MATEUS

Jesus Nia bei ala sira

¹Jesus Kristu nia bei ala sira housi David to'o Abraao mak ne'e: ²Abraao mak Isaac nia aman; Isaac Jacob nia aman; Jacob mak Juda ho nia alin sira nia aman. ³Juda ho Tamar mak Fares no Zara nia aman no inan, Fares mak Esron nia aman; Esron Aram nia aman, ⁴Arao mak Aminadab nia aman; Aminadab Naasson nia aman; Naassao Salmon nia aman. ⁵Salmon ho Raab mak Booz nia aman no inan; Booz ho Rut mak Obed nia aman no inan; Obed mak Jesse nia aman; ⁶Jesse mak liurai David nia aman.

David, ho Urias nia fen, mak Salomao nia aman no inan. ⁷Salomao mak Roboao nia aman; Roboao Abias nia aman; Abias Asa nia aman. ⁸Asa mak Josafat nia aman; Josafa Jorao nia aman; Jorao Ozias nia aman. ⁹Ozias mak Joatao nia aman; Joatao Acaz nia aman; Acaz Ezequias nia aman. ¹⁰Ezequias mak Manasses nia aman; Manasses Amon nia aman; Amon Josias nia aman. ¹¹Josias mak Jeconias ho nia maun alin sira nia aman, iha tempu dadur nian iha Babilonia.

¹²Liu tiha tempu dadur nian iha Babilonia, Jeconias hetan oan naran Salatiel. Salatiel mak Zorobabel nia aman; ¹³Zorobabel mak Abiud nia aman; Abiud Eliacim nia aman; Eliacim Azor nia aman. ¹⁴Azor Sadoc nia aman; Sadoc Aquim nia aman; Aquim Eliud nia aman; ¹⁵Eliud Eleazar nia aman; Eleazar Matan nia aman; Matan Jacob nia aman; ¹⁶Jacob hetan oan naran Jose, nebe kaben ho Maria. Jesus, nebe ema hanaran Kristu moris housi Maria. ¹⁷Nune'e housi Abraao to'o David, derasaun sanulu resin haat; housi David to'o tempu dadur nian iha Babilonia derasaun sanulu resin haat; no housi tempu dadur nian iha Babilonia to'o Kristu, derasaun sanulu resin haat.

Jesus nia moris

¹⁸Jesus Kristu moris nune'e: ema hakotu ona Maria, Jesus nia inan ba Jose. Molok sira moris hamutuk, Maria ko’us tiha ona hodi Espiritu Santu nia kbiit. ¹⁹Nia laen Jose, nebe ema laran los no lakohi hamoe Maria, hakotu atu husik deit nia. ²⁰Nia hanoin dau-daun buat ne'e, wainhira Na’i nia anju mosu ba nia iha mehi dehan: “Jose, David nia oan, keta tauk simu Maria nudar o nia kaben, basa nia ko’us hodi Espiritu Santu nia kbiit. ²¹Maria sei tur ahi oan mane ida nebe o sei hanaran Jesus, basa Nia mak sei soi povu housi sira sala.” ²²Ne'e hotu mosu atu halo tuir lia nebe Na’i hato'o housi profeta dehan: ²³”Fetoran ida sei ko’us no tur ahi oan mane ida nebe ema sei hanaran ‘Emanuel’, katak 'Maromak ho ita.'” ²⁴Hader tiha housi mehi, Jose halo tuir buat nebe Na'i nia anju haruka hodi simu nia kaben. ²⁵Maski Jose la dauk hamutuk ho nia, Maria tur ahi oan mane ida, nebe nia hanaran Jesus.

Ema matenek sira

¹Jesus moris iha Belem iha rai Judeia iha loron liurai Herodes nian. Ema matenek balun housi lorosa'e to'o ba Jerusalem. ²Sira husu: “Judeu sira nia Liurai nebe foin moris iha los nebe? Ami hare tiha Nia fitun iha lorosa’e no ami mai tuku tur hanai Nia.” ³Rona tiha liafuan hirak ne'e, liurai Herodes hamutuk ho sidade tomak laran taridu teb-tebes. ⁴Nia halibur amlulik boot sira no eskriba sira povu nian hodi husu ba sira Kristu sei moris los iha nebe. ⁵Sira hatan ba nia: “Iha Belem, iha rai Judeia, basa hakerek nanis ona housi profeta: ⁶‘Belem, rai Juda, iha sidade boot sira Juda nian, la'os o mak kiik liu; basa housi o mak sei mosu Na’i Ulun ida nebe sei tau matan Ha'u nia povu Israel.’”

⁷Tuir mai Herodes haruka bolu sub-subar deit ema matenek sira; nia husu di-diak ba sira sa tempu fitun ne'e mosu ba sira.⁸Hafoin nia haruka sira ba Belem dehan: “Imi ba to'ok. Imi sei husu tuir di-diak kona ba Kiik Oan ne'e. Hafoin, hetan tiha nia, imi mai fo hatene ha'u atu ha'u mos bele ba tuku tur adora Nia.” ⁹Rona tiha liurai, sira la'o ona. Fitun nebe sira hare iha lorosa’e la'o uluk sira oin, to'o fatin nebe Kiik Oan hela ba. ¹⁰Hare tiha fitun, sira laran haksolok teb-tebes. ¹¹Tama tiha uma laran, sira hare Kiik Oan ho Nia inan Maria. Sira tuku tur ba rai hodi adora Nia. Loke tiha sira nia rikusoi, sira hasa’e ba Nia sira nia buat ksolok; osan mean, aiben morin no naan horun. ¹²Tan simu lia menon housi mehi katak sira la bele fila hikas ba Herodes, sira fila ba sira rai housi dalan seluk.

Halai ba Egiptu

¹³Sira ba tiha, Na’i nia anju ida mosu ba Jose iha mehi hodi dehan: “Hamriik ba, lori Kiik Oan ho nia inan, halai ba Egiptu hodi hela iha neba to’o ha’u fo hatene ba o, basa Herodes sei buka Kiik Oan ne'e atu oho.” ¹⁴Nia hader iha kalan, lori Kiik Oan ho nia inan, halai ba Egiptu ¹⁵hodi hela iha neba to'o Herodes mate. Nune'e sei sai tuir duni buat nebe Na’i fo sai housi profeta: “Ha'u bolu Ha'u nia Oan housi Egiptu.”

¹⁶Wainhira Herodes hare katak ema matenek sira lohi tiha nia, nia laran nakali teb-tebes; nia haruka oho labarik sira housi Belem no rai besi-besik nia, kiik oan sira tinan rua ba kraik, tuir tempu nebe nia husu housi ema matenek sira. ¹⁷Nune'e sai tuir duni buat nebe profeta Jeremias uluk dehan: ^18“Sira rona lia ida iha Rama: ema halerik no tanis maka'as: Raquel tanis nia oan sira; nia lakohi katak ema fo ksolok ba nia, basa sira la iha ona.”

Fila housi Egiptu

¹⁹Herodes mate tiha, Na’i nia anju ida mosu ba Jose iha Egiptu iha mehi hodi dehan: “Hader tiha, lori fali Kiik Oan ho nia inan ba rai Israel, basa sira nebe buka Kiik Oan ne’e nia moris mate tiha ona.” ²¹Jose hader mai, lori Kiik Oan ho nia inan fila fali ba rai Israel. ²²Maibe, rona tiha katak Arquelau mak ukun iha Judeia iha nia aman nia fatin, Jose tauk atu ba neba. Tuir mehi ida haruka, nia ba rai Galileia, ²³hodi hela iha sidade ida naran Nazare; nune’e sai tuir duni buat nebe profeta sira dehan; “Ema sei hanaran Nia Nazare Oan.”

Joao Baptista, manu ain

¹Iha loron hirak neba Joao Baptista mosu hodi hanorin iha rai fuik maran Judeia nian. ²Nia dehan: “Imi hakribi sala ba; reinu lalehan nian besik dau-daun ona.” ³Ne’e mak buat nebe profeta Isaias dehan: “Lia ida hakilar iha rai fuik maran: ‘Imi hadia Na’i nia dalan, halos nia dalan sira!’” ⁴Joao hatais kuda kamelu fulun, kesi knotak ho futukabun kulit ida; nia han lalaek ho baniben fuik. ⁵Ema sira housi Jerusalem, housi Judeia tomak no housi Jordaun nia sorin-sorin ba hotu buka nia, ⁶hodi hakribi sira sala no simu baptismu housi nia iha Jordaun. ⁷Saduseu no Fariseu barak mai atu simu nia baptismu. Hare tiha sira, nia dehan ba sira: “Samea nia oan sira, se mak hanorin imi halai housi kastigu nebe atu mai dau-daun? ⁸Imi fo fuan ba nebe hatudu katak imi hakribi duni imi nia sala. ⁹Keta bosok imi nia an hodi dehan: ‘Ami nia aman mak Abraao,’ basa ha’u dehan ba imi katak Maromak bele halo fatuk sira ne’e sai Abraao nia oan sira. ¹⁰Ema tau ona baliun ba ai sira nia abut; ai sira nebe la fo fuan diak sei tesi tiha hodi soe ba ahi. ¹¹Ha’u sarani imi ho be, nudar sinal hakribi sala nian. Maibe Ida nebe mai tuir ha’u, maka’as liu ha’u; ha’u la soi atu lori nia sandalias. Nia sei sarani imi ho Espiritu Santu no ahi. ¹²Lafatik iha ona nia liman; Nia sei hamos nia biti hodi halot trigu iha hoka; maibe Nia sei sunu trigu kain iha ahi nebe sei la mate.”

Jesus simu baptismu

¹³Iha tempo neba, Jesus mai housi Galileia to'o Joao iha Jordao atu simu baptismu housi nia. ¹⁴Maibe Joao lakohi hodi dehan: “Ha'u mak atu simu baptismu housi Ita, nusa mak Ita mai buka fali ha'u?” ¹⁵Jesus hatan ba nia dehan: “Husik lai ba, diak duni katak ita halo nune'e atu halo tuir justisa tomak.” Ho ida ne'e, Joao hatan ona. ¹⁶Simu tiha baptismu, Jesus sai housi be; lalehan nakloke no Nia hare Maromak nia Espiritu tun hanesan manu falur ida iha Nia leten. ¹⁷Housi lalehan lia ida dehan: “Ida ne'e mak Ha'u nia Oan doben, nebe fo ksolok mai Ha'u.”

Diabu babeur Jesus

¹Liu tiha ne'e, Espiritu lori Jesus ba rai fuik maran, atu diabu babeur Nia. ²Ba loron haat nulu no kalan haat nulu, Nia hadera an. Ikus mai Nia hamlaha. ³Diabu hakbesik ba Nia hodi dehan: “O Maromak nia Oan karik, haruka fatuk sira ne'e nakfila ba paun.” ⁴Jesus simu: “Hakerek tiha ona: ‘Ema sei la moris deit ho aihan, maibe ho liafuan sira nebe sai housi Maromak futar ibun.’” ⁵Tuir mai diabu lori Nia ba sidade santa, tau Nia iha templu tutun ⁶hodi dehan ba Nia: “O Maromak Oan karik, soe o nia an housi ne'e ba kraik, basa hakerek nanis ona: 'Kona ba O, Nia sei haruka anju sira; sira sei tane O iha sira liman atu O nia ain sira la bele kona fatuk ruma.” ⁷Jesus hatan ba nia: “Hakerek nanis mos ona: ‘O keta babeur Na’i, o nia Maromak.’”

⁸Hafoin diabu lori Nia ba foho aas liu hodi hatudu ba Nia mundu nia reinu hot-hotu ho nia gloria, ⁹hodi dehan ba Nia: “Buat sira ne'e hotu ha'u sei fo ba O, naran O hakneak hodi adora ha'u.” ¹⁰Ho ida ne'e, Jesus dehan ba nia: “Dook tiha, Satanas, basa hakerek ona: 'O sei adora o nia Na’i, o nia Maromak; Nia deit mak o sei hanai.” ¹¹Nune'e, diabu husik tiha Nia, anju sira mai serbi Nia.

Jesus hanorin iha Galileia

¹²Rona tiha katak ema dadur ona Joao, Jesus fila ba Galileia. ¹³Husik tiha Nazare, Nia ba Kafarnaum, sidade besik tasi ibun, rai Zabulon ho Neftali nian, ¹⁴atu sai tuir buat nebe profeta Isaias fo sai tiha ona: ¹⁵“Rai Zabulon, rai Neftali, dalan tasi nian, Jordaun nia sorin ba, Galileia gentiu sira nian; ¹⁶povu nebe horik dau-daun iha nakukun laran hare tiha roman boot ida; naroman mosu ona ba sira nebe hela dau-daun iha nakukun mate nian.” ¹⁷Houri oras ne'e, Jesus hahu hanorin hodi dehan: “Imi hakribi imi sala ba, basa reinu lalehan nian besik dau-daun ona.”

Bolu eskolante sira

¹⁸La'o dau-daun tuir tasi Galileia nian, Nia hare maun alin na’in rua: Simao, nebe ema hanaran Pedro, ho nia alin Andre. Sira soe hela dai ba tasi, basa sira ema peskador. ¹⁹Nia dehan ba sira: “Imi tuir Ha'u mai, Ha'u sei halo imi peskador ema nian.” ²⁰Sira husik kedas dai hodi la'o tuir Nia.

²¹La'o uitoan ba oin, Nia hare maun alin na’in rua seluk: Tiago, Zebedeu nia oan, ho nia alin Joao. Sira hadia hela dai iha ro laran hamutuk ho sira nia aman Zebedeu. Nia bolu sira. ²²No sira, husik kedas ro ho sira nia aman, tuir Nia.

Haklaken evangeliu no fo isin diak

²³Hafoin Nia hahu la'o lemo Galileia tomak hodi hanorin iha sira nia sinagoga sira, haklaken liafuan diak reinu nian no fo isin diak ba moras sira iha povu nia le’et. ²⁴Nia naran boot iha rai Siria tomak. Sira lori ba Nia ema sira hotu nebe terus housi moras no susar oi-oin, sira nebe diabu tama iha laran, sira nebe moras bibi mate no sira nebe isin mate; Nia fo isin diak ba sira.²⁵Ema lubun boot tuir Nia housi Galileia, housi Dekapole, housi Jerusalem, housi Judeia, no housi Jordaun nia sorin balun ba.

Liafuan ksolok sira nian.

¹Hare tiha ema lubun boot, Jesus sa'e ba foho ida. Wainhira Nia tur tiha, eskolante sira hakbesik ba Nia. ²Nia hahu hanorin sira hodi dehan: ^3“Ksolok ba ema sira nebe kiak iha laran, basa reinu lalehan sira nian. ⁴Ksolok ba sira nebe tanis, basa sira sei hetan ksolok; ⁵ksolok ba sira nebe laran kmaus, basa sira sei simu rai nudar liman rohan. ⁶Ksolok ba sira nebe hamlaha no hamrook ba justisa, basa sira sei bosu. ⁷Ksolok ba sira nebe laran luak, basa sira sei hetan laran luak. ⁸Ksolok ba sira nebe laran mos, basa sira sei hare Maromak. ⁹Ksolok ba sira nebe harii dame, basa ema sei hanaran sira Maromak oan. ¹⁰Ksolok ba sira nebe ema fo terus tan buka justisa, basa reinu lalehan sira nian. ¹¹Ksolok ba imi wainhira, tamba Ha'u, ema hateten aat imi, duni imi no bobar lia bosok hasouru imi.¹²Haksolok ba, foti neon ba, basa imi nia kolen boot liu iha lalehan; basa nune'e mos mak sira duni profeta sira nebe mai uluk liu imi.”

Eskolante sira nia knaar.

^13“Imi masin rai nian, maibe masin lakon karik nia mer, oin sa los mak sei hamer fali nia? Nia la soi ona ba buat ida; masin ne’e soi deit atu soe ba liur atu ema sama nia. ¹⁴Imi mundu nia roman. Sidade nebe harii iha foho leten la bele subar an. ¹⁵Ema la sunu lakan ahi oan hodi tau iha okos, maibe tau iha ahi oan fatin atu leno ema hotu iha uma laran. ¹⁶Nune’e, imi nia roman sei nabilan mos hanesan ne'e iha ema sira oin, atu sira hare imi nia hahalok diak sira no hahi imi nia Aman iha lalehan.”

Ukunfuan tuan no foun

^17“Imi keta hanoin katak Ha'u mai atu halakon tiha ukunfuan no profeta sira; Ha'u mai la'os atu halakon, maibe atu halo tuir lolos. ¹⁸Tebes, Ha'u dehan ba imi: maski lalehan no rai lakon, ukunfuan nia baluk ida mos sei la lakon, sei kumpri hotu. ¹⁹Ne'e duni, ema nebe la halo tuir ukunfuan sira ne'e ida, maski kiik liu, hodi hanorin nune'e ba ema, ema sei hanaran nia sei kiik liu iha reinu lalehan. Maibe ema nebe halo tuir hodi hanorin mos ema seluk, ema sei hanaran nia boot iha reinu lalehan. ²⁰Basa ha'u dehan ba imi katak imi nia justisa la boot liu eskriba no fariseu sira nian karik, imi sei la tama iha reinu lalehan.”

²¹“Imi rona katak uluk ema dehan ba ita nia bei ala sira: ‘Keta oho; no ema sei tesi lia ba ida nebe oho.’ ²²Ha'u fali dehan ba imi; ‘Ema nebe laran nakali hasouru nia maun alin sira, ema sei tesi lia hasouru nia; ema nebe dehan ba nia maun alin: ‘beik’ sei hatan iha Sinedriu; no ema nebe dehan ‘bulak’ sei trus iha ahi infernu nian.’ ²³Ne'e duni, wainhira o atu hasa'e o nia buat karan iha altar no hanoin fali iha neba katak o nia maun alin iha buat ruma hasouru o, ²⁴husik lai o nia buat karan iha altar oin hodi ba uluk dame malu ho nia, hafoin mai hasa'e o nia buat karan. ²⁵Buka dame malu lalais ho ema nebe kontra o wainhira imi la'o hamutuk ba tribunal; lae karik, nia bele saran o ba juiz, juiz saran fali o ba guarda, no guarda hatama o ba kadeia. ²⁶Tebes, Ha'u dehan ba o, o sei la sai housi neba to'o o selu hotu.”

²⁷“Imi rona ema dehan; ‘O keta sala ho ema nia kaben.’ ²⁸Maibe Ha'u dehan ba imi; ‘Ema nebe hateke ba feto ida hodi kaan nia, nia halo ona sala foer ho nia iha nia laran.’ ²⁹Ne'e duni o nia matan los lori o ba sala karik, losu tiha nia hodi soe ba dook; lakon o nia matan ida diak liu fali monu ba infernu ho o nia isin lolon tomak.”

^30“O nia liman los mak lori o ba sala karik, tesi tiha nia hodi soe ba dook; lakon o nia liman ida diak liu fali monu ba infernu laran ho isin lolon tomak. ³¹Ema uluk dehan tan: ‘Ema nebe soe nia feen, sei fo surat soe malu nian ba nia.’ ³²Maibe Ha'u dehan ba imi: ‘Ema nebe soe nia feen, la’os tan sala foer, halo nia feen monu ba adulteriu, no ema nebe hola feto nebe ema soe tiha, nia mos halo adulteriu.’”

^33“Imi mos rona uluk ema dehan ba bei ala sira: ‘Keta jura falsu, maibe halo tuir juramentu nebe o jura iha Na’i.’ ³⁴Maibe Ha'u dehan ba imi: ‘Imi la bele jura kona ba buat naran ida. Keta jura hodi lalehan basa ne’e Maromak nia kadunan; ³⁵keta jura hodi rai, basa ne’e Na’i nia sama fatin; keta jura mos hodi Jerusalem, basa nia Liurai boot nia sidade. ³⁶Keta jura hodi o nia ulun, basa o la bele halo o nia fuuk lahan ida sai mutin ka metan. ³⁷Maibe imi sei koalia hanesan ne'e: Nune'e, nune'e; la nune'e, la nune'e. Liu fali ne'e, mai housi ida nebe aat.’”

^38“Imi rona ema uluk dehan: ‘Matan selu ho matan, nehan selu ho nehan.’ ³⁹Maibe Ha'u dehan ba imi: ‘Keta simu hasouru ema aat. Ema ruma basa karik o nia hasan los, se'e tan o nia hasan karuk ba nia. ⁴⁰Ema ruma hakarak haksesuk malu ho o atu hadau o nia faru karik, fo tan o nia tais ba nia. ⁴¹Ema ruma obriga karik o atu la'o kilometru ida, la'o ho nia kilometru rua ba. ⁴²Fo ba ema nebe husu, keta fila kotuk ba ida nebe hakarak impresta buat ruma.”

Domin ba funubalun sira

^43“Imi rona ema uluk dehan: ‘Hadomi o nia maluk, rai odi hasouru o nia funubalun.’ ⁴⁴Ha'u fali dehan ba imi: ‘Hadomi imi nia funubalun sira, harohan ba sira nebe hanehan imi, ⁴⁵atu imi sai imi Aman iha lalehan nia oan sira. Basa Nia halo loron sa’e ba ema aat no ba ema diak, halo mos udan ben tun ba ema laran los no ba ema laran la los. ⁴⁶Basa imi hadomi karik ema nebe hadomi imi, imi sei simu kolen nebe? Publikano sira mos halo nune’e. ⁴⁷Imi kumprimenta deit imi nia maun alin sira, imi halo buat foun sa ida? Ema gentiu sira mos la halo hanesan ne'e? ⁴⁸Ne’e duni, imi sai diak los ba, hanesan imi nia Aman iha lalehan diak los.’”

Fo esmola oin sa

^1“Hare katak imi la halo buat diak iha ema sira oin atu sira hare imi. Imi halo nune'e karik, imi sei la simu imi nia kolen housi imi nia Aman lalehan. ²Ne'e duni, wainhira o fo esmola, keta hu’u karau dikur iha o nia oin, hanesan ema laran makerek sira halo iha sinagoga ka iha dalan atu ema hahi sira. Tebes, Ha'u dehan ba imi, sira simu ona sira nia kolen. ³Maibe, wainhira o fo esmola, o nia liman karuk la bele hatene o nia liman los halo sa, ⁴atu ema ida la bele hatene o nia esmola, no o nia Aman nebe hare buat subar, sei fo o nia kolen.”

Harohan oin sa

⁵“Wainhira imi reza, keta halo hanesan ema laran makerek sira nebe gosta harohan hodi hamriik iha sinagoga sira no iha prasa. Tebes, Ha'u dehan ba imi, sira ne’e simu ona sira nia kolen. ⁶Maibe, wainhira o harohan, tama iha o nia kuartu laran, taka odamatan hodi harohan sub-subar ba o nia Aman, basa Nia nebe hare buat nebe subar, sei fo o nia kolen. ⁷Wainhira imi reza, keta koalia barak hanesan gentiu sira; sira hanoin katak ho sira nia liafuan bar-barak, Na’i sei rona sira. ⁸Keta halo hanesan sira basa imi nia Aman hatene buat nebe imi kuran molok imi husu ba Nia. ⁹Ne'e duni, harohan nune'e ba: ‘Ami Aman iha lalehan, halo Ita naran sai santo. ¹⁰Halo Ita nia reinu to'o mai ami; halo tuir Ita nia hakarak ba iha rai nudar iha lalehan. ¹¹Haraik aihan loron loron nian mai ami. ¹²Haraik perdua ba ami nia tusan, nudar ami perdua sira nebe iha tusan ho ami. ¹³Keta husik ami monu ba tentasaun, maibe hasai ami housi buat aat.

¹⁴Basa imi perdua karik ema sira nia sala, imi Aman iha lalehan mos sei perdua imi nia sala sira. ¹⁵Maibe imi la perdua karik ema seluk, imi nia Aman mos sei la perdua imi nia sala sira.”

Hadera an oin sa

¹⁶“Wainhira imi hadera an, keta oin nakraik, hanesan ema laran makerek sira, nebe halo sira oin la diak atu ema hare katak sira hadera an. Tebes, Ha'u dehan ba imi katak ema sira ne'e simu ona sira nia kolen. ¹⁷Maibe wainhira o hadera an, tau mina morin ba o ulun, no fase o nia oin, ¹⁸atu ema la bele hatene katak o hadera an; o nia Aman deit nebe subar hela mak hatene; nune'e o nia Aman, nebe hare buat nebe naksubar, sei fo o nia kolen.”

Maromak no rikusoi

¹⁹“Imi keta halot rikusoi iha rai, nebe ular no ferujem han mohu no na'okten sira sobu hodi na'ok. ²⁰Maibe imi halibur ba imi an rikusoi iha lalehan, iha nebe ular no ferujem la hamohu ira, na'okten sira mos la sobu hodi na'ok. ²¹Basa iha fatin nebe o nia rikusoi hela, o nia fuan mos sei hela iha neba. ²²O nia isin nia ahi oan mak o nia matan; o nia matan diak karik, o nia isin tomak sei nabilan. ²³Maibe o nia matan aat karik, o nia isin tomak sei iha nakukun. Ne'e duni, roman nebe iha o laran nakukun karik, nakukun ne'e sei sai boot duni! ²⁴Ema ida la bele serbi ba na’i ulun rua, basa nia sei rai odi hasouru ida hodi hadomi ida seluk, ka nia sei serbi ida hodi hakribi ida seluk. Imi la bele serbi hamutuk Maromak no osan.”

Maromak tau matan

²⁵“Tan ne'e Ha'u dehan ba imi: keta hanoin resin kona ba imi nia moris, atu han ka hemu sa ida; ka ba imi nia isin lolon, atu hatais sa ida. Moris la folin liu fali hahan no isin lolon liu fali hatais? ²⁶Hare manu sira iha lalehan ba: sira la kuda, la silu batar ka halot iha hoka; no imi nia Aman iha lalehan fo han sira. Imi la folin barak liu fali sira? ²⁷Imi ida nebe mak hodi hanoin barak, bele hanaruk nia isin sasukat ida tan?”

²⁸“Tan sa imi hanoin resin kona ba hatais? Hare ba aifunan liriu sira nebe moris iha rai. Sira la serbisu, mos la souru tais. ²⁹Maibe, Ha'u dehan ba imi katak Salomao mos iha nia kmanek wa’in tomak la hatais hanesan sira ne'e ida. ³⁰Ne'e duni, Maromak fo hatais karik hanesan ne'e ba du’ut rai ninian nebe ohin iha no aban ema sei soe ba ahi, Nia sei la fo hatais liu tan ba imi, ema nebe fiar kiik?”

³¹“Ne'e duni, keta laran taridu ba hodi dehan: ‘Ita sei han ka hemu, ka hatais los sa ida? ³²Gentiu sira buka buat sira ne'e hotu. Maibe imi nia Aman lalehan hatene katak imi kuran sira ne’e. ³³Ne’e duni, buka uluk knanain Maromak nia reinu ho nia justisa; buat hirak ne’e sei fo tan ba imi. ³⁴Ne'e duni keta hanoin resin kona ba loron aban, basa loron aban sei hanoin nia susar rasik. Ba loron ida, to’o ona nia todan.”

Hanoin aat ema

¹“Keta hanoin aat ema, atu ema la bele hanoin aat imi. ²Basa imi hanoin aat ema karik, mak ema mos sei hanoin aat imi: imi sukat ema nune’e, nune’e mos mak ema sei sukat imi. ³Tansa o hare du’ut lahan iha o nia maluk nia matan laran, maibe la hare aikabelak iha o rasik nia matan laran? ⁴Oin sa o bele dehan ba o nia alin: ⁵‘Husik ha'u hasai du’ut lahan housi o nia matan laran,’ wainhira aikabelak sei hela iha o rasik nia matan laran? Laran makerek, hasai uluk knanain aikabelak housi o nia matan laran, hafoin mak o sei hare hodi hasai du’ut lahan housi o nia maluk nia matan laran.”

⁶“Keta fo buat nebe santu ba asu sira. Keta soe imi nia fatuk murak ba fahi sira; lae karik, sira ne'e sei sama imi nia fatuk murak, hafoin fila hasouru imi hodi tata les imi.”

Orasaun nia folin boot

⁷“Husu ba, imi sei simu; buka ba, imi sei hetan: tuku odamatan ba, odamatan sei nakloke ba imi. ⁸Basa ema nebe husu sei simu; ema nebe buka sei hetan; no ba ema nebe baku odamatan, odamatan sei nakloke ba nia. ⁹Imi ida nebe, wainhira nia oan husu paun, sei fo fatuk ba nia? ¹⁰Ka, wainhira husu ikan, sei fo samea ida ba nia? ¹¹Ne'e duni, imi sira nebe aat hatene fo buat diak ba imi nia oan sira, liu tan mak imi nia Aman iha lalehan sei la fo buat diak ba sira nebe husu ba Nia!”

¹²“Ne'e duni, buat hotu nebe imi hakarak ema halo ba imi, imi mos halo ba sira; basa ne'e mak ukunfuan no Profeta sira.”

Dalan rua

¹³“Tama housi odamatan kloot ba; basa odamatan boot no dalan luan mak lori ema atu lakon an, no ema barak liu housi nia. ¹⁴Maibe odamatan kloot tebes no dalan kiik duni mak lori ema ba moris, no ema uitoan deit mak hetan nia.”

Profeta bosok sira

¹⁵“Imi matan moris ba kona ba profeta bosok sira nebe mosu ba imi hodi hatais bibi kulit, maibe iha laran, sira mesa asu fuik nebe kaanten. ¹⁶Imi sei hatene sira housi sira nia fuan. Ema bele ku'u uvas housi aitarak, ka figueira housi du’ut aat? ¹⁷Lolos, ai hotu nebe diak fo fuan diak, no ai nebe aat fo fuan aat. ¹⁸Ai diak la bele fo fuan aat, no ai aat la bele fo fuan diak. ¹⁹Ema sei tesi tiha ai sira nebe la fo fuan diak hodi soe sira ba ahi. ²⁰Ne'e duni, housi sira nia fuan mak imi sei hatene sira.”

Eskolante diak los

^21“La’os ema hotu nebe dehan mai Ha’u: ‘Na’i, Na’i!’ sei tama iha reinu lalehan, maibe nia deit nebe halo tuir Ha’u Aman iha lalehan nia hakarak. ²²Ema barak sei dehan mai Ha’u iha loron neba: ‘Na’i, Na’i, la’os hodi Ita Boot nia naran mak ami si’ik nudar profeta, no hodi Ita naran mak duni sai tiha diabu sira, no mos halo milagre barak?’ ²³Iha oras neba Ha’u sei hatan mo-mos ba sira: ‘Ha’u la hatene imi; hadook an tiha housi Ha’u, imi sira nebe halo aat.’”

²⁴“Ne’e duni, ema nebe rona Ha’u nia liafuan hirak ne’e hodi moris tuir, nia hanesan ema matenek nebe harii nia uma iha fatuk leten; ²⁵udan tau, mota tun, anin hu’u hasouru uma ne’e, maibe uma la monu basa hamriik iha fatuk leten. ²⁶Maibe, ema nebe rona Ha’u nia liafuan hirak ne’e, no la halo tuir nia, nia hanesan ema beikten nebe harii nia uma iha rai henek leten. ²⁷Udan tau, mota tun, anin hu’u hasouru hodi sobu uma ne’e; uma ne’e monu. Nia rahun aat liu.”

²⁸Wainhira Jesus koalia hotu tiha, ema lubun hakfodak ho nia doutrina, ²⁹basa Nia hanorin sira hanesan ema nebe iha kbiit, la’os hanesan eskriba no fariseu sira.

8

Ema moras lepra hetan diak

¹Wainhira Nia tun housi foho, ema lubun boot ida la’o tuir Nia. ²Iha oras neba, ema moras lepra ida mai monu iha nia oin hodi dehan ba Nia: “Na’i, Ita boot hakarak karik, bele hamos atan oan.” ³Jesus lolo liman, kona nia dehan: “Ha’u hakarak, sai mos ba!” Iha oras neba kedas nia moras lakon. ⁴Maibe Jesus hateten ba nia: “Keta haktuir ne’e ba ema ida, maibe ba hatudu an ba amlulik hodi hasa’e buat karan nebe Moises haruka nudar sasin ba sira.”

Senturiaun nia atan

⁵Tama tiha iha Kafarnaum, senturiaun ida hakbesik ba Nia hodi harohan: ⁶“Na’i, ha’u nia atan toba iha uma, isin mate, terus aat liu.” ⁷Jesus dehan ba nia; “Ha’u sei ba fo isin diak ba nia.” Senturiaun simu fali ⁸“Na’i, ha’u la soi katak Ita boot tama iha ha’u nia uma laran, maibe Ita boot koalia liafuan ida deit, ha’u nia atan sei hetan fali isin diak; ⁹basa ha’u mos tuir sira nebe ukun ha’u, no mos iha soldadu sira nebe tuir ha’u. Ha’u dehan ba ida, ‘O ba,’ nia ba; ba ida seluk, ‘Halo ne’e,’ nia halo.” ¹⁰Rona tiha nia, Jesus hakfodak hodi dehan ba sira nebe tuir Nia: “Tebes, Ha’u dehan ba imi, Ha’u seidauk hetan ema ida ho fiar boot hanesan ne’e iha Israel. ¹¹Ha’u dehan ba imi katak ema barak sei mai housi lorosa’e no loromonu tur iha meja ho Abraao, Isaac no Jacob iha reinu lalehan nian; ¹²maibe ema sei soe reinu nia oan sira ba nakukun iha liur, iha neba sira sei tanis hodi ruun nehan.” ¹³Hafoin Nia dehan ba senturiaun: “La’o ona ba, buat hotu sei sai tuir o nia fiar.” Iha duni oras neba, atan hetan fali isin diak.

Pedro nia banin feto

¹⁴Tuir mai, Jesus tama iha Pedro nia uma no hare Pedro nia banin feto moras isin manas, toba hela. ¹⁵Wainhira Jesus kaer nia liman, isin manas husik kedas nia. Nia hamriik hodi hahu serbi nia.

¹⁶Iha loraik, sira lori mai to’o Nia ema barak ho diabu iha laran. Nia duni sai diabu sira ho Nia liafuan hodi fo isin diak ba sira hotu nebe moras. ¹⁷Nune’e halo tuir duni buat nebe profeta Isaias dehan: ‘Nia sei simu ita nia moras hodi lori ita nia moras.’ ¹⁸Hare tiha ema lubun boot hale’u Nia, Jesus haruka atu hakat liu ba tasi sorin balun ba.

Atu tuir Jesus, husik buat hotu

¹⁹Eskriba ida mai hasouru Nia dehan: “Mestre, ha’u sei tuir Ita ba fatin hotu nebe Ita ba.” ²⁰Jesus dehan ba nia; “Laku sira iha kuak, manu sira lalehan nian iha knuuk iha; maibe Oan Mane la iha fatin atu sadere nia ulun.”

²¹Eskolante ida fali hateten ba Nia: “Na’i, husik ha’u ba uluk lai hakoi ha’u nia aman.” ²²Maibe Jesus hatan ba nia: “O mai tuir Ha’u ba; husik mate sira hakoi sira nia mate.”

Tasi boot sai hakmatek

²³Tuir mai Jesus sa’e ba ro hamutuk ho Nia eskolante sira. ²⁴Teki-teki, tasi hahu si’ak maka’as, laloran tama makaas iha ro laran, maibe Nia toba dukur hela. ²⁵Eskolante sira hakbesik hodi fanu Nia dehan: “Na’i, soi ami, ami atu mate.” ²⁶Jesus dehan ba sira: “Tansa imi tauk, imi sira fiar kiik?” Hafoin Nia hamriik hodi siak anin ho tasi, no buat hotu sai hakmatek. ²⁷Sira hakfodak hodi dehan: “Ema ne’e se los, nebe anin ho tasi mos halo tuir deit.

Ema sira ho diabu iha laran sai diak fali

²⁸To’o tiha sorin balun ba, iha rai Gadara, ema na’in rua ho diabu iha laran mai housi rate hasouru Nia. Sira si’ak la diak, halo ema ida la bele liu housi dalan neba. ²⁹Teki-teki sira hakilar. “Iha sa ida ho O no ami, Jesus, Maromak Oan? O mai iha ne’e atu halo ami terus molok nia tempu?”

³⁰Besik iha neba fahi lubuk ida han du’ut dau-daun. ³¹Diabu sira husu ba Nia: “O duni sai ami karik, haruka ami tama ba fahi sira neba.” ³²Nia dehan ba sira: “Tama ba!” Sira sai no tama ba fahi sira laran; sira ne’e haksoit housi rai tatinis ba tasi hodi mate hotu iha be laran. ³³Fahi atan sira halai ba sidade hodi haktuir buat hotu ne’e, no mos kona ba buat nebe mosu ba ema nebe iha diabu iha laran. ³⁴Sidade tomak sai mai hasouru Jesus. Wainhira sira hare Nia, sira husu Nia atu husik sira nia rai.

9

Ema moras isin mate hetan diak

¹Sa’e tiha ro ida, Jesus hakur tasi hodi to’o ba ninia sidade. ²Sira hatudu ba Nia ema isin mate ida, toba hela iha tobafatin ida. Hare tiha sira nia fiar, Jesus dehan ba ema moras ne’e: “Oan, aten berani ba, o nia sala sira hetan ona perdua.” ³Eskriba sira balun dehan iha sira nia laran: “Ema ne’e hateten aat Maromak” ⁴Hatene tiha sira nia hanoin, Jesus dehan ba sira: “Tansa imi hanoin aat iha imi nia laran? ⁵Ida nebe mak lalais liu atu dehan: ‘O nia sala sira hetan tiha perdua,’ ka dehan ‘O hamriik, la’o ba’? ⁶Diak, atu imi hatene katak iha rai ne’e Oan Mane iha kbiit atu kasu sala,” Nia dehan ba ema isin mate: “Hamriik ba, foti o nia hadak, la’o ba o nia uma.” ⁷Nia hamriik hodi la’o ba nia uma. ⁸Hare tiha ne’e, ema lubun tauk tebtebes hodi hasa’e gloria ba Maromak nebe fo kbiit ida hanesan ne’e ba ema sira.

Jesus bolu Mateus

⁹Sai tiha housi neba, Jesus hare ema ida naran Mateus, tur hela iha fatin kobra impostu nian hodi dehan ba nia: “Tuir Ha’u mai!” Nia hamriik hodi tuir Jesus. ¹⁰Jesus tur hela iha uma laran, ema publikanu no maksalak barak mai tur ho Nia, hamutuk ho nia eskolante sira. ¹¹Hare tiha ne’e, fariseu dehan ba eskolante sira: “Nusa mak imi nia Mestre han hamutuk ho publikanu no maksalak sira?” ¹²Rona tiha sira, Jesus dehan: “La’os sira nebe isin diak mak kuran doutor, maibe sira nebe moras. ¹³Imi buka hatene liafuan ne’e katak sa: ‘Ha’u hakarak laran luak, la’os sakrifisiu.’ Basa Ha’u mai la’os atu bolu ema los sira, maibe ema maksalak sira.”

¹⁴Liu tiha ne’e, Joao nia eskolante sira hakbesik ba Nia dehan: “Tansa mak ami ho fariseu sira hadera an, maibe o Nia eskolante sira lae?” ¹⁵Jesus hatan ba sira: “Noivu nia belun sira bele laran susar wainhira noivu sei hela ho sira? Loron sei to’o mai wainhira ema sei hasai noivu housi sira le’et; iha loron ne’e mak sira sei hadera an.”

¹⁶“Ema ida la bele taka hena tuan nia kuak ho hena foun, basa hena foun les hena tuan, halo kuak sai boot liu. ¹⁷Ema la tau tua foun iha kusi kulit tuan; lae karik, kusi kulit nakfera, tua nakfakar no kusi kulit aat hotu. Tau tua foun iha kusi kulit foun; nune’e buat rua ne’e la lakon.”

Feto moras ran suli sai. Jairo nia oan feto.

¹⁸Wainhira Jesus koalia dau-daun ba sira, nai ulun ida hakbesik ba Nia hodi monu ain iha nia oin dehan: “Ha’u nia oan feto foin mate; maibe Ita boot hiit An mai tau liman ba nia, nia sei moris.” ¹⁹Jesus hamriik hodi la’o tuir nia hamutuk ho eskolante sira.

²⁰Iha oras ne’e, feto ida nebe ran suli sai tinan sanulu resin rua ona, hakbesik ba Nia housi kotuk hodi kona nia tais ninin, ²¹basa nia dehan iha nia laran: “Ha’u kona karik nia tais, ha’u sei hetan isin diak.” ²²Fila tiha ba kotuk, Jesus hare nia hodi dehan: “Ha’u nia oan, aten berani ba, o nia fiar soi ona o.” Iha oras ne’e kedas, feto ne’e hetan fali isin diak.

²³Wainhira Nia to’o ba na’i ulun nia uma hodi hare ema hu’u flauta no ema barak seluk book an ba book an mai, Nia dehan; ²⁴“Imi sai tiha, labarik la mate; nia toba deit.” Sira hamnasa Nia. ²⁵Wainhira ema lubun sai ona, Nia tama ba laran, kaer labarik feto nia liman, no labarik feto ne’e hamriik. ²⁶Liafuan kona ba buat ne’e naklekar iha rai tomak neba.

Matan delek rua ho monok ida sai diak

²⁷Jesus sai daudaun housi neba, ema matan delek na’in rua tuir Nia hodi hakilar dehan: “David nia Oan, sadia ami.” ²⁸To’o tiha uma, matan delek sira hakbesik ba Nia. Jesus dehan ba sira: “Imi fiar katak Ha’u bele halo buat ne’e?” Sira hatan ba Nia: “Ami fiar, Na’i!” ²⁹Nia kona sira nia matan dehan: “Sai diak ba tuir imi nia fiar!” ³⁰Sira nia matan nakloke. Jesus hateten ba sira ho lia maka’as: “Keta fo hatene buat ne’e ba ema ida.” ³¹Maibe, sai tiha, sira halo Nia naran sai boot iha rai neba tomak.

³²Sira sai dau-daun, ema lori ba Nia ema monok ida ho diabu iha laran. ³³Nia duni sai diabu, no ema monok ne’e koalia ona. Ema lubun hakfodak hodi dehan: “Ema ida seidauk hare buat ruma hanesan ne’e iha Israel.” ³⁴Maibe fariseu sira dehan: “Hodi diabu sira nia ulun mak Nia duni sai diabu sira.”

To’os boot, maibe to’os atan uitoan

³⁵Jesus la’o lemo sidade ho knua sira hodi hanorin iha sinagoga sira no haklaken liafoun diak reinu nian; fo mos isin diak ba ema moras sira no ba sira hotu nebe terus. ³⁶Hare tiha ema lubun boot, Nia hanoin teb-tebes sira basa sira kole no neon nakraik, hanesan bibi sira nebe bibiatan la iha. ³⁷Tan ne’e Nia dehan ba eskolante sira: “To’os boot duni, maibe serbisu na’in uitoan. ³⁸Ne’e duni imi harohan ba to’os na’in atu haruka serbisu na’in sira ba nia to’os.”

10

Jesus fihir apostolu sira hodi fo knaar ba sira

¹Nia bolu nia eskolante sira na’in sanulu resin rua hodi fo kbiit ba sira atu duni sai espiritu foer sira, no mos atu fo isin diak ba sira hotu nebe terus moras oi-oin. ²Apostolu sira nia naran mak ne’e: ida uluk, Simao nebe ema hanaran Pedro, ho nia alin Andre; Tiago, Zebedeu nia oan, ho nia alin Joao; ³Filipe ho Bartolomeu, Tome ho Mateus publikanu, Tiago, Alfeu nia oan, ho Tadeu, ⁴Simao Kananeu ho Judas Iscariotes, nebe sei saran Nia.

⁵Jesus haruka ema na’in sanulu resin rua ne’e la’o ba hodi hanorin uluk sira dehan: “Keta tuir gentiu sira nia dalan, keta tama iha Samaritanu sira nia sidade, ⁶maibe buka uluk bibi sira nebe lakon housi umakain Israel nian. ⁷Tuir dalan, haklaken ba katak reinu lalehan besik ona. ⁸Halo moras sira hetan isin diak ba, halo mate sira moris hi’as fali ba, halo moras lepra sira sai mos, duni sai diabu sira. Imi simu hodi la selu, fo mos hodi la hein ema selu imi. ⁹Keta lori osan mean, osan mutin eh osan riti iha imi nia futukabun. ¹⁰La bele lori kohe tuir dalan, hatais tahan rua, sandalias, eh aitonka; basa serbisu na’in soi atu simu nia kolen. ¹¹Wainhira imi tama iha sidade ka knua ruma, husu lai ema se mak diak, hodi hela iha neba to’o imi sai. ¹²Wainhira imi tama iha uma ida, kumprimenta nia ba. ¹³Uma ne’e soi karik, imi nia dame sei tun ba sira; nia la soi karik, imi nia dame sei fila ba imi. ¹⁴Ema la simu imi karik eh rona imi nia liafuan, liki rai rahun housi imi nia ain wainhira imi sai housi uma ka sidade ne’e. ¹⁵Tebes, Ha’u dehan ba imi katak iha loron justisa nian, rai Sodoma no Gomorra sira nia kastigu sei la dun todan hanesan sidade ne’e nian.”

Apostolu sira sei hetan susar

¹⁶“Ha’u haruka imi ba hanesan bibi sira iha asu fuik sira le’et. Ne’e duni, matan moris neon na’in ba hanesan samea sira, no mos laran los hanesan manu falur sira. ¹⁷Matan moris ho ema sira. Sira sei lori imi ba sinedriu hodi baku imi iha sira nia sinagoga laran. ¹⁸Sira sei lori hodi kesar imi ba emboot no liurai sira tamba Ha’u, atu imi fo sasin ba sira no ba gentiu sira. ¹⁹Maibe wainhira sira saran imi, keta hanoin resin kona ba sa mak imi sei hatan, eh koalia oin sa; iha oras neba sei haraik ba imi atu dehan sa ida. ²⁰Basa la’os imi mak koalia, maibe imi Aman nia Espiritu mak sei koalia liu housi imi. ²¹Maun sei saran nia alin ba mate, aman sei saran nia oan; oan sira sei foti liman hasouru aman sira hodi oho sira. ²²Ema hotu sei odi imi tan ha’u nia naran; maibe ema nebe hela metin to’o rohan sei hetan maksoin. ²³Wainhira ema hanehan imi iha sidade ida, imi ba sidade seluk. Ha’u dehan ba imi katak molok imi liu housi sidade hotu Israel nian, Oan Mane sei mai ona. ²⁴Eskolante la bele boot liu fali mestre, atan la bele boot liu fali nia na’i. ²⁵Eskolante ida sai hanesan nia mestre to’o ona, no mos ba atan sai hanesan nia na’in. Ema hanaran uma na’in Belzebu karik, oin sa liu tan mak sira sei hanaran sira nebe hela iha nia uma laran! ²⁶Ne’e duni, keta tauk sira ba, basa la iha buat nebe subar hela nebe ema sei la fo sai, eh buat nebe naksubar nebe ema sei la hatene. ²⁷Buat nebe Ha’u dehan ba imi iha nakukun laran, imi sei fo sai iha naroman; buat nebe imi rona sub-subar deit, imi sei haklaken housi uma nia kakuluk leten.”

Tauk deit Maromak

²⁸“Keta tauk ema sira nebe oho isin lolon, maibe la bele oho klamar. Maibe tauk ba ida nebe bele halo lakon isin no klamar hotu iha infernu. ²⁹Manu oan rua la fa’an ba doit ida? Maibe sira ida la monu ba rai wainhira imi Aman la husik. ³⁰Imi nia fuuk iha ulun mos sura hotu. ³¹Ne’e duni, imi keta tauk, basa imi folin liu manu oan barak.”

³²“Ne’e duni, ema nebe fo sasin karik kona ba Ha’u iha ema seluk nia oin, Ha’u mos sei sasin kona ba nia iha ha’u Aman nebe iha lalehan nia oin. ³³Maibe ema nebe nega Ha’u iha ema nia oin, Ha’u mos sei nega nia iha ha’u Aman nebe iha lalehan nia futar oin.”

³⁴“Keta hanoin katak Ha’u mai rai atu lori dame; Ha’u mai atu lori, la’os dame, maibe surik. ³⁵Basa Ha’u mai atu haketak oan mane housi nia aman, oan feto housi nia inan no feto foun housi nia banin feto, ³⁶hodi halo ema nia parenti sira rasik sai ninia funubalun. ³⁷Ema nebe hadomi nia aman ka nia inan liu fali Ha’u, nia la soi Ha’u; no ema nebe hadomi oan mane ka oan feto liu fali Ha’u la soi Ha’u. ³⁸Ema nebe la lori nia krus hodi tuir Ha’u, nia la soi Ha’u. ³⁹Ema nebe hadomi nia moris, sei lakon nia; no ema nebe lakon nia moris tamba Ha’u, sei hetan fali nia.”

⁴⁰“Ema nebe simu imi, simu Ha’u; ema nebe simu Ha’u, simu Ida nebe haruka Ha’u mai. ⁴¹Ema nebe simu profeta ida tan nia profeta, ema ne’e sei simu kolen profeta nian. Ema nebe simu ema los ida tan nia ema los, ema ne’e sei simu kolen ema los nian. ⁴²Ema nebe fo be malirin kopu ida deit mos ba kiik oan sira ne’e ida, tan nia Ha’u eskolante, tebes, Ha’u dehan ba imi: nia sei la lakon nia kolen.”

11

Jesus hahi Joao Baptista

¹Hanorin tiha nia eskolante na’in sanulu resin rua, Jesus sai housi neba atu ba hanorin no haklaken iha sira nia sidade sira. ²Wainhira Joao rona iha kadeia laran kona ba Jesus nia hahalok sira, nia haruka nia eskolante na’in rua atu husu ba Nia: ³“Ita mak ida nebe atu mai ka ami sei hein ema seluk?” ⁴Jesus hatan ba sira: “Haktuir ba Joao ba buat nebe imi hare no rona: ⁵Ema matan delek sira hare; ema ain kudeik sira la’o; ema moras lepra sira sai mos; ema tilun diuk sira rona; mate sira moris fali; liafoun diak haklaken tiha ba ema kiak sira: ⁶no ksolok ba ema nebe la lakon fiar tamba Ha’u.”

⁷Sira ne’e hadook an daudaun, Jesus hahu koalia ba ema lubun kona ba Joao dehan: “Imi ba hare sa ida iha rai fuik maran? Fafulu ruma nebe anin hu’u ba mai? ⁸Imi ba hare sa ida? Ema ida hatais hena mesa furak? Maibe ema sira nebe hatais hena furak hela iha liurai sira nia uma boot. ⁹Ne’e duni, imi ba hare sa ida? Profeta ida karik? Los duni, Ha’u dehan ba imi, liu fali profeta ida. ¹⁰Kona ba nia mak hakerek tiha ona: ‘Ha’u haruka Ha’u nia manu ain atu ba O nia oin hodi hadia dalan ba o.’ ¹¹Tebes, Ha’u dehan ba imi: housi ema sira nebe moris housi feto la iha ida boot liu fali Joao Baptista; maibe ida nebe kiik liu iha reinu lalehan, boot liu fali nia. ¹²Houri Joao Baptista nia loron to’o ohin, ema hadau reinu lalehan hodi kbiit; sira nebe haka’as an liu mak manan nia. ¹³Basa ukunfuan no profeta sira si’ik to’o Joao. ¹⁴Imi hakarak fiar karik, nia mak Elias nebe atu mai. ¹⁵Ema nebe tilun iha, rona ba!”

Ema hakribi Joao no mos Jesus

¹⁶“Ha’u sei tanesan ema derasaun ne’e nian ho se los? Sira hanesan labarik sira nebe tur iha prasa, koalia ba malu, ¹⁷dehan: ‘Ami toka flauta ba imi, imi la bidu; ami hananu babenon, imi la tanis.’ ¹⁸Joao Baptista mai, la han la hemu, sira dehan: ‘Nia iha diabu iha laran.’ ¹⁹Oan Mane mai, han hemu, sira dehan: ‘Nia kaanten, lanuten, publikanu no maksalak sira belun!’ Maibe matenek hatudu an lolos hodi ninia hahalok sira.”

Sidade aat sira sei hetan kastigu

²⁰Ho ne’e, Nia hahu koalia hasouru sidade sira iha nebe Nia halo ona milagre barak liu, tan sira la halo penitensia. ²¹“Susar ba o, Korozain! Susar ba o, Betsaida! Basa milagre sira nebe halo ona iha imi le’et, halo tiha karik iha Tiro no Sidonia, kleur tiha ona mak sira hakribi sala hodi hatais karon no ho ahikdesan. ²²Tan ne’e, Ha’u dehan ba imi katak iha loron justisa nian kastigo ba Tiro no Sidonia sei kmaan liu fali imi nian. ²³O fali, Kafarnaum, o hakarak foti an to’o lalehan? O sei monu to’o inferno! Basa milagre sira nebe halo ona iha o halo tiha karik iha Sodoma, to’o ohin Sodoma sei hamriik hela. ²⁴Tan ne’e, Ha’u dehan ba imi katak iha loron justisa nian kastigo ba Sodoma sei kmaan liu fali o nian.”

Jesus ho Aman

²⁵Iha oras neba Jesus dehan: “Aman, Na’i lalehan no rai nian, Ha’u hahi Ita tan Ita subar tiha buat hirak ne’e ba ema matenek no neon na’in sira hodi hatudu ba kiik oan sira. ²⁶Los duni, Aman, tan Ita hakarak duni nune’e. ²⁷Ha’u Aman tau tiha buat hot-hotu iha Ha’u liman; ema ida la hatene Oan, Aman deit mak hatene; nune’e mos ema ida la hatene Aman, Oan deit mak hatene, no mos ema nebe Oan hakarak hatudu ba nia.”

²⁸“Mai besik Ha’u, imi hotu nebe kole no terus; Ha’u sei fo kmaan ba imi . ²⁹Simu Ha’u nia ukun ba hodi banati tuir Ha’u, tan Ha’u laran kmaus no haraik an; no imi sei hetan hakmatek ba imi nia klamar. ³⁰Basa Ha’u nia ukun mamar, Ha’u nia naha kmaan.”

Silu batar, fo isin diak iha loron Sabadu

¹Iha loron Sabadu ida Jesus liu housi to’os batar ida. Nia eskolante sira hamlaha; tan ne’e sira hahu silu batar hodi han. ²Hare tiha ne’e, fariseu sira dehan ba Nia; “O nia eskolante sira halo dau-daun buat nebe bandu iha loron Sabadu!” ³Nia hatan ba sira: “Imi la le’e buat nebe David halo, wainhira nia hamlaha. Nia ho nia maluk sira? ⁴Oin sa nia tama iha Maromak nia uma hodi han paun sakrifisiu nian, nebe bandu ba nia no ba nia maluk sira; amlulik sira deit mak bele han? ⁵Ka imi seidauk le’e iha Ukunfuan katak amlulik sira iha templu la halo tuir Sabadu, no sira la halo sala ida? ⁶Ha’u dehan ba imi katak iha ne’e iha Ida nebe boot liu templu. ⁷Imi hatene karik lia ne’e katak sa: ‘Ha’u hakarak laran luak, la’os sakrifisiu,’ imi sei la tesi lia todan ba sira nebe sala laek. ⁸Basa Oan Mane mos Sabadu nia Na’in.”

⁹Sai housi neba, Nia liu ba sira nia sinagoga. ¹⁰Iha neba iha ema ida ho liman maran. Sira husu ba Nia; “Bele fo isin diak ba ema moras iha loron Sabadu, ka lae?” Sira husu ne’e atu du’u matak Nia. ¹¹Maibe Nia husu ba sira: “Housi imi sira ne’e, se mak iha karik bibi ida nebe monu ba rai kuak iha loron Sabadu, la ba kaer nia hodi dada sai? ¹²Ema ida nia folin la boot liu bibi ida nian? Ne’e duni, bele halo diak iha loron Sabadu.” ¹³Hafoin Nia dehan ba ema moras: “Lolo o nia liman!” Nia lolo nia liman no liman ne’e sai diak hanesan ida seluk. ¹⁴Sai tiha ba liur, fariseu sira hahu lia tuir malu oin sa atu halakon Nia.

Jesus, Maromak nia Atan

¹⁵Tan hatene ona ida ne’e, Jesus hadook An tiha housi fatin neba. Ema barak tuir Nia no Nia fo isin diak ba sira hotu, ¹⁶hodi hateten ba sira atu la bele fo hatene ba ema ida. ¹⁷Nune’e sai tuir duni buat nebe profeta Isaias dehan nanis: ¹⁸“Ha’u nia atan mak ne’e, nebe Ha’u fihir, Ha’u nia doben nebe haksolok Ha’u nia laran teb-tebes. Ha’u sei tau Ha’u nia Espiritu ba Nia, Nia sei haklaken justisa ba nasaun sira. ¹⁹Nia sei la istori malu ho ema eh hakilar; ema ida sei la rona Nia lia iha dalan sira. ²⁰Nia sei la silu tohar tan fafulu nebe atu tohar ona, sei la hu’u mate kabas ahi oan nian nebe sei suar, to’o Nia atu halo justisa manan. ²¹Iha Nia naran mak nasaun sira sei tau sira nia esperansa.”

Jesus ho diabu

²²Tuir mai, sira lori ba Nia ema matan delek no monok ida nebe diabu tama iha laran. Jesus halo nia diak fali hodi halo nia koalia no hare. ²³Ema hotu hakfodak dehan: “Ema ne’e kala mak David nia Oan.” ²⁴Maibe, rona tiha ne’e, fariseu sira dehan: “Nia duni sai diabu sira hodi Belzebu, diabu sira nia ulun.” ²⁵Tan hatene sira nia hanoin, Jesus hatan ba sira: “Reinu nebe fahe an hodi funu hasouru nia an, reinu ne’e sei mohu. Sidade ka umakain nebe fahe an hodi funu hasouru nia an rasik sei la hamriik metin. ²⁶Ne’e duni Satanas duni sai karik Satanas, nia fahe an hodi funu hasouru nia an rasik: oin sa nia reinu bele hamriik metin? ²⁷Ha’u duni sai karik diabu hodi Belzebu, hodi se los mak imi nia emar sira duni sai diabu sira? Tan ne’e, sira rasik mak sei tesi lia hasouru imi. ²⁸Maibe, Ha’u duni sai karik diabu sira hodi Maromak nia Espiritu, ne’e dehan katak Maromak nia reinu to’o ona iha imi le’et. ²⁹Eh oin sa ema ida bele tama iha ema maka’as nia uma atu na’ok nia rikusoi, wainhira nia la futu lai ema ne’e? Nune’e deit mak nia bele na’ok housi ema ne’e nia uma.”

³⁰“Ema nebe la hamutuk ho Ha’u, nia hasouru Ha’u; no ema nebe la hamutuk ho Ha’u, nia sei namkari”

Lia aat hasouru Espiritu Santu

³¹“Tan ne’e Ha’u dehan ba imi: Sala hotu no lia aat hotu hasouru Maromak bele hetan perdua, maibe ema nebe hateten aat Espiritu Santu sei la simu perdua.. ³²Ema ruma hateten lia hasouru Oan Mane karik, nia sei hetan perdua, maibe ema nebe koalia hasouru Espiritu Santu, nia sei la hetan perdua iha mundu ne’e no mos iha mundu seluk.

³³Aihun diak fo fuan diak, aihun aat fo fuan aat: ema hatene ai housi nia fuan. ³⁴Imi samodok oan sira! Oin sa mak imi bele koalia buat diak, imi nebe aat? Basa ibun fakar sai buat nebe rai hela iha laran. ³⁵Ema nebe diak lori sai buat diak housi nia laran diak, maibe ema aat fakar sai buat aat housi nia laran aat. ³⁶Ha’u dehan ba imi katak ema sira sei hatan iha loron justisa nian kona ba lia folin laek hotu nebe sira dehan. ³⁷Basa, tuir o nia liafuan sira mak o sei hetan kolen eh kastigu.”

Sinal Jonas nian

³⁸Iha oras ne’e eskriba no fariseu balun dehan ba Nia: “Mestre, ami hakarak hare sinal ida housi Ita.” ³⁹Nia hatan ba sira: “Ema laran aat no sala foer na’in husu sinal ida; maibe sei la fo sinal ida ba nia; sei fo deit sinal profeta Jonas nian. ⁴⁰Hanesan Jonas hela iha ikan boot nia kabun laran ba loron tolu no kalan tolu, nune’e mos Oan Mane sei hela iha rai laran ba loron tolu no kalan tolu. ⁴¹Iha loron justisa nian, ema Ninive sira sei hamriik hasouru derasaun ne’e hodi tesi lia todan ba nia, basa sira halo penitensia wainhira sira rona Jonas nia liafuan; maibe iha ne’e iha Ida nebe boot liu fali Jonas. ⁴²Iha loron justisa nian, liurai feto reinu tasi mane nian sei hamriik hasouru derasaun ne’e hodi tesi lia todan ba nia, basa nia mai housi rai ikun atu rona Salomao nia matenek; maibe iha ne’e iha Ida nebe boot liu fali Salomao!”

Diabu fila fali

⁴³“Wainhira espiritu foer sai housi ema ida, nia la’o lemo raifuik maran hodi buka hakmatek, maibe nia la hetan. ⁴⁴Tuir mai, nia dehan: ‘Ha’u sei fila fali ba uma nebe ha’u husik tiha.’ To’o tiha neba, nia hetan uma mamuk, sar mos no aruma di-diak hela. ⁴⁵Tuir mai, nia ba lori espiritu hitu seluk nebe aat liu fali nia. Sira tama iha uma laran hodi hela iha neba, halo ema ne’e sai aat liu uluk nian.”

Jesus nia parenti los

⁴⁶WainhiraNia sei koalia dau-daun ba ema lubun boot, Nia inan ho Nia maun alin sira to’o mai iha liur hodi buka atu koalia ho Nia. ⁴⁷Ema ida dehan ba Nia: “Ita nia inan no Ita nia maun alin sira hakarak koalia ho Ita”. ⁴⁸Jesus hatan ba ida nebe koalia ba Nia: “Se mak Ha’u nia inan, se mak Ha’u nia maun alin sira?” ⁴⁹Hafoin Nia lolo liman ba nia eskolante sira hodi dehan: “Sira ne’e mak Ha’u nia inan no Ha’u nia maun alin sira. ⁵⁰Basa ema hotu nebe halo tuir Ha’u Aman lalehan nia hakarak, ema ne’e mak Ha’u nia maun, Ha’u nia feton no Ha’u nia inan.”

Aiknanoik kona ba ema nebe kari fini

¹Iha loron hirak neba Jesus sai housi uma hodi tur iha tasi ibun. ²Ema barak teb-tebes mai hale’u Nia; tan ne’e Nia tur iha ro ida nia laran, ema lubun boot tur iha tasi ibun. ³Nia hanorin buat barak ba sira ho aiknanoik dehan: “To’os na’in ida ba kari fini iha to’os laran. ⁴Nia kari fini dau-daun, balun monu iha dalan ninin, manu sira mai han. ⁵Fini seluk monu iha fatuk laran iha nebe rai uitoan deit; sira ne’e moris kedas basa rai la dun klean; ⁶maibe loron sa’e, sunu tiha sira tan abut la iha, hafoin sira sai maran. ⁷Fini seluk monu iha aitarak klaran; aitarak sira moris mai, hanehan sira to’o mate. ⁸Fini seluk monu iha rai diak hodi fo fuan: balun dala atus ida, seluk ne’en nulu; seluk fali tolu nulu. ⁹Ema nebe iha tilun, rona ba!”

¹⁰Eskolante sira hakbesik ba Nia dehan: “Tansa Ita koalia ba sira ho aiknanoik? ¹¹Nia hatan ba sira: “Ba imi, Maromak fo hatene tiha misteriu sira reinu lalehan nian maibe ba sira lae. ¹²Basa ba ida nebe iha ona, sei fo tan atu nia iha liu tan; maibe ida nebe la iha, buat uitoan mos nebe nia iha sei hasai tan housi nia. ¹³Tan ne’e mak Ha’u koalia ba sira ho aiknanoik, basa sira hateke dau-daun, maibe la hare; sira se tilun dau-daun maibe la rona, ka hatene los. ¹⁴Nune’e sei sai duni tuir Profeta Isaias nia lia nebe dehan: ‘Imi rona ho tilun, maibe la hatene los; imi hare ho matan, maibe la hare mos. ¹⁵Basa povu ne’e nia laran tos; sira nia tilun diuk no la bele rona; sira fuan la bele hatene los keta sira hakribi sira nia sala hafoin Ha'u halo sira fila ba diak.’ ¹⁶Maibe ksolok ba imi nia matan basa sira hare; no ba imi nia tilun basa sira rona. ¹⁷Tebes, Ha'u’dehan ba imi katak profeta no ema diak barak hakarak teb-tebes hare buat nebe imi hare dau-daun, maibe la hare; no rona buat nebe imi rona, maibe la rona.”

¹⁸“Ne’e duni imi rona di-diak aiknanoik kona ba ema nebe kari fini iha to’os. ¹⁹Fini nebe monu iha dalan ninin hanesan ema nebe rona liafuan reinu nian maibe la hatene lolos. Ida nebe aat mai, no hasai buat nebe kuda tiha iha ema nia laran, ²⁰Fini nebe monu iha fatuk laran mak ida nebe rona liafuan hodi simu kedas ho ksolok. ²¹Maibe tan abut la iha, nia mate lalais; hetan tiha susar eh terus tamba liafuan, nia monu kedas. ²²Fini nebe monu iha aitarak laran mak ida nebe rona liafuan maibe knaar sira no rikusoi mundu ne’e nian hanehan liafuan ne’e; halo nia la fo fuan. ²³Fini nebe monu iha rai diak mak ida nebe rona liafuan hodi hanoin di-diak: ida ne’e fo fuan dala atus ida, ka ne’en nulu, ka tolu nulu.”

Aiknanoik du’ut aat nian

²⁴Nia dehan tan aiknanoik ida ba sira: “Reinu lalehan nian hanesan ema ida nebe kuda fini diak iha nia to’os; ²⁵maibe wainhira nia emar sira toba dau-daun, nia funubalun mai kuda du’ut aat iha trigu le’et, hafoin nia ba tiha. ²⁶Wainhira trigu sai boot tiha hodi fo fuan, du’ut aat mos mosu. ²⁷To’os na’in nia atan sira mai buka nia hodi dehan ba nia: ‘Na’i, ita boot la kuda fini diak iha ita nia to’os? Du’ut aat mai housi nebe?’ ²⁸Nia hatan: ‘Ha’u nia funubalun ruma mak halo buat ne’e.’ Atan sira dehan ba nia: ‘Ita boot hakarak ami ba fokit tiha nia?’ ²⁹ ‘Lae,’ nia dehan, ‘keta halo be hodi fokit du’ut aat, imi fokit mos trigu. ³⁰Husik sira rua moris hamutuk ba; loron ko’a hare nian to’o mai mak ha’u sei dehan ba to’os atan sira: ‘Hili uluk du’ut aat ba hodi futu hamutuk atu sunu; trigu fali, halot tiha iha ha’u nia hoka.’”

Aiknanoik mustarda musan no fermentu nian

³¹Jesus haktuir tan aiknanoik ida ba sira: “Reinu lalehan nian hanesan mustarda musan ida nebe ema kuda iha nia to’os. ³²Musan ne’e kiik liu musan sira hotu; maibe boot mai, nia moris boot liu hotu, to’o sai aihun nebe manu sira lalehan nian mai hamahan an iha nia sanak sira.”

³³Nia dehan tan aiknanoik seluk ba sira: “Reinu lalehan nian hanesan fermentu nebe feto ida kahur ho farina sasukat tolu, to’o nia sa’e di-diak.”

³⁴Buat ne’e hotu Jesus dehan ba ema lubun boot ho aiknanoik sira; la ho aiknanoik mak Nia la koalia ba sira. ³⁵Nune’e buat nebe uluk profeta dehan sai tuir duni: “Ha’u sei loke Ha’u ibun ho aiknanoik, Ha’u sei haklaken buat sira nebe subar houri mundu hahu.”

³⁶Tuir mai, husik tiha ema lubun boot ne’e, Jesus ba fali uma. Nia eskolante hakbesik ba Nia hodi dehan: “Hanorin mai ami aiknanoik kona ba du’ut aat iha to’os.” ³⁷Nia hatan ba sira: “Ida nebe kuda fini diak mak Oan Mane. ³⁸To’os mak mundu. Fini diak mak reinu nia oan sira. ³⁹Funubalun nebe kuda fini aat mak diabu. Loron ko’a nian mak loron ikus mundu ne’e nian. Sira nebe ko’a mak anju sira. ⁴⁰Ne’e duni, hanesan sira futu du’ut aat hodi sunu iha ahi, nune’e mos sei mosu wainhira mundu sei to’o nia rohan. ⁴¹Oan Mane sei haruka nia anju sira atu hasa’e tiha housi nia reinu sira hotu nebe fo esemplu aat no sira hotu nebe halo aat, ⁴²hodi soe sira ba ahi lakan; iha neba sira sei tanis no ruun nehan. ⁴³Ema diak sira sei nabilan hanesan loron iha sira Aman nia reinu. Ema nebe iha tilun, rona ba!”

Aiknanoik osan mean, fatuk murak no dai nian

⁴⁴“Reinu lalehan nian hanesan murak ida nebe subar hela iha to’os laran nebe ema ida hetan hodi haksubar fali. Ho ksolok boot nia fa’an buat hotu nebe nia iha hodi sosa to’os ne’e.”

⁴⁵“Reinu lalehan nian hanesan kontratu na’in ida nebe buka fatuk murak sira. ⁴⁶Hetan tiha ida nebe folin boot, nia fa’an tiha buat hotu nebe nia iha hodi sosa fatuk murak ne’e.”

⁴⁷“Reinu lalehan nian hanesan dai ida nebe ema soe ba tasi hodi dada ikan sira, kiik no boot. ⁴⁸Nia nakonu ona, peskador sira dada ba tasi ibun; tur tiha, sira hili ikan diak sira hodi tau hamutuk iha lafatik; sira nebe aat sira soe tiha. ⁴⁹Sei sai mos nune’e wainhira mundu to’o ona nia rohan: anju sira sei mosu hodi haketak ema aat sira housi ema diak sira. ⁵⁰Hafoin sira sei soe ema aat sira ba ahi lakan manas: iha neba sira sei tanis no ruun nehan.”

⁵¹“Imi rona lolos buat hirak ne’e hotu?” Sira hatan: “Ami rona.” ⁵²Nia dehan tan ba sira: “Tan ne’e, eskriba sira nebe matenek kona ba reinu lalehan nian hanesan uma na’in ida nebe hasai buat foun no tuan housi nia rikusoi.”

Ema Nazare sira la simu Jesus

⁵³Hanorin hotu tiha ho aiknanoik sira ne’e, Jesus husik rai neba. ⁵⁴To’o tiha ninia rai, Nia hanorin iha sinagoga, halo ema hotu hakfodak hodi dehan: “Nia matenek ho nia kbiit hodi halo milagre hirak ne’e mai los housi nebe? ⁵⁵Nia la’os badaen ai nia oan? Nia inan nia naran la’os Maria, no mos nia maun alin nia naran la’os Tiago, Jose, Simao ho Judas? ⁵⁶Nia feton la hela hamutuk ho ita? Ne’e duni, buat hirak ne’e hotu, Nia hetan los housi nebe?” ⁵⁷No sira lakohi simu Nia. Maibe Jesus dehan ba sira: “Iha nia rai deit no iha nia uma rasik mak ema hewai profeta ida.” ⁵⁸Nia la halo milagre barak iha neba, tan ema sira la fiar.

Joao Baptista nia mate

¹Iha tempu neba liurai Herodes rona kona ba Jesus nia naran boot. ²Herodes dehan ba nia emar sira: “Tebes, ema ne’e Joao Baptista nebe moris fali ona! Tan ne’e nia iha kbiit atu halo milagre sira.”

³Herodes kaer duni Joao hodi futu nia ho korente no hatama nia iha kadeia tamba Herodiades, nia alin Filipe nia kaben; ⁴basa Joao dehan ba nia: “O la bele hola nia.” ⁵Herodes hakarak oho Joao maibe nia tauk povu basa povu hare nia nudar profeta. ⁶Maibe iha loron nebe Herodes halo tinan, Herodiades nia oan feto dansa iha ema hotu nia oin hodi fo ksolok ba Herodes, ⁷tan ne’e nia hakotu lia ho juramentu atu fo ba fetoran ne’e buat hotu nebe nia husu. ⁸Hodi nia inan nia liafuan, nia hatan: “Fo mai ha’u Joao Baptista nia ulun iha bikan boot ida.” ⁹Liurai neon susar, maibe tamba nia juramento no nia bainaka sira, ¹⁰nia haruka ema atu tesi Joao nia ulun iha kadeia laran hodi lori mai. ¹¹Sira lori ulun mai iha bikan ida hodi fo ba fetoran nebe fo fali ba nia inan. ¹²Joao nia eskolante sira mai foti nia isin hodi ba hakoi; hafoin sira ba fo hatene ba Jesus.

Jesus fo han ba ema barak

¹³Rona tiha buat ne’e, Jesus sa’e ba ro ida hodi ba mesak iha rai fuik maran; maibe hatene tiha ne’e, ema lubun boot husik sidade sira hodi la’o tuir buka Nia. ¹⁴Tun housi ro hodi hare ema barak ne’e, Nia hanoin teb-tebes sira hodi fo isin diak ba sira nebe moras. ¹⁵Loraik dau-daun ona, eskolante sira hakbesik ba Nia hodi dehan: “Fatin ne’e rai fuik, no kalan besik ona; haruka ema sira ne’e ba ona, atu sira bele sosa aihan iha knua sira.” ¹⁶Nune’e Jesus dehan ba sira: “Sira lalika ba; imi rasik fo han sira ba.” ¹⁷Sira hatan ba Nia: “Ami iha deit paun fuan lima no ikan rua.” ^18“Lori sira mai,” Nia dehan. ¹⁹Hafoin Nia haruka ema lubun boot tur iha du’ut leten. Nia kaer paun fuan lima no ikan rua ne’e, foti matan ba lalehan hodi fo bensa. Tuir mai Nia silu paun sira ne’e hodi fo ba eskolante sira; hafoin sira fahe ba ema lubun boot. ²⁰Sira hotu han to’o bosu; baluk sira nebe resin, sira tau ba luhu sanulu resin rua nakonu! ²¹Ema sira nebe han hamutuk mane rihun lima, la sura feto no labarik sira.

Jesus la’o iha be leten

²²Tuir mai Jesus haruka eskolante sira sa’e ro hodi ba uluk tasi sorin ba; Nia fali haruka ema lubun fila ba uma. ²³Haruka tiha sira ba uma, Nia sa’e ba foho atu harohan mesa-mesak. To’o kalan, Nia mesak deit iha neba. ²⁴Ro fali kilometro ruma ona iha tasi klaran, laloran baku maka’as, basa anin hu’u hasouru. ²⁵To’o kalan fahe ba haat, Nia hakbesik ba sira hodi la’o iha tasi leten. ²⁶Hare tiha Nia la’o iha tasi leten, eskolante sira tauk hodi dehan: “Rai na’in ida!” Sira hakilar ho tauk. ²⁷Jesus koalia kedas ba sira dehan: “Hakmatek ba! Ha’u mak ne’e: keta tauk!” ²⁸Ne’e duni Pedro hatan dehan: “Na’i, Ita Boot mak neba karik, haruka ha’u ba to’o Ita Boot housi laloran leten.” Ne’e duni, Jesus simu: “Mai!” ²⁹Pedro tun housi ro hodi la’o iha laloran leten atu ba to’o Jesus. ³⁰Maibe, hare anin hu’u maka’as, nia tauk hodi hahu mout. Nia hakilar. “Na’i, soi ha’u!” ³¹Jesus lolo liman kedas ba nia hodi kaer nia dehan: “Ema fiar kiik, tansa o laran namlele?” ³²Sira tama tiha ba ro laran, anin kmaus tiha. ³³Sira nebe iha ro laran monu iha Jesus nia oin hodi dehan: “Tebes duni, Ita Boot Maromak nia Oan Mane.” ³⁴Hakur tiha tasi, sira tun ba rai Genesare. ³⁵Hatene tiha Nia, ema sira rai neba nian ba fo hatene ba maluk sira iha fatin hotu. Sira lori ba Nia moras sira hotu, ³⁶hodi husu ba Nia atu husik netik sira kona nia tais ninin. No sira nebe kona, hetan isin diak.

15

Lisan sira

¹Iha loron neba fariseu no eskriba balun housi Jerusalem mai koalia ba Jesus dehan: ²“Tansa mak Ita nia eskolante sira la tuir lisan bei ala sira nian?” Sira la fase liman molok atu han.” ³Nia hatan ba sira: “Imi fali, tansa imi la halo tuir Maromak nia ukunfuan tan deit imi nia lisan? ⁴Basa Maromak dehan: ‘Hamtauk aman inan’, no mos: ‘Ema nebe fo malisan ba aman ka inan, nia sei mate.’ ⁵Maibe imi dehan: ‘Ema nebe dehan ba nia aman ka nia inan: ‘Rikusoi nebe ha’u bele usa ba ita, buat karan santu ona’, ⁶ema ne’e la iha ona obrigasaun atu tulun aman inan.’ Nune’e imi halakon Maromak nia futar lia nia folin tan imi nia lisan. ⁷Laran makerek sira! Profeta Isaias si’ik lolos kona ba imi wainhira nia dehan: ⁸‘Povu ida ne’e hahi Ha’u ho ibun tutun, maibe sira nia laran dook housi Ha’u. ⁹Sira adora Ha’u le’et deit hodi hanorin ema sira nia doutrina no ukunfuan sira.’”

¹⁰Tuir mai Nia halibur ema lubun boot hodi dehan ba sira: “Rona di-diak ba hodi buka hatene! ¹¹La’os buat nebe tama housi ibun mak hafoer ema, maibe buat nebe sai housi ibun, buat ne’e mak halo ema foer.”

¹²Nune’e eskolante sira hakbesik hodi dehan ba Nia: “Ita hatene katak fariseu sira laran moras wainhira sira rona Ita koalia nune’e?” ¹³Nia hatan ba sira: “Ai hotu nebe Ha’u Aman lalehan la kuda sei fokit tiha. ¹⁴Husik ema sira ne’e ba; sira hanesan matan delek sira nebe hatudu dalan ba matan delek sira seluk, sira na’in rua sei monu hotu iha rai kuak.”

¹⁵Pedro hatan hodi dehan ba Nia: “Esplika aiknanoik ne’e mai ami.” ¹⁶Nia dehan ba sira: “Imi neon mos seidauk nakloke? ¹⁷Imi la hatene katak buat nebe tama housi ibun liu ba kabun, hafoin sai fali ba liur? ¹⁸Maibe buat nebe sai housi ibun mai housi ema nia fuan; ne’e mak hafoer ema. ¹⁹Housi ema nia fuan mak suli mai hanoin aat sira, oho ema, sala hasouru ema nia kaben, sala foer, na’ok, bobar lia falsu, hateten aat Maromak. ²⁰Ne’e hotu mak hafoer ema; maibe han hodi la fase liman, ne’e la hafoer ema.”

Feto housi Kanaan

²¹Sai tiha housi neba, Jesus liu ba rai Tiro no Sidonia nian. ²²Iha oras neba feto Kanaan ida nebe mai housi rai neba hahu hakilar dehan: “Na’i, David nia Oan, sadia ha’u: diabu fo terus boot ba ha’u nia oan feto.” ²³Maibe Nia la hatan lia fuan ida. Eskolante sira hakbesik ba Nia hodi husu: “Hatan tiha ba nia ba, basa nia hakilar bei-beik tuir ita.” ²⁴Nia hatan: “Ha’u mai deit ba bibi sira nebe lakon housi umakain Israel nian.” ²⁵Maibe feto ne’e mai hakneak iha Nia oin dehan: “Na’i, tulun ha’u!” ²⁶Nia simu: “La diak hasai oan sira nia aihan hodi soe fali ba asu oan sira!” ²⁷Feto ne’e dehan fali: “Ne’e los duni, Na’i; maibe asu oan sira mos han etu mumun nebe monu housi sira na’in nia meja.” ²⁸Jesus hatan ba nia: “Feto, o nia fiar boot tebes! Halo duni tuir o hakarak ba.” Iha oras neba, nia oan feto hetan fali isin diak.

Fo isin diak ba ema moras barak

²⁹Sai tiha housi neba, Jesus liu ba to’o tasi Galileia. Nia sa’e ba foho ida hodi tur iha neba. ³⁰Ema barak mai buka Nia. Sira lori ema ain aat sira, ema moras sira, matan delek sira no monok sira, ho tan sira barak seluk hodi tau sira iha nia ain; no Jesus fo isin diak ba sira. ³¹Ne’e halo ema lubun boot hakfodak wainhira sira hare monok sira koalia, moras sira diak fali, ain aat sira la’o los, matan delek sira hare mos. No sira hasa’e gloria ba Israel nia Maromak.

Fo han ba ema barak

³²Bolu tiha nia eskolante sira, Jesus dehan ba sira: “Ha’u hanoin ema lubun ne’e, basa loron tolu ona mak sira la’o tuir Ha’u, la han buat ida. Ha’u lakohi haruka sira ba ho kabun mamuk, keta sira monu iha dalan karik.” ³³Eskolante sira dehan ba Nia: “Iha rai fuik ne’e, ita ba buka paun nebe to’o atu fo han bosu ema barak hanesan ne’e iha los nebe?” ³⁴Jesus husu ba sira: “Imi iha paun fuan hira?” Sira hatan: “Paun fuan hitu, ho ikan oan balun.” ³⁵Haruka tiha ema lubun boot tur hotu iha rai, ³⁶Nia kaer paun fuan hitu ho ikan sira, fo obrigadu, silu hodi fahe ba eskolante sira atu fo ba povu. ³⁷Sira hotu han to’o bosu. Hafoin sira tau baluk sira nebe resin ba luhu hitu nakonu. ³⁸Ema sira nebe han ne’e sura hamutuk mane rihun haat, la sura feto no labarik sira. ³⁹Haruka tiha ema lubun ne’e ba uma, Jesus sa’e ba ro hodi la’o ba rai Magadan.

Sira husu sinal ida

¹Ema fariseu no saduseu sira hakbesik ba Jesus atu koko Nia. Sira husu ba Nia atu hatudu ba sira sinal ida housi lalehan. ²Nia hatan ba sira: “Wainhira kalan atu mai, imi dehan: ‘Tempu diak, basa lalehan mean.’ ³Iha dader, imi dehan: ‘Ohin tempu sei la diak, basa lalehan mean no iha kalohan barak.’ Imi hatene si’ik tempu hodi hare lalehan nia oin; maibe imi la hatene si’ik sinal tempu sira nian. ⁴Derasaan aat ho sala foer na’in ne’e husu sinal ida, maibe sei la fo sinal ida ba nia; sei fo deit sinal Jonas nian.” Tuir mai Nia husik sira hodi la’o ba.

⁵Wainhira eskolante sira hakur tasi ba sorin balun, sira haluha atu lori paun. ⁶Jesus dehan ba sira: “Matan moris, neon na’in ba ho fariseu no saduseu sira nia fermentu.” ⁷Sira haksesuk malu hodi dehan: “Ne’e tan ita haluha lori paun.” ⁸Maibe, Jesus hatene ne’e dehan: “Imi ema fiar namlele, tansa imi haksesuk malu tan imi la lori paun? ⁹Imi seidauk hatene lolos? Imi kala haluha ona paun fuan lima nebe fo han ema rihun lima. Imi halibur resin sira iha luhu hira? ¹⁰No mos paun fuan hitu nebe fo han ema rihun hat. Imi halibur resin sira iha luhu hira? ¹¹Nusa mak imi la hatene lolos katak wainhira Ha’u dehan ba imi ‘matan moris neon na’in ba ho fariseu no saduseu sira nia fermentu’, Ha’u la koalia kona ba paun?”

¹²Nune’e mak sira foin hatene katak Jesus husu atu sira hadook an la’os housi fermentu paun nian, maibe housi fariseu no saduseu sira nia doutrina.

Pedro nia fiar

¹³To’o tiha rai Sesareia Filipe nian, Jesus husu ba nia eskolante sira: “Ema sira dehan Oan Mane ne’e se los?” ¹⁴Sira hatan; “Balun dehan katak Nia mak Joao Baptista, seluk katak Elias, seluk fali katak Jeremias ka profeta ruma.” ¹⁵Jesus dehan ba sira; “Imi fali? Imi dehan Ha’u se?” ¹⁶Simao Pedro simu hodi dehan: “Ita Boot mak Kristu, Maromak moris nia Oan.” ¹⁷Jesus hatan ba nia : “Ksolok ba o, Simao, Jonas nia oan, basa la’os isin ka ran mak hatudu buat ne’e ba o, maibe Ha’u nia Aman nebe iha lalehan. ¹⁸Ha’u dehan fali ba o, ‘O Pedro, no iha fatuk ne’e nia leten Ha’u sei harii Ha’u nia kreda; infernu nia odamatan sira sei la bele halo buat ida hasouru nia. ¹⁹Ha’u sei fo siabe reinu lalehan nian ba o; buat hotu nebe o futu iha rai, sei futu mos iha lalehan; no buat hotu nebe o kore iha rai, sei kore mos iha lalehan.’” ²⁰Hafoin Nia haruka nia eskolante sira atu la bele dehan ba ema ida katak Nia mak Kristu.

Jesus fo sai katak nia sei terus

²¹Housi tempu neba, Jesus hahu fo sai ba nia eskolante sira katak Nia ten ke ba Jerusalem atu hetan terus barak housi katuas sira, housi amlulik boot sira no eskriba sira; ema sei oho Nia, hafoin, liu tiha loron tolu, Nia sei moris hi’as fali. ²²Pedro lori Nia ketak hodi hahu haksi’ak Nia dehan: “Maromak hadook ne’e housi Ita; buat aat ne’e la bele kona Ita, Na’i!” ²³Maibe, fila tiha ba Pedro, Jesus dehan: “Ba Ha’u nia kotuk, Satanas, o teri netik Ha’u dalan; basa o la hanoin Maromak nia hanoin, maibe ema nian.”

Sei halo sa ida atu tuir Jesus

²⁴Tuir mai, Jesus dehan ba nia eskolante sira: “Ema ruma hakarak tuir Ha’u karik, nia sei hewai nia an rasik, sei lori nia krus hodi tuir Ha’u. ²⁵Tan ema nebe hakarak soi nia moris sei lakon moris ne’e; maibe ema nebe lakon nia moris tamba Ha’u sei hetan fali nia. ²⁶Ema ida manan los sa wainhira nia manan mundu tomak, maibe lakon nia moris? Ka, ema bele fo los sa ida atu troka ho nia moris? ²⁷Basa Oan Mane sei mai iha nia Aman nia gloria, ho Nia anju sira hodi fo ema hotu nia kolen tuir ida-ida nia hahalok. ²⁸Tebes, Ha’u dehan ba imi katak ema balun iha ne’e sei la mate molok sira hare Oan Mane to’o mai iha nia reinu.”

Jesus nakfila An

¹Liu tiha loron ne’en, Jesus bolu ketak Pedro, Tiago ho nia alin Joao hodi lori sira mesak ba foho aas ida. ²Iha neba Nia nakfila An iha sira nia oin. Nia oin nabilan hanesan loron, nia unuk sai mutin hanesan roman. ³Iha oras neba Moises ho Elias mosu hodi koalia ho Nia. ⁴Pedro hasa’e lia dehan ba Jesus: “Na’i, diak liu Ita hela ona iha ne’e! Ita Boot hakarak karik, ha’u sei halo takabaluk tolu: ba Ita Boot ida, ba Moises ida, ba Elias ida!” ⁵Nia sei koalia hela, kalohan nabilan ida hamahan sira. Hafoin housi kalohan ne’e, lia ida dehan: “Ida ne’e mak Ha’u nia Oan doben, nebe fo ksolok mai Ha’u. Rona Nia ba!” ⁶Rona tiha ne’e, eskolante sira monu ho oin ba rai hodi tauk teb-tebes. ⁷Jesus hakbesik hodi kona sira dehan: “Hamriik ba, keta tauk!” ⁸Foti tiha sira matan, sira hare deit Jesus; la iha tan ema ida.

⁹Wainhira sira tun dau-daun housi foho, Jesus haruka sira: “Keta haktuir ba ema ida buat nebe imi foin hare to’o Oan Mane moris hi’as fali housi mate.” ¹⁰Eskolante sira husu ba Nia: “Ne’e duni, tansa eskriba sira dehan katak Elias sei mai uluk?” ¹¹Nia hatan: “Los duni, Elias sei mai no nia sei halos buat hotu. ¹²Maibe Ha’u dehan ba imi: Elias mai tiha ona, no sira la hatene nia, maibe sira halo ba nia tuir sira nia hakarak. Nune’e mos Oan Mane sei terus housi sira .” ¹³Ho lia hirak ne’e, sira hatene ona katak Nia koalia ba sira kona ba Joao Baptista.

Labarik ho diabu iha laran

¹⁴Wainhira Jesus mai hasouru ema lubun boot, mane ida hakbesik ba Nia, hakneak iha Nia oin hodi dehan: ¹⁵“Na’i, sadia netik ha’u nia oan mane, basa nia moras bibimate hodi terus teb-tebes. Nia monu fila fila ba ahi no mos ba be. ¹⁶Ha’u lori ona nia ba ita nia eskolante sira no sira la bele halo nia sai diak.” ¹⁷Jesus hatan dehan: “Imi ema fiar laek, ema laran aat! Ha’u sei hamutuk ho imi to’o wainhira los? To’o wainhira los Ha’u sei tahan imi? Lori nia mai!” ¹⁸Jesus koalia ba nia hodi si’ak, no diabu sai tiha housi nia. Houri oras ne’e labarik sai diak kedas.

¹⁹Tuir mai eskolante sira hakbesik ba Jesus mesa-mesak hodi husu ba Nia: “Tansa mak ami la bele duni sai nia?” ²⁰Nia hatan: “Tamba imi nia fiar kiik. Tebes, Ha’u dehan ba imi: imi nia fiar hanesan mustarda musan ida karik, imi sei dehan ba foho ne’e, ‘Book o an housi ne’e ba neba’, no nia sei book an duni; buat ida sei la susar ba imi. ²¹Ema bele duni sai diabu sira hanesan ne’e ho deit orasaun no hadera an.

Ba dala rua Jesus fo sai nia terus

²²Wainhira sira halibur hamutuk iha Galileia, Jesus dehan ba sira: “Sira sei saran Oan Mane ba ema sira nia liman. ²³Sira sei oho Nia; maibe, liu tiha loron tolu, Nia sei moris hi’as.” No sira laran susar teb-tebes.

Impostu templu nian

²⁴To’o tiha Kafarnaum, kobrador impostu drakma rua nian hakbesik ba Pedro hodi dehan ba nia: “Imi nia mestre selu impostu ka lae?” ²⁵Nia hatan: “Selu.” To’o tiha uma, Jesus koalia kedas dehan: “Simao, o hanoin oin sa? Liurai sira simu impostu rai ninian housi se: housi sira nia oan rasik, ka housi ema seluk?” ²⁶Nia hatan: “Housi ema seluk.” Jesus dehan ba nia: “Ne’e duni, oan sira la selu. ²⁷Maibe, atu ema keta hanoin sala, ba tasi ba, soe kail, kaer ikan nebe sai uluk; loke tiha nia ibun, o o sei hetan osan drakma haat nian. Lori osan ne’e no selu impostu ba sira ba Ha’u no ba o.”

Se mak boot liu

¹Iha oras neba, eskolante sira hakbesik ba Jesus hodi husu ba Nia: “Se mak boot liu iha reinu lalehan?” ²Nia bolu labarik ida, tau nia iha sira klaran ³hodi dehan ba sira: “Tebes, Ha’u dehan ba imi: imi la hakribi imi nia sala no sai hanesan labarik sira karik, imi sei la tama iha reinu lalehan. ⁴Ne’e duni, ema nebe haraik an hanesan labarik ne’e, nia mak boot liu iha reinu lalehan. ⁵Ema nebe simu labarik ida hanesan ne’e tan Ha’u nia naran, nia simu Ha’u. ⁶Maibe ema nebe dada ba aat kiik oan sira ne’e ida nebe fiar Ha’u, diak liu tara fatuk dulas batar nian iha nia kakorok hodi soe nia ba tasi klean laran. ⁷Susar boot ba mundu tamba aat sira! Buat aat sira ne’e sei mosu duni, maibe susar boot tebes ba ema nebe liu housi nia buat aat mosu!”

^8“O nia liman ka ain dada karik o ba sala, tesi nia hodi soe tiha! O tama iha moris liman ida la iha ka ain kudeik diak liu fali o monu ho liman rua ka ain rua ba ahi rohan laek. ⁹O nia matan dada karik o ba sala, fokit nia ba hodi soe tiha! Tama ba moris ho matan ida deit diak liu fali o monu ba ahi infernu nian ho matan rua.”

^10“Keta hewai kiik oan sira ne’e ida, basa Ha’u dehan ba imi katak sira nia anju sira fihir nafatin Ha’u Aman lalehan nia futar oin. ¹¹Basa Oan Mane mai atu soi buat nebe lakon.”

Bibi nebe lakon

¹²“Imi hanoin oin sa? Ema ida iha karik bibi atus ida, sira ne’e ida lakon tiha, nia sei la husik sira sia nulu resin sia iha foho hodi buka ida nebe lakon? ¹³Tebes, Ha’u dehan ba imi katak hetan tiha bibi ne’e, nia sei haksolok ho ida ne’e liu fali ho sira sia nulu resin sia nebe la lakon. ¹⁴Nune’e imi nia Aman iha lalehan lakohi atu kiik oan sira ne’e ida lakon.”

Hanorin malu

^15“O nia maun eh alin sala karik hasouru o, ba koalia ho nia mesa-mesak hodi hatudu nia sala. Nia rona karik o, o manan ona o nia maun eh alin ne’e. ¹⁶Nia la rona karik o, ba lori tan ema ida ka rua atu lia hotu sai los hodi sasin na’in rua ka tolu nia liafuan. ¹⁷Nia lakohi rona karik ema sira ne’e, ba fo hatene ba kreda. Maibe nia lakohi rona kreda karik, hare ona nia nudar ema gentiu no ema publikanu ida. ¹⁸Tebes, Ha’u dehan ba imi: Buat hotu nebe imi futu iha rai sei futu metin iha lalehan; buat hotu nebe imi kore iha rai sei kore mos iha lalehan.”

Harohan hamutuk

^{19 ‘}Ha’u dehan tan ba imi: “Imi na’in rua iha rai ne’e lia tuir malu karik atu husu buat ida, Ha’u Aman iha lalehan sei fo duni ba imi. ²⁰Basa iha fatin nebe ema na’in rua ka tolu halibur hamutuk hodi Ha’u nia naran, Ha’u mos iha sira nia le’et.”

Perdua dala hira

²¹Tuir mai, Pedro hakbesik ba Nia hodi dehan: “Na’i, ha’u nia maun eh alin sala hasouru ha’u karik, ha’u sei perdua nia dala hira? To’o dala hitu?” ²²Jesus hatan ba nia: “Ha’u dehan ba o: la’os to’o dala hitu, maibe to’o hitu nulu dala hitu.”

²³“Tan ne’e, reinu lalehan nian hanesan liurai ida nebe hakarak sisi tusan ba nia atan sira. ²⁴Wainhira nia hahu sisi, sira lori mai ema ida nebe iha tusan osan rihun sanulu. ²⁵Tan nia la iha buat ida hodi selu, liurai haruka fa’an tiha nia ho nia feen, nia oan sira ho nia rikusoi sira hotu atu selu nia tusan. ²⁶Atan ne’e monu ain ba nia hodi dehan: ‘Pasiensia uitoan ho ha’u, ha’u sei fo fali buat hotu ba o.’ ²⁷Tan hanoin nia, atan ne’e nia na’i husik nia ba hodi kasu nia tusan. ²⁸Wainhira atan ne’e sai housi neba, nia hetan nia maluk ida nebe debe nia osan oan atus ida. Kaer tiha maluk ne’e, nia buti metin nia kakorok dehan: ‘Selu o nia tusan ba!’ ²⁹Nia maluk monu ain ba nia hodi harohan: ‘Pasiensia uitoan ho ha’u, ha’u sei fo fali buat hotu ba o.’ ³⁰Maibe nia lakohi sadia nia hodi haruka maluk ne’e ba dadur laran to’o nia selu nia tusan hotu. ³¹Nia maluk atan sira seluk hare tiha buat ne’e, ho neon susar ba haktuir ba sira na’i buat hotu nebe mosu. ³²Tuir mai, sira nia na’i haruka bolu nia hodi dehan ba nia: ‘Atan aat, ha’u kasu tiha o nia tusan tomak tan o husu ha’u; ³³o la bele hanoin o nia maluk atan hanesan ha’u hanoin o?” ³⁴Hafoin, hodi hirus, na’i fo nia ba dadur na’in sira to’o nia selu nia tusan hotu. ³⁵Imi ida-ida la perdua ho laran imi nia maun alin karik, Ha’u Aman iha lalehan sei halo mos nune’e ba imi.”

Lia kona ba divorsiu

¹Koalia hotu tiha, Jesus husik Galileia hodi la’o ba rai Judeia, iha Jordaun nia sorin balun ba. ²Ema lubun boot la’o tuir Nia. Iha fatin neba Nia fo isin diak ba sira. ³Fariseu balun hakbesik atu koko Nia hodi dehan: “Tan buat naran deit, mane ida bele soe nia feen ka lae?” ⁴Nia hatan: “Imi la le’e katak houri uluk kedas Maromak halo mane ho feto hodi dehan; ⁵‘Tan ne’e mak mane sei husik nia aman ho nia inan hodi moris hamutuk ho nia feen; sira na’in rua sei sai isin ida deit?’ ⁶Nune’e, sira la’os na’in rua tan, maibe isin ida deit ona. Ne’e duni buat nebe Maromak tau hamutuk ema keta haketak.”

⁷Sira husu ba Nia: “Tansa Moises haruka fo surat soe malu nian hodi haruka feto atu ba ona?” ⁸Nia hatan ba sira: “Tan imi nia laran tos mak Moises husik imi soe imi nia feen; maibe uluk la’os hanesan ne’e. ⁹Ha’u dehan ba imi katak ema nebe soe nia feen, sala foer deit mak lae, hodi hola fali feto seluk, ema ne’e halo sala adulteriu nian.”

¹⁰Eskolante sira dehan ba Nia: “Hanesan ne’e karik kona ba mane ho nia feen, diak liu lalika kaben.” ¹¹Maibe Nia hatan: “La’os ema hotu bele hatene lolos liafuan ida ne’e, maibe sira deit nebe fo tiha ona ba sira. ¹²Ema balun la kaben tamba moris mai nune’e kedas ona; balun fali la kaben tamba ema halo sira hanesan ne’e, no balun la kaben tamba sira rasik halo an hanesan ne’e tan reinu lalehan. Ema nebe bele simu ne’e, simu ba.”

Jesus ho labarik sira

¹³Ema lori labarik sira atu Nia tau liman hodi harohan ba sira. Eskolante sira haksi’ak sira. ¹⁴Maibe Jesus dehan: “Husik labarik oan sira hakbesik Ha'u, keta bandu sira, basa reinu lalehan sira nian.” ¹⁵Hafoin, tau tiha liman ba sira, Nia la’o tuir nia dalan.

Mane klosan riku

¹⁶La kleur mane ida hakbesik ba Nia dehan: “Mestre, ha’u sei halo buat diak sa atu hetan moris rohan laek?” ¹⁷Jesus husu ba nia: “Tansa o husu Ha’u kona ba buat nebe diak? Ida deit mak diak. Maibe, o hakarak tama ba moris karik, halo tuir ukunfuan sira ba.” ¹⁸Nia husu fali: “Ukunfuan nebe?” Jesus hatan: “Keta oho, keta sala ho ema nia kaben, keta na’ok, keta foti lia falsu; ¹⁹hamtauk o nia aman ho inan, hadomi o nia maluk hanesan o an rasik.” ²⁰Klosan ne’e dehan ba Nia: “Ha’u halo tuir ona buat ne’e hotu: ha’u sei halo tan sa ida?” ²¹Jesus dehan ba nia: “O hakarak sai ema diak lo-los karik, ba fa’an tiha o nia sasan hotu hodi fahe ba ema kiak sira, nune’e o sei hetan rikusoi iha lalehan; hafoin mai tuir Ha’u.”

²²Rona tiha lia hirak ne’e, mane klosan fila ho neon nakraik, basa nia iha rikusoi barak. ²³Tan ne’e Jesus dehan ba nia eskolante sira: “Tebes, Ha’u dehan ba imi: ema riku ida atu tama iha reinu lalehan susar. ²⁴Tebes, Ha’u dehan ba imi: lalais liu ba kuda kamelu ida tama iha daum nia kuak liu fali ema riku ida tama iha reinu lalehan.” ²⁵Wainhira eskolante sira rona lia ne’e, sira hakfodak hodi dehan: “Nune’e se los mak bele soi an?” ²⁶Jesus fihir sira hodi dehan: “Ba ema sira, ne’e la bele; maibe ba Maromak buat hotu bele deit.”

²⁷Tuir mai Pedro hasa’e lia dehan: “Be ami nebe husik tiha buat hotu hodi tuir Ita Boot: ba ami ne’e sa ida?” ²⁸Jesus dehan ba sira: “Tebes, Ha’u dehan ba imi: imi sira nebe tuir Ha’u, iha mundu foun, wainhira Oan Mane tur iha nia kadunan gloria nian, imi sei tur mos iha kadunan sanulu resin rua hodi tesi lia ba suku sanulu resin rua Israel nian. ²⁹Ema hotu nebe husik uma, maun alin, feton, aman, inan, oan sira ka rai, tan Ha’u nia naran, sei simu dala atus ida liu tan hodi simu mos nudar liman rohan moris rohan laek. ³⁰Barak nebe uluk, sei ikus fali; no sira nebe ikus, sei uluk fali.”

Aiknanoik serbisu na’in sira nian

¹“Reinu lalehan nian hanesan uma na’in ida nebe sai iha dadersan atu halo kontratu ho ema serbisu na’in sira ba nia to’os uvas nian. ²Halo tiha kontratu ho sira loron ida denariu ida, nia haruka sira ba nia to’os. ³Tuku sia, nia sai fali hodi hare ema sira seluk iha dalan la halo buat ida. ⁴Nia dehan ba sira: ‘Imi mos ba ha’u nia to’os, ha’u sei fo buat nebe los ba imi.’ ⁵Sira ba. Nia sai fali iha loron fahe rua, no mos tuku tolu loraik hodi halo nune’e nafatin. ⁶Tuku lima loraik, nia hetan tan ema seluk iha neba. ⁷Nia husu ba sira: ‘Tan sa imi hamriik loron tomak iha ne’e la halo serbisu ruma?’ Sira hatan, ‘Ema la bolu ami.’ Nia dehan ba sira: ‘Imi mos ba ha’u nia to’os.’ ⁸Iha loraik, to’os na’in dehan ba mandor: ‘Bolu serbisu na’in sira hodi selu sira nia kolen, hahu housi sira ikus to’o sira uluk.’ ⁹Serbisu na’in sira nebe mai tuku lima loraik hakbesik hodi simu ida-ida denariu ida. ¹⁰Wainhira sira nebe uluk mai, sira hanoin atu simu liu maibe sira mos simu ida-ida denariu ida. ¹¹Simu tiha osan, sira hamuun hasouru uma na’in hodi dehan: ¹²‘Sira nebe ikus ne’e serbisu oras ida deit, o selu sira hanesan ami, nebe terus kole ho manas loron tomak.’ ¹³Nia hatan ba sira: ‘Ha’u belun, ha’u la hasouru ha’u lia ba o: ita la halo kontratu denariu ida ba loron ida? ¹⁴Ne’e duni, simu buat nebe o nian hodi ba ona. Ha’u hakarak fo ba ida ikus ne’e hanesan ha’u fo ba o. ¹⁵Ha’u la bele halo nudar ha’u hakarak ho ha’u nia rikusoi? Ka o laran moras tamba ha’u laran diak?”

¹⁶Nune’e sira nebe ikus sei sai uluk, sira nebe uluk sei sai ikus.

Ba dala tolu Jesus fo sai kona ba nia terus

¹⁷Sa’e dau-daun ba Jerusalem, Jesus bolu ketak sira na’in sanulu resin rua hodi dehan ba sira: ¹⁸“Ita sa’e ba Jerusalem. Ema sei saran Oan Mane ba amlulik boot no eskriba sira, nebe sei tesi lia atu Nia mate. ¹⁹Hafoin sira sei saran Nia ba gentiu sira atu hamoe Nia, baku Nia hodi hedi Nia ba krus. Liu tiha loron tolu, Nia sei moris hi’as.”

Zebedeu nia oan sira

²⁰Tuir mai Zebedeu oan sira nia inan hakbesik Jesus hamutuk ho nia oan sira, monu iha nia ain hodi husu buat ida. ²¹Jesus husu ba nia: “Ita hakarak sa ida?” Nia hatan: “Ita boot haruka atu atan nia oan mane rua ne’e ida tur iha Ita nia sorin kuana, ida iha Ita nia sorin karuk iha Ita boot nia reinu.” ²²Jesus dehan: “Imi la hatene buat nebe imi husu ne’e. Imi bele hemu kalis nebe Ha’u atu hemu?” Sira hatan: “Ami bele.” ²³Nia dehan fali ba sira: “Tebes duni, imi sei hemu Ha’u nia kalis; maibe tur iha Ha’u nia sorin kuana eh karuk, ne’e la’os Ha’u mak fo; ne’e ba sira nebe Ha’u Aman hadia hela.”

²⁴Rona tiha ne’e, sira na’in sanulu hirus maun alin rua ne’e. ²⁵Jesus bolu sira hodi dehan ba sira: “Imi hatene katak na’i ulun gentiu sira nian ukun povu hodi kbiitt. ²⁶Imi sei la halo hanesan ne’e; maibe iha imi le’et se mak hakarak sai boot, nia sei sai imi nia atan; ²⁷no ida nebe hakarak sai uluk, nia sei sai imi nia atan. ²⁸Hanesan Oan Mane mai, la’os atu ema serbi Nia, maibe atu serbi no saran nia moris atu soi ema barak.”

Ema Matan delek hare fali

²⁹Wainhira Jesus sai housi Jeriko, ema lubun boot la’o tuir Nia. ³⁰Iha oras neba ema matan delek rua tur hela iha dalan ninin. Rona tiha katak Jesus liu dau-daun, sira hakilar. “Na’i, David nia Oan, sadia ami!” ³¹Ema lubun boot si’ak sira hodi haruka sira nonok, maibe sira hakilar hetok liu tan: “Na’i, David nia Oan, sadia ami!” ³²Jesus hamriik, bolu sira hodi husu ba sira: “Imi hakarak Ha’u halo sa ida ba imi?” ³³Sira dehan ba Nia: “Na’i, ami hakarak hare.” ³⁴Jesus hanoin teb-tebes sira hodi kona sira nia matan. Sira hare fali kedas no ema sira ne’e tuir Nia.

Jesus tama nudar liurai iha Jerusalem

¹Wainhira sira besik ona Jerusalem hodi to’o Betfage, iha Foho Oliveira nian, Jesus haruka eskolante na’in rua, ²hodi dehan ba sira: “Imi ba knua nebe iha imi nia oin: imi sei hetan kedas kuda burru inan ida kesi hela hamutuk ho kuda oan ida. Kore sira ba, lori mai Ha’u. ³Ema ruma dehan buat ida karik, imi sei hatan: ‘Na’i presisa sira, maibe sei haruka fali kedas.’” ⁴Buat ne’e mosu atu halo tuir lia nebe profeta uluk fo sai: ⁵“Imi dehan ba Siao nia oan feto: O nia liurai sei mai hasouru o ho laran kmaus, sa’e kuda burru inan ho nia oan.”

⁶Eskolante sira ba hodi halo nudar Jesus haruka ba sira: ⁷Sira lori kuda inan ho oan mai, tau sira nia unuk iha kuda nia leten, hafoin Jesus tur iha leten. ⁸Ema lubun boot nahe sira nia tais iha dalan; sira seluk tesi ai sanak sira hodi tau iha dalan. ⁹Sira nebe la’o iha Jesus nia oin no sira nebe tuir Nia hakilar maka’as: “Osana ba David nia Oan! Rahun diak ba Ida nebe mai hodi Na’i nia naran! Osana leten aas ba!”

¹⁰Wainhira Jesus tama iha Jerusalem, ema hotu nebe iha sidade dehan: “Se mak ne’e?” ¹¹No ema lubun boot hatan: “Ne’e mak profeta Jesus housi Nazare Galileia nian.”

Duni sai kontratu na’in sira housi templu

¹²Jesus tama iha templu hodi duni sai ema sira hotu nebe fa’an no sosa iha neba; Nia taka fila ema troka osan sira nia meja, no mos sira nebe fa’an falur nia banku sira hodi dehan ba sira: ¹³“Hakerek tiha ona: ‘Ema sei hanaran Ha’u nia uma orasaun nian’, maibe imi halo nia sai na’okten sira nia knuuk!”

¹⁴Iha mos ema matan delek no ain kudeik sira nebe hakbesik ba Nia iha templu laran. Nia fo isin diak ba sira hotu. ¹⁵Maibe wainhira amlulik boot sira ho eskriba sira hare buat foun hirak nebe Nia halo, ho tan labarik sira nebe hakilar iha templu “Osana ba David nia Oan!” sira laran nakali, ¹⁶hodi dehan ba Nia: “O rona buat nebe sira dehan?” Jesus hatan: “Ha’u rona duni. Imi seidauk le’e: ‘Housi labarik nia ibun no kosok oan sira nebe inan ko’us mak o hetan hahi?’ ¹⁷Tuir mai, husik tiha sira hodi sai housi sidade, Nia la’o ba Betania hodi toba iha neba.

Malisan ba ai figueira

¹⁸Dadersan hela sira fila ba sidade. Tuir dalan, Nia hamlaha. ¹⁹Hare tiha ai figueira hun ida iha dalan ninin, Nia hakbesik hodi hetan deit ai tahan. Nia dehan: “O sei la fuan tan!” Iha duni oras ne’e, ai figueira namlaek kedas. ²⁰Hare ida ne’e, eskolante sira hakfodak dehan: “Oin sa mak ai figueira ne’e namlaek kedas deit?” ²¹Jesus hatan ba sira: “Tebes, Ha’u dehan ba imi: “Imi fiar karik, imi nia laran la namlele, imi sei la halo deit buat nebe Ha’u halo ba ai figueira ne’e; maibe imi dehan karik ba foho ida ne’e: ‘Sai tiha housi ne’e, soe o an ba tasi’, sei sai duni nune’e. ²²Imi fiar karik, buat hotu nebe imi husu iha orasaun, imi sei simu.”

Jesus nia kbiit

²³Tuir mai Nia tama iha templu. Nia hanorin dau-daun, amlulik boot sira no katuas sira povu nian hakbesik Nia hodi dehan: “Ho kbiit nebe mak o halo buat ne’e? Se mak fo ba o kbiit ida ne’e?” ²⁴Jesus hatan ba sira: “Ha’u mos sei husu buat ida ba imi: imi hatan karik, Ha’u sei dehan ba imi ho kbiit nebe mak Ha’u halo buat ne’e. ²⁵Joao nia baptismu mai housi nebe: housi lalehan, ka housi ema sira?” Maibe sira haksesuk malu dehan: “Ita hatan karik ‘Mai housi lalehan,’ Nia sei dehan mai ita: ‘ Ne’e duni, tansa imi la fiar nia?’ ²⁶Maibe ita hatan karik ‘Mai housi ema, ita tauk ema lubun, basa ema hot-hotu fiar katak Joao profeta ida.” ²⁷Ne’e duni, sira hatan ba Jesus: “Ami la hatene.” Nia dehan fali ba sira: “Ha’u mos sei la dehan ba imi ho kbiit nebe mak Ha’u halo ne’e.”

Aiknanoik maun alin na’in rua nian

²⁸“Imi hanoin sa? Ema ida iha oan mane na’in rua. Nia ba ida uluk hodi dehan: ‘Oan, ohin o ba serbisu iha to’os,’ ²⁹Oan ne’e hatan: ‘Ha’u lakohi.’ Maibe, la kleur, nia hakribi hodi ba. ³⁰Tuir mai, nia hakbesik ida seluk hodi dehan ba nia hanesan nia dehan ba ida uluk Ida ne’e hatan; ‘Ha’u ba, Na’i.’ Maibe nia la ba. ³¹Sira na’in rua ne’e, ida nebe mak halo tuir nia aman nia hakarak?” Sira hatan: “Ida uluk.” Jesus dehan ba sira: “Tebes, Ha’u dehan ba imi: ema publikanu no feto moris aat sira sei la’o uluk liu imi ba Maromak nia reinu. ³²Joao mosu ba imi hodi hatudu dalan justisa nian, imi la fiar, maibe ema publikanu no feto moris aat sira fiar nia. Maibe imi, hare tiha ona, lakohi hakribi sala hodi fiar nia.”

To’os atan aat

³³“Rona tan aiknanoik ida ne’e. Ema ida kuda uvas iha to’os ida. Hale’u tiha ho lutu, nia ke’e fatin sama uvas ida iha to’os laran hodi harii uma aas ida; nia saran ba ema sira, hafoin nia ba rai dook ida. ³⁴To’o tempu atu ku’u uvas nian, nia haruka nia atan atu ba husu buat nebe monu ba nia. ³⁵Maibe ema sira ne’e kaer atan sira, baku ida, oho ida seluk, tuda ida seluk tan. ³⁶Tuir mai nia haruka tan atan sira seluk, barak liu fali sira uluk, maibe ema sira halo mos nune’e ba sira. ³⁷Ikus mai nia haruka nia oan rasik hodi dehan: ‘Sira sei hamtauk ha’u nia oan.’ ³⁸Maibe hare tiha nia oan, ema sira dehan ba malu: ‘Ida ne’e mak liman rohan na’in. Ita oho nia ba, atu ita sei manan nia liman rohan.’ ³⁹Ne’e duni, sira kaer nia, soe ba to’os liur hodi oho nia. ⁴⁰Wainhira to’os na’in mai, nia sei halo sa los ba ema sira ne’e?” ⁴¹Sira hatan: “Nia sei haruka oho ho kroat ema aat sira ne’e hodi saran to’os ba ema sira seluk nebe, to’o los tempu, sei hatama aifuan ba nia.” ⁴²Jesus dehan ba sira: “Imi seidauk le’e Eskritura sira, ‘Fatuk nebe badaen sira hewai nakfila fali ba fatuk inan? Ne’e, buat nebe Na’i halo, kmanek tebes duni ba ita matan.’”

⁴³“Tan ne’e Ha’u dehan ba imi katak Maromak nia reinu sei hasai tiha housi imi hodi fo fali ba povu ida nebe sei fo fuan.” ⁴⁴(Ema nebe monu ba fatuk ne’e rahun hotu; fatuk ne’e monu ba ema ruma karik, fatuk ne’e sei harahun nia.) ⁴⁵Rona tiha aiknanoik hirak ne’e, amlulik boot sira no eskriba sira hatene lolos katak nia koalia kona ba sira. ⁴⁶Sira hakarak kaer Nia, maibe sira tauk povu nebe hare Nia nudar profeta.

Aiknanoik festa kasamento nian

¹Jesus koalia fali ho aiknanoik hodi dehan ba sira: ²“Reinu lalehan nian hanesan liurai ida nebe halo festa kaben ba nia oan mane. ³Nia haruka atan sira atu ba bolu konvidadu sira ba festa, maibe sira lakohi mai. ⁴Nia haruka tan atan sira seluk dehan: ‘Dehan ba konvidadu sira: Aihan prontu tiha ona, ha’u nia karau ho balada bokur sira oho tiha ona, buat hotu nahe tiha ona, mai festa kasamento.’ ⁵Maibe, hanesan lia la kona sira, ida ba tiha nia to’os, ida ba nia kontratu, ⁶sira seluk, kaer tiha atan sira, baku sira no oho sira. ⁷Liurai, laran nakali teb-tebes, haruka nia soldadu sira atu oho ema aat sira ne’e hodi sunu sira nia sidade. ⁸Hafoin nia dehan ba atan sira: ‘Festa kaben prontu ona, maibe konvidadu sira la soi. ⁹Ne’e duni, imi ba dalan sira hodi konvida ba festa kaben nian ema hotu nebe imi hetan.’ ¹⁰Atan sira sai duni ba dalan sira no halibur hamutuk ema hotu nebe sira hetan, diak no aat hodi halo fatin festa kaben nian nakonu ho bainaka. ¹¹Wainhira liurai tama atu hare bainaka sira, nia hare ema ida nebe la hatais unuk festa nian. ¹²Nia dehan ba ema ne’e: ‘Belun, oin sa o tama iha ne’e la hatais festa kaben nian?’ Ema ne’e nonok hela. ¹³Tan ne’e, liurai dehan ba atan sira: ‘Imi kesi metin nia liman ho ain, soe nia ba nakukun iha liur, iha neba, ema sei tanis no ruun nehan’ ¹⁴Basa Na’i bolu ema barak, maibe hili deit uitoan.”

Kona ba impostu ba Cesar

¹⁵Tuir mai, fariseu sira halibur an hamutuk hodi futu lia oin sa sira bele kaer Nia iha liafuan ruma. ¹⁶Sira haruka sira nia eskolante sira hamutuk ho herodianu sira atu dehan ba Nia: “Mestre, ami hatene katak Ita koalia lialos, Ita hanorin Maromak nia dalan ho lialos, la tauk ema ida, basa Ita la fihir ema. ¹⁷Ne’e duni, dehan mai ami Ita hanoin oin sa: bele selu impostu ba Cesar ka lae?” ¹⁸Tan hatene sira nia laran aat, Jesus hatan: “Laran makerek sira; tansa imi babeur Ha’u? ¹⁹Hatudu osan impostu nian mai” Sira hatudu denariu ida ba Nia. ²⁰Nia husu: “Ilas ho buat hakerek ne’e se nian?” ²¹Sira hatan: “Cesar nian” Ho ne’e, Jesus dehan ba sira: “Ne’e duni, imi fo ba Cesar buat nebe Cesar nian, no ba Maromak buat nebe Maromak nian.”

²²Rona tiha ne’e, sira hakfodak; hafoin sira la’o tiha.

Kona ba moris hi’as

²³Iha loron ne’e mos, saduseu sira nebe la fiar katak ema sei moris hi’as, ba buka Nia hodi husu ba Nia: ²⁴“Mestre, Moises hanorin katak: ‘Mane ruma mate karik oan la iha, nia alin sei hola feto faluk ida ne’e atu fo oan ba nia maun.’ ²⁵Iha ami le’et iha maun alin na’in hitu. Ida uluk kaben tiha, mate, la husik oan hodi husik deit nia feen ba nia alin. ²⁶Ida tuir mai mos hanesan; ida seluk mos hanesan, nune’e hotu to’o ida ikus. ²⁷Ikus liu hotu, feto ne’e mos mate. ²⁸Iha loron moris hi’as nian, sira na’in hitu ne’e ida nebe los mak feto nia laen, basa sira hotu hola nia?” ²⁹Jesus hatan ba sira: “Imi hanoin sala, basa imi la hatene Eskritura no Maromak nia kbiit. ³⁰Basa iha loron moris hi’as nian, mane no feto sira sei la hola malu tan, maibe sira sei sai hanesan anju sira iha lalehan. ³¹Kona ba moris hi’as housi mate, imi la le’e buat nebe Maromak dehan ba imi: ³²‘Ha’u mak Abraao nia Maromak, Isaac nia Maromak, no Jacob nia Maromak.’ Nia la’os ema mate sira nia Maromak, maibe ema moris sira nia Maromak!

³³Rona tiha ne’e, ema lubun boot hakfodak ho nia doutrina.

Ukunfuan nebe boot liu

³⁴Wainhira fariseu sira rona katak Jesus halo saduseu sira sai nonok, sira halibur an hamutuk. ³⁵Sira ida, doutor ukunfuan nian, husu hodi koko Nia: ³⁶“Mestre, ukunfuan ida nebe mak boot liu?” ³⁷Jesus hatan ba nia: “O sei hadomi Na’i, o nia Maromak ho neon ho laran, ho o nia klamar tomak. ³⁸Ida ne’e mak ukunfuan uluk no boot liu hotu. ³⁹Ida tuir mai hanesan nia: ‘O sei hadomi ema seluk hanesan o nia an rasik.’ ⁴⁰Ukunfuan rua ne’e, ukunfuan sira hotu no profeta sira nia hun.”

Kristu, David nia Oan

⁴¹Wainhira fariseu sira halibur an hamutuk, Jesus husu ba sira: ⁴²“Imi hanoin sa ida kona ba Kristu? Nia se nia Oan?” Sira hatan ba Nia: “David nia oan.” ⁴³Nia dehan ba sira: “Nune’e karik, tansa mak David, tuir Espiritu nia hanorin, hanaran Nia Na’i hodi dehan; ^{44 ‘}Na’i dehan ba ha’u nia Na’i: O tur iha Ha’u nia sorin kuana to’o loron Ha’u tau o nia funubalun sira iha O nia ain okos?’ ⁴⁵David hanaran nia karik Na’i, nusa mak Nia ninia oan fali?” ⁴⁶Ema hotu la hatene hatan ba Nia; no hahu housi loron ne’e, ema ida la berani tan atu husu Nia.

Hasouru eskriba no fariseu sira

¹Tuir mai Jesus koalia ba ema lubun boot no ba nia eskolante sira dehan: ²“Eskriba no fariseu sira tur iha Moises nia kadeira. ³Ne’e duni, simu ba hodi halo tuir buat hotu nebe sira dehan ba imi; maibe keta tuir sira nia hahalok, basa sira koalia maibe la halo. ⁴Sira futu naha todan no susar atu foti, hodi tau ba ema sira nia kabas, maibe sira rasik la book nia ho sira nia liman fuan ida. ⁵Sira halo buat hotu atu ema hare sira. Nune’e, sira kesi fita boot ida ba sira nia rentos hodi hanaruk sira nia tais ninin; ⁶sira kaan atu tur iha fatin uluk iha festa sira hodi buka tur iha oin iha sinagoga laran; ⁷sira hakarak ema kumprimenta sira iha prasa hodi bolu sira ‘Rabbi.’ ⁸Imi fali, keta husik ema hanaran imi ‘Rabbi’, basa imi nia Mestre ida deit, no imi hotu mesa maun alin. ⁹Keta bolu ema ida aman iha rai, basa imi nia Aman ida deit, nebe iha lalehan. ¹⁰Keta husik ema hanaran imi doutor, basa imi nia doutor ida deit: Kristu. ¹¹Ida nebe boot liu iha imi le’et sei sai imi nia atan. ¹²Ida nebe foti an, Na’i sei hatun nia; ida nebe haraik an, Na’i sei hahi nia.”

¹³“Susar boot ba imi, eskriba no fariseu sira, laran makerek, basa imi taka reinu lalehan nian ba ema sira; imi la tama, no mos la husik ema seluk nebe hakarak atu tama. ¹⁴Susar boot ba imi, eskriba no fariseu sira, laran makerek. Imi han mohu feto faluk sira nia uma hodi lohi sira ho imi nia orasaun nar-naruk; tan ne’e iha loron justisa nian, imi sei hetan kastigu todan liu. ¹⁵Susar boot ba imi eskriba no fariseu sira, laran makerek. Imi hakur tasi la’o lemo rai hodi dada ema hotu tuir imi nia fiar no wainhira ida monu iha imi nia liman, imi halo nia sai infernu nia oan dala rua aat liu fali imi. ¹⁶Susar boot ba imi, matadalan sira nebe matan delek! Imi dehan: ‘Ema jura karik hodi templu, ne’e la folin buat ida; maibe ema jura karik hodi osan mean templu nian, nia ten ke halo tuir.’ ¹⁷Beikten no matan delek sira! Ida nebe mak folin liu: osan mean, ka templu nebe halo santu osan mean? ¹⁸Imi dehan tan: ‘Ema ruma jura karik hodi altar, ne’e la folin buat ida; maibe nia jura karik hodi buat karan nebe iha altar leten, nia ten ke halo tuir.’ ¹⁹Matan delek sira! Ida nebe mak folin liu; buat karan, ka altar nebe halo santu buat karan? ²⁰Ne’e duni, se jura hodi altar, jura hodi altar no ba buat nebe iha nia leten. ²¹Ema nebe jura hodi templu, jura hodi templu no mos ba Ida nebe horik iha nia. ²²Ema nebe jura hodi lalehan, jura hodi Maromak nia tur fatin no mos hodi Ida nebe tur iha nia. ²³Susar ba imi, eskriba no fariseu sira, laran makerek! Imi selu du’ut morin sira nia impostu hodi tau ba kotuk buat hirak nebe boot liu iha ukunfuan: justisa, laran luak no fiar metin. Tuir lolos, imi sei halo tuir buat hirak ne’e hodi la hewai buat seluk. ²⁴Imi matadalan matan delek sira ba ema matan delek sira. Imi tais susuk maibe tolan kuda kamelu!

²⁵Susar boot ba imi, eskriba no fariseu sira, laran makerek! Imi hamos kopu no bikan sira housi liur, maibe iha laran, sira nakonu ho na’ok no buat foer. ²⁶Fariseu matan delek sira, hamos uluk kopu no bikan laran ba atu bele sai mos iha liur. ²⁷Susar ba imi, eskriba no fariseu sira, laran makerek! Imi hanesan rate sira nebe pinta mutin, furak iha liur, maibe iha laran nakonu ho mate ruin no buat dodok oi-oin. ²⁸Nune’e mos imi nebe ema hare mos iha liur maibe iha laran nakonu ho lia bosok no hahalok aat. ²⁹Susar ba imi, eskriba no fariseu sira, laran makerek, basa imi hada rate ba profeta sira hodi hafutar ho buat kmanek ema diak sira nia rate ³⁰dehan: ‘Ita moris karik iha ita bei ala sira nia tempu, ita liman la foer hanesan sira nian ho profeta sira nia ran’. ³¹Nune’e imi hatudu katak imi ema sira nebe oho profeta sira nia bei oan! ³²Ne’e duni, imi halo to’o rohan buat nebe imi nia bei ala sira hahu!”

³³“Samea sira, samea nia oan sira! Oin sa mak imi bele halai housi kastigu infernu nian? ³⁴Tan ne’e Ha’u haruka ba imi profeta no ema matenek no eskriba sira. Sira balun, imi sei oho hodi hedi ba krus; sira seluk imi sei baku iha imi nia sinagoga sira, imi sei duni sira housi sidade ida ba sidade seluk. ³⁵Nune’e sei nakfakar ba imi leten ema sala laek sira nia ran hotu nebe nakfakar iha rai, hahu housi Abel sala laek nia ran, to’o Zacarias, Baraquias nia oan, nebe imi oho iha santuariu no altar nia klaran. ³⁶Tebes, Ha’u dehan ba imi, buat ne’e hotu sei fo todan ba derasaun ne’e.”

³⁷“Jerusalem, Jerusalem, nebe oho profeta sira, nebe tuda ho fatuk ema sira nebe Na’i haruka ba o! Dala hira ona mak Ha’u hakarak halibur hamutuk o nia oan sira, hanesan manu inan halibur nia oan sira iha nia liras okos, maibe o lakohi! ³⁸Tan ne’e imi nia uma sei sai mamuk. ³⁹Basa Ha’u dehan ba imi katak imi sei la hare tan Ha’u to’o loron nebe imi dehan: ‘Rahun diak ba ida nebe mai hodi Na’i nia naran.’”

Templu sei naksobu rahun

¹Jesus sai dau-daun housi templu no nia eskolante sira hakbesik Nia hodi hatudu ba Nia uma kreda boot ne’e. ²Nia hatan ba sira dehan: “Imi hare buat ne’e? Tebes, Ha’u dehan ba imi katak fatuk ida sei la hela iha fatuk seluk nia leten iha ne’e, sei naksobu hotu.”

³Hafoin, wainhira Nia tur iha Foho Oliveira nian, eskolante sira hakbesik Nia hodi husu mesa-mesak ba Nia; “Dehan mai ami wainhira buat ne’e hotu sei mosu, sinal ida nebe mak sei hatudu Ita nia hiit An mai, no mundu ne’e atu hotu.”

Tempu susar no terus nian

⁴Jesus hatan ba sira: “Keta husik ema lohi imi. ⁵Basa ema barak sei mai hodi Ha’u nia naran dehan; ‘Ha’u mak Kristu.’ Ho ne’e, sira sei lohi ema barak. ⁶Imi sei rona koalia kona ba funu, lia kona ba funu nian: keta laran taridu, basa buat ne’e sei mosu duni, maibe rohan seidauk to’o. ⁷Tebes, povu sei hamriik hasouru povu, reinu hasouru reinu; rai sei hamlaha no nakdoko iha fatin oi-oin. ⁸Ne’e hotu sei hatudu katak terus foin hahu. ⁹Iha tempu ne’e sira sei haterus imi no oho imi; povu hotu sei odi imi tan Ha’u nia naran. ¹⁰Ema barak sei monu ba aat; sira sei bobar lia ba malu, sei rai odi ba malu. ¹¹Profeta falsu barak sei mosu no sira sei lohi ema barak. ¹²Tamba hahalok aat sira sei sai wa’in liu tan, ema barak nia domin sei namlaek. ¹³Maibe ema nebe fiar metin to’o rohan sei hetan maksoin. ¹⁴No lia foun reinu nian ne’e, ema sei haklaken iha mundu tomak hodi fo sasin ba povu hotu. Iha oras neba, buat hotu nia rohan sei to’o mai. ¹⁵Ne’e duni, wainhira imi hare buat aat boot nebe Profeta Daniel dehan nanis mosu iha fatin santu -- ema nebe le’e buka hatene ba --, ¹⁶iha oras ne’e ema sira nebe iha Judeia halai ba foho ba; ¹⁷ema nebe iha uma nia kakuluk, keta tun atu foti buat ida iha uma laran; ¹⁸ida nebe iha to’os laran, keta fila atu foti nia manta. ¹⁹Susar boot ba feto sira nebe isin rua no sira nebe fo susu ba nia oan iha loron hirak ne’e! ²⁰Imi harohan ba, atu imi lalika halai iha tempu malirin ka iha loron Sabadu. ²¹Basa iha loron ne’e, terus sei sai boot teb-tebes: houri mundu hahu to’o ohin seidauk mosu terus hanesan ne’e; aban bainrua mos sei la hetan. ²²Loron ne’e la sai badak karik, ema hotu sei lakon, maibe tamba sira nebe Na’i fihir ona loron ne’e sei sai badak duni. ²³Wainhira ema ida hateten ba imi, ‘Kristu mak ne’e’, ‘Mak neba’, keta fiar. ²⁴Basa kristu falsu no profeta falsu sira sei mosu hodi hatudu sinal boot no milagre sira hodi lohi, bele karik, sira mos nebe Na’i fihir ona. ²⁵Ha’u fo hatene ne’e nanis kedas.”

Oan Mane sei mai fali

²⁶“Ne’e duni, sira dehan karik ba imi: ‘Nia iha rai fuik maran,’ imi keta ba neba. Ka: ‘Nia iha uma laran,’ keta fiar. ²⁷Basa nudar railakan nabilan housi loromonu to’o lorosa’e, nune’e mak Oan Mane nia hiit An mai. ²⁸Iha fatin nebe isin mate hela, iha neba mos manu makikit sei halibur hamutuk. ²⁹Liu tiha susar boot loron hirak ne’e nian, loron sei nakukun, fulan sei la nabilan tan, fitun sira sei monu housi lalehan, lalehan nia kbiit sei nakdoko. ³⁰Hafoin Oan Mane nia sinal sei mosu iha lalehan, povu sira hotu iha raiklaran sei baku sira nia hirus matan, no sira sei hare Oan Mane mai housi kalohan leten ho kbiit no kmanek wa’in. ³¹Nia sei haruka nia anju sira ho trombeta boot no sira sei halibur sira nebe Nia fihir ona housi anin hat, housi lalehan nia hun to’o nia rohan.”

Aiknanoik ai figueira nian

³²“Buka hatene ba housi ai figueira aiknanoik ida ne’e: wainhira nia sanak sira sai nurak no dikin sira mosu mai, imi hatene katak bainloron besik ona. ³³Nune’e mos, wainhira imi hare buat ne’e hotu, imi hatene katak Nia besik ona odamatan. ³⁴Tebes, Ha’u dehan ba imi: derasaun ne’e sei la liu molok buat sira ne’e hotu sei mosu mai. ³⁵Lalehan no rai sei liu, maibe Ha’u nia liafuan sei la liu.

Hein loron ikus

³⁶“Kona ba loron no oras ne’e, ema ida la hatene: anju sira iha lalehan mos la hatene, Oan Mane mos lae; Aman deit mak hatene. ³⁷Hanesan iha Noe nia loron, nune’e mos Oan Mane nia hiit An mai. ³⁸Nudar iha loron hirak neba, molok rai naben, ema sira han, hemu, kaben no fo kaben, to’o loron nebe Noe tama ba ro; ³⁹sira la hatene buat ida to’o rai naben mai no sira hotu mate, nune’e mos sei mosu wainhira Oan Mane hiit An mai. ⁴⁰Mane na’in rua sei iha to’os laran: ida ema sei lori, ida seluk sei husik hela; ⁴¹feto na’in rua sei fai aihan iha lesun; ida ema sei lori, ida seluk sei husik hela. ⁴²Ne’e duni, matan moris ba basa imi la hatene iha loron nebe mak imi nia Na’i hiit An mai. ⁴³Hatene ba ida ne’e: uma na’in hatene karik tuku hira ahuna’in sei mai, nia sei matan moris no sei la husik sobu nia uma. ⁴⁴Tan ne’e imi mos matan moris ba, basa imi la hatene iha sa oras Oan Mane sei mai.”

Aiknanoik atan badinas nian

⁴⁵“Ne’e duni, se los mak emar laran metin no matenek nebe na’i haruka atu tau matan ba nia atan sira hodi fo han sira iha tempu lolos? ⁴⁶Ksolok ba atan nebe, wainhira na'i fila mai, nia sei hetan nia badinas nune’e. ⁴⁷Tebes, Ha’u dehan ba imi katak Na’i sei tau nia rikusoi tomak iha nia liman. ⁴⁸Maibe, emar aat ne’e dehan karik ba nia an: ‘Ha’u nia Na’i sei tarda tan,’ ⁴⁹no baku nia maluk sira hodi han no hemu ho lanuten sira; ⁵⁰atan ne’e nia Na’i sei mai iha loron nebe nia la hein no iha oras nebe nia la hatene. ⁵¹Na’i sei fo kastigu todan ba nia hodi tau nia hamutuk ho ema laran makerek sira; iha neba ema sei tanis no ruun nehan.

Aiknanoik fetoran sanulu nian

¹“Reinu lalehan nian sei hanesan fetoran sanulu nebe kaer tiha nia ahi oan hodi ba hasouru noivu. ²Sira na’in lima beik, na’in lima seluk matenek. ³Sira nebe beik lori sira nia ahi oan, maibe la lori mina; ⁴sira nebe matenek lori mos mina iha botil, hamutuk ho sira nia ahi oan. ⁵Noivu la mai lalais; sira matan dukur no toba ona. ⁶Maibe iha kalan fahe rua, ema hakilar: ‘Noivu mai ona, imi ba hasouru nia!’ ⁷Fetoran sira hotu hader hodi hadia sira nia ahi oan. ⁸Fetoran beik sira dehan ba matenek sira: ‘Fo imi nia mina uitoan mai ami, basa ami nia ahi oan atu mate dau-daun.’ ⁹Maibe matenek sira hatan: “Keta la to’o ba ami no ba imi, diak liu imi ba sira nebe fa’an hodi sosa ba imi nia an rasik.’ ¹⁰Wainhira sira ba sosa, noivu to’o mai, no sira nebe prontu ona tama hamutuk ho nia ba festa kaben nian, no ema taka tiha odamatan. ¹¹Tuir mai, fetoran sira seluk mos to’o mai dehan: ‘Na’i, Na’i, loke odamatan mai ami!’ ¹²Maibe nia hatan: ‘Tebes, Ha’u dehan ba imi katak ha’u la hatene imi.’ ¹³Ne’e duni, imi matan moris neon na’in, basa imi la hatene loron ka oras.”

Aiknanoik osan talenta sira nian

¹⁴“Sei hanesan mos ema ida nebe, molok atu ba la’o rai, bolu nia atan sira hodi husik nia rikusoi ba sira. ¹⁵Ba ida nia fo osan talenta lima, ba ida seluk nia fo rua, ba ida seluk tan nia fo ida; ba ida-ida tuir nia kbiit. Hafoin nia la’o tiha. ¹⁶Ida nebe simu talenta lima ne’e, fila liman kedas ho sira hodi manan tan lima. ¹⁷Nune’e mos, ida nebe simu rua, manan tan rua, ¹⁸maibe, ida nebe simu deit ida, ba ke’e rai kuak hodi hakoi subar nia na’i nia osan. ¹⁹Kleur tiha, atan sira ne’e nia na’in fila mai hodi husu sira kona ba nia osan. ²⁰Ida nebe simu talenta lima hakbesik hodi fo fali lima tan ba nia dehan: ‘Na’i, ita fo talenta lima mai ha’u, talenta lima tan nebe ha’u manan mak ne’e.’ ²¹Na’i dehan ba nia: ‘Diak los, atan diak no laran los; tan o hatudu laran los iha buat nebe uitoan, ha’u sei fo buat barak ba o atu tau matan. Tama ba o na’i nia ksolok.’ ²²Tuir mai ida nebe simu talenta rua hakbesik dehan: ‘Na’i, ita fo mai ha’u talenta rua; rua seluk nebe ha’u manan mak ne’e.’ ²³Na’i hatan ba nia: ‘Diak los, atan diak no laran los; tan o hatudu laran los iha buat nebe kiik, ha’u sei fo ba o buat barak atu tau matan . Tama ba o na’i nia ksolok.’ ²⁴Ikus liu ida nebe simu talenta ida deit mosu mai dehan: ‘Ha’u hatene ita boot ema maka’as nebe ku’u iha nebe ita la kuda, halibur iha nebe ita la lekar. ²⁵Tan ne’e ho tauk ha’u ba subar tiha ita nia osan iha rai; buat nebe ita nian mak ne’e.’ ²⁶Na’i hatan ba nia: ‘Atan aat no barukten! O hatene katak ha’u ku’u iha nebe ha’u la kuda, ha’u halibur iha nebe ha’u la lekar. ²⁷Ne’e duni, tuir lolos o sei lori ha’u nia osan ba banku; nune’e, fila tiha mai, ha’u bele foti ha’u nia osan ho funan. ²⁸Ne’e duni, imi hasa’e tiha talenta housi nia hodi fo ba ida nebe iha sanulu. ²⁹Basa ba ida nebe iha ona sei fo tan hodi hetan barak liu; maibe ba ida nebe la iha, uitoan nebe nia iha sei hasai tan housi nia. ³⁰Kona ba atan folin laek ne’e, imi soe tiha nia ba nakukun iha liur, iha neba nia sei tanis no ruun nehan.’”

Justisa iha loron ikus

³¹“Wainhira Oan Mane mai iha nia gloria no nia anju sira hotu hamutuk ho Nia, Nia sei tur iha nia kadunan gloria nian. ³²Povu hotu sei halibur an iha nia oin. Nia sei haketak ema sira hanesan bibi atan haketak bibi malae housi bibi Timor. ³³Nia sei tau bibi malae iha nia sorin kuana, bibi Timor iha nia sorin karuk. ³⁴Tuir mai, liurai sei dehan ba sira nebe iha nia sorin kuana: ‘Mai, imi nebe Ha’u Aman fo bensa, mai simu nudar liman rohan reinu nebe hadia tiha ba imi houri mundu hahu. ³⁵Basa Ha’u hamlaha, imi fo han Ha’u; Ha’u hamrook, imi fo hemu Ha’u; Ha’u la’o rai, imi simu Ha’u; ³⁶Ha’u isin tanan, imi fo hatais Ha’u; Ha’u moras, imi ba hare Ha’u; Ha’u iha dadur laran, imi ba hare Ha’u.’ ³⁷Iha oras ne’e ema diak sira sei hatan ba Nia: ‘Na’i, wainhira los mak ami hare Ita Boot hamlaha, ami fo han; hamrook, ami fo hemu? ³⁸Wainhira los mak ami hare Ita Boot la’o rai, ami simu; eh ho isin tanan, ami fo hatais? ³⁹Wainhira los mak ami hare Ita moras eh iha dadur laran, ami ba hare Ita?’ ⁴⁰Liurai sei hatan ba sira: ‘Tebes, Ha’u dehan ba imi: wainhira imi halo buat ne’e ba ha’u nia alin kiik sira ne’e ida, imi halo mai Ha’u rasik.’”

⁴¹“Tuir mai, Nia sei dehan ba sira iha nia sorin karuk: ‘Imi hadook an housi Ha’u, imi sira nebe simu malisan, ba ahi rohan laek nebe hadia hela ba diabu ho nia anju sira. ⁴²Basa Ha’u hamlaha, imi la fo han Ha’u; Ha’u hamrook, imi la fo hemu Ha’u; ⁴³Ha’u la’o rai, imi la simu Ha’u; Ha’u isin tanan, imi la fo hatais Ha’u; Ha’u moras, Ha’u iha dadur laran, imi la ba hare Ha’u.’ ⁴⁴Sira mos sei hatan: ‘Wainhira mak ami hare Ita Boot hamlaha ka hamrook, la’o rai ka isin tanan, moras ka iha dadur laran, ami la tulun?’ ⁴⁵Iha oras ne’e, Nia sei hatan ba sira: ‘Tebes, Ha’u dehan ba imi: wainhira imi la halo buat ne’e ba kiik oan liu sira ne’e ida, imi la halo mai Ha’u.’ ⁴⁶Sira ne’e sei hetan terus rohan laek, sira nebe diak sei hetan moris rohan laek.”

Judeu sira futu lia

¹Koalia hotu tiha, Jesus dehan ba nia eskolante sira: ²“Nudar imi hatene, loