dehan ba sira, “Ha’u laran susar to'o mate. Hela iha ne'e hodi hein ho matan moris ba.” ³⁵Hakat uitoan ba oin, Nia monu ba rai hodi harohan katak bele karik, oras ne'e liu tiha housi Nia. Nia dehan: ³⁶“Abba, Aman, buat hotu bele deit ba Ita. Hasai tiha kalis ida ne'e housi Ha’u; maibe la’os buat nebe Ha’u hakarak, maibe buat nebe Ita hakarak.” ³⁷Tuir mai, Nia fila hodi hetan sira toba hela. Nia lia tun ba Pedro, “O toba, Simao? O kbiit la iha atu hein oras ida deit?” ³⁸Nia dehan ba sira, “Hader no harohan ba atu imi la bele monu ba tentasaun. Espiritu hakarak tebes, maibe isin kbiit laek.” ³⁹Nia hadook an fali atu harohan ho liafuan sira hanesan uluk nian. ⁴⁰Nia fila fali hodi hetan sira toba hela, basa sira matan dukur tebes. Sira la hatene hatan buat ida ba Nia. ⁴¹Wainhira Nia fila  ba dala tolu, Nia dehan ba sira, “Toba ona ba hodi hakmatek. Oras to’o ona, Oan Mane saran tiha ona ba ema maksalak sira nia liman. ⁴²Hamriik ba, ita la'o ona. Ema nebe sei saran Ha’u mai besik dau-daun ona.”

Ema kaer Jesus

            ⁴³Iha oras ne'e duni, Jesus sei koalia hela, Judas, sira na'in sanulu resin rua ne'e ida, mosu ho ema lubun boot nebe lori surik no aidona housi amlulik boot sira, eskriba sira no katuas sira. ⁴⁴Ida nebe atu saran Nia fo sinal ida ba sira dehan: “Ida nebe ha’u rei, mak Nia. Kaer Nia ba, no lori Nia met-metin!” ⁴⁵Nia to'o neba, nia hakbesik kedas Jesus hodi dehan ba Nia, “Mestre!” Nia rei Jesus. ⁴⁶Sira tau liman ba Nia hodi kaer Nia. ⁴⁷Sira nebe iha neba ida losu nia surik, hakanek amlulik boot nia atan hodi tesi nia tilun. ⁴⁸Jesus dehan ba sira, “Imi mai ho surik no aidona atu kaer Ha’u, hanesan hasouru na’okten ida? ⁴⁹Loron - loron Ha’u hela ho imi iha templu hodi hanorin, imi la kaer Ha’u, maibe ne'e atu halo tuir Eskritura.” ⁵⁰Eskolante sira halai hotu no husik Nia mesak.

            ⁵¹Mane klosan ida tuir Nia, taka deit ho lipa ida. Sira kaer nia. ⁵²Nia husik tiha lipa no halai isin tanan.

Jesus iha Sinedriu

⁵³Sira lori Jesus ba amlulik boot, no amlulik boot sira, katuas no eskriba sira hotu halibur an hamutuk. ⁵⁴Pedro tuir Nia housi dook to'o amlulik boot nia uma. Nia tur hamutuk ho atan sira hodi haneruk ahi. ⁵⁵Amlulik boot sira no Sinedriu tomak buka namanas sasin ida hasouru Jesus atu sira bele saran Nia ba mate, maibe, sira la hetan. ⁵⁶Ema barak foti lia bosok hasouru Nia maibe sira nia lia sasin la tuir malu. ⁵⁷Balun kesar Nia ho sasin bosok ida ne'e; ⁵⁸“Ami rona Nia dehan 'Ha’u sei sobu templu ne'e nebe ema mak halo, hafoin iha loron tolu nia laran, Ha’u sei harii fali ida seluk nebe la'os ema mak halo.” ⁵⁹Maibe maski nune'e, sira nia lia sasin la tuir malu. ⁶⁰Amlulik boot hamriik iha klaran hodi husu Jesus, “O la hatan buat ida ba buat hotu nebe sira foti hasouru o?” ⁶¹Maibe Nia nonok deit, la hatan buat ida. Amlulik boot husu fali Nia dehan: “O Kristu, Maromak diak nia Oan?” ⁶²Jesus hatan, “Ha’u duni no imi sei hare Oan Mane tur iha Maromak kbiit na'in nia kuana, hodi mai ho kalohan lalehan nian.” ⁶³Amlulik boot hales nia unuk hodi dehan: “Sasin sa tan ita presisa hasouru Nia? ⁶⁴Imi rona Nia hateten aat Maromak. Imi hanoin sa?” Sira hotu tesi lia katak Nia soi mate. ⁶⁵Hafoin sira balun hahu tafui ba Nia, taka Nia oin ho hena no basa Nia dehan: "Si’ik took!" Atan sira mos basa Nia.

Pedro heli lia kona ba Jesus

            ⁶⁶Pedro hela iha kraik iha uma liur. Amlulik boot nia atan feto ida besik nia. ⁶⁷Hare Pedro haneruk ahi, feto ne’e hateke ba nia oin hodi dehan: “O mos hamutuk ho Jesus Nazare!” ⁶⁸Maibe nia heli lia dehan: “Ha’u la hatene no komprende buat nebe o hateten.” Nia sai ba liur no manu aman ida kokorek. ⁶⁹Atan feto hare fali nia hodi hahu hateten ba sira nebe iha neba, “Ida ne'e sira ida!” ⁷⁰Maibe nia heli lia fali. La kleur ema sira nebe iha neba dehan ba Pedro, “Los duni, o sira nian ida, basa o ema Galileia.” ⁷¹Maibe nia hahu hotar hodi jura, “Ha’u la hatene ema ne’e nebe imi dehan dau-daun ne'e!” ⁷²Manu aman kokorek kedas ba dala rua. Pedro hanoin hetan liafuan nudar Jesus dehan nanis ba nia, “Molok manu aman kokorek dala rua, o sei heli lia kona ba Ha’u dala tolu.” Nia hahu tanis.

15

Jesus iha Pilatos nia oin

            ¹Sei dadersan hela, amlulik boot sira ho katuas sira, eskriba sira no Sinedriu tomak futu Jesus, lori no saran Nia ba Pilatos. ²Pilatos husu ba Nia, “O ema Judeu sira nia liurai?” Nia hatan ba nia, “Hanesan o dehan.” ³Amlulik boot sira kesar buat oi-oin kona ba Nia. ⁴Pilatos husu fali, “O la hatan buat ida? O hare took ba, sira kesar buat oi-oin kona ba O.” ⁵Maibe Jesus la hatan buat ida, nune'e Pilatos hakfodak. ⁶Iha festa Paskua nian, Pilatos toman husik ema dadur ida nebe Judeu sira husu. ⁷Iha ida naran Barrabas, nebe hamutuk no ema sira seluk hamriik hasouru estadu hodi oho ema. ⁸Ema lubun ne'e sa’e hodi husu atu halo tuir nia lisan ho sira. ⁹Nia husu sira, “Imi hakarak katak Ha’u husik Judeu sira nia liurai?” ¹⁰Nia hatene katak amlulik boot sira saran Nia tamba sira laran moras. ¹¹Maibe amlulik boot sira soran ema lubun boot ne'e atu husu nia husik Barrabas ba sira. ¹²Pilatos koalia fali hodi husu sira, “Ne'e duni, Ha’u sei halo sa los ba ida nebe imi hanaran Judeu sira nia liurai?” ¹³Maibe sira hakilar fali, “Hedi Nia ba krus!” ¹⁴Pilatos husu ba sira, “Nia halo aat sa ida?” Sira hakilar liu tan, “Hedi Nia ba krus!” ¹⁵Tan ne'e, Pilatos husik Barrabas atu fo ksolok ba sira, haruka baku no hedi Jesus iha krus.

Soldadu sira hasara Jesus

            ¹⁶Soldadu sira lori Nia ba pretoriu laran, hafoin, halibur sira maluk hotu. ¹⁷Sira tau ba Nia hena mean ida, no homan tiha koroa aitarak nian, tau ba Nia ulun. ¹⁸Tuir mai, sira hahu kumprimenta Nia dehan: “Tabe, liurai Judeu sira nian!” ¹⁹Sira baku Nia ulun ho fafulu ida, tafui ba Nia, no hakneak iha Nia oin hodi hanai Nia. ²⁰Hasara tiha Nia, sira kolu hena mean, tau fali Nia hatais. Sira lori Nia housi neba atu hedi ba krus.

Sira hedi Jesus iha krus

            ²¹Sira haruka ema ida naran Simao housi Sirene, Alexandre no Rufo nia aman, nebe fila dau-daun housi to'os, atu lori krus. ²²Sira lori Nia ba fatin ida naran Golgotha, katak, fatin ulun ruin nian. ²³Sira fo tua kahur ho naan horun ba Nia, maibe Nia la hemu. ²⁴Tuir mai, sira hedi Nia ba krus no fahe Nia hatais ba malu hodi koko sorte atu hare se mak lori sa. ²⁵Sira hedi Nia ba krus iha tuku sia dader. ²⁶Iha leten, lia hakerek tansa Nia hetan kastigu mak: “Liurai Judeu sira nian.” ²⁷Hamutuk no Nia, sira hedi mos ba krus na’okten na'in rua, ida iha sorin kuana, ida seluk iha Nia sorin karuk. ²⁸Nune’e mak halo tuir Eskritura nebe dehan: “Ema sura Nia hamutuk ho ema aat sira.” ²⁹Ema sira nebe liu housi neba  doko sira nia ulun hodi hateten aat Nia: “O sei sobu Maromak nia templu, no harii fali nia iha loron tolu nia laran; ³⁰soi  O nia An ba, hodi tun housi krus!” ³¹Nune’e mos, amlulik boot sira no eskriba sira hasara Nia dehan: “Nia soi ema seluk: Nia rasik la bele soi an! ³²Kristu, liurai Israel nian, tun housi krus ba atu ami bele hare hodi fiar!” Sira na'in rua mos nebe hedi iha krus hamutuk ho Nia hasara Nia.

            ³³Iha loron fahe rua, rai tomak sai nakukun, to'o tuku tolu loraik. ³⁴Iha tuku tolu loraik, Jesus hakilar ho lia maka'as, “Eloi, Eloi. lama sabachtani?” katak, “Ha’u nia Maromak, Ha’u Nia Maromak, tansa Ita husik Ha’u mesak?” ³⁵Rona tiha ne'e, sira balun dehan: “Hare ba, Nia bolu Elias!” ³⁶Sira ida halai hodi habokon hena iha tua sin, hafoin tau ba fafulu ida nia rohan, lolo ba Nia atu hemu hodi dehan: “Husik ba, ita hare Elias sei mai atu hatun Nia ka lae!” ³⁷Jesus, hodi hakilar maka'as, iis kotu. ³⁸Hena templu nian nakles housi leten to'o kraik, fahe rua. ³⁹Senturiaun nebe iha Nia oin, hare Nia iis kotu nune'e dehan: “Tebes, ema ne'e Maromak nia Oan duni!” ⁴⁰Iha mos feto balun nebe hare housi dook. Sira ne'e mak Maria Madalena, Maria, Tiago kiik no Jose nia inan, no Salome, ⁴¹nebe la'o tuir Jesus hodi serbi Nia wainhira Nia sei hela iha Galileia. Iha mos barak seluk tan nebe sa'e hamutuk ho Nia ba Jerusalem.

Ema hakoi Jesus

⁴²Iha loraik, tamba loron ne'e loron atu hadia sasan nian, katak loron molok Sabadu, ⁴³Jose Arimateia, membru Sinedriu ida ho naran boot, mai ho aten berani, koalia ho Pilatos hodi husu Jesus nia isin mate. Jose ne’e mos hein Maromak nia reinu. ⁴⁴Pilatos hakfodak katak Jesus mate ona. Nia bolu senturiaun hodi husu Jesus mate kleur ona duni. ⁴⁵Wainhira nia hatene lo-los housi senturiaun, Pilatos fo Jesus nia isin mate ba Jose. ⁴⁶Jose sosa lensol ida. Nia hatun hodi falun Nia ho lensol ne’e, no hakoi Nia iha rate nebe ke’e tiha iha fatuk. Nia haruka ema duir fatuk ida ba rate  nia odamatan. ⁴⁷Maria Madalena, no Maria, Jose nia inan, hare fatin nebe ema hakoi Jesus.

16

Jesus moris hi’as

            ¹Loron Sabadu liu tiha, Maria Madalena, Maria, Tiago nian, no Salome sosa mina morin atu kose ba Jesus. ²Iha loron uluk semana nian, foin dadersan hela, loron foin sa'e, sira la'o ba rate. ³Sira dehan ba malu, “Se mak sei duir fatuk housi rate nia odamatan ba ita?” ⁴Maibe wainhira sira ba hare, sira hetan katak fatuk ne'e duir tiha ona. Fatuk ne'e boot tebes. ⁵Sira tama iha rate laran no hare mane foinsa’e ida ho hatais mutin, tur iha sorin kuana. Sira tauk. ⁶Nia dehan ba sira, “Imi keta tauk. Imi buka Jesus Nazare nebe ema hedi iha krus? Nia moris hi’as ona; Nia la iha ne'e. Hare ba fatin nebe sira tau Nia. ⁷Maibe la'o ba, fo hatene ba Nia eskolante sira no ba Pedro: Nia sei ba uluk liu imi iha Galileia. Imi sei hare Nia iha neba, nudar Nia dehan nanis ba imi.” ⁸Sira halai housi rate, nakdedar no bilan teb-tebes. Sira la dehan ne’e ba ema ida tamba sira tauk.

Jesus mosu ba Maria Madalena

            ⁹Moris hi’as tiha ona iha dadersan loron uluk semana nian, Jesus mosu uluk knanain ba Maria Madalena, ida housi nebe Nia duni sai diabu na'in hitu. ¹⁰Tuir mai, feto ne'e fo hatene ba sira nebe la'o hamutuk ho Nia; sira ne'e laran nakraik hodi tanis. ¹¹Sira rona katak Jesus moris ona no Maria hare Nia, maibe sira la fiar.

Jesus mosu ba Nia eskolante sira

            ¹² Buat hirak ne’e hotu tiha, Jesus mosu mos ho lalenok seluk ba ema na'in rua nebe la'o dau-daun ba to’os. ¹³Sira ne'e fo hatene ba sira seluk, maibe sira la fiar mos sira ne'e. 

Jesus mosu ba eskolante sanulu resin ida

            ¹⁴Ikus mai, wainhira sira sanulu resin ida tur dau-daun iha meja, Nia mosu hodi si’ak sira nia fiar laek no ulun fatuk tos, basa sira la fiar sira nebe hare Nia moris hi’as ona. ¹⁵Nia dehan ba sira, “La’o ba mundu tomak ba, haklaken liafuan diak ba buat hot-hotu. ¹⁶Ema nebe fiar no simu baptismu sei hetan maksoin; maibe ema nebe la fiar sei hetan todan. ¹⁷Sinal sira nebe sei hela ho sira nebe fiar mak ne'e: hodi Ha’u nia naran sira sei duni sai diabu sira; sira sei koalia lia mesak foun oi-oin; ¹⁸sira sei kaer samea sira; sira hemu karik buat moruk no lanuk ruma, sira sei la hetan susar ida. Sira sei tau liman ba ema moras sira, no sira ne'e sei hetan isin diak fali.

Jesus sa'e ba lalehan

            ¹⁹Na’i Jesus koalia hotu tiha ba sira, Nia sa'e ba lalehan hodi hatodan An iha Maromak nia kuana. ²⁰Hafoin sira sai hodi haklaken liafuan diak iha fatin hot-hotu. Na’i fo tulun ba sira no hametin sira nia liafuan ho milagre oi-oin.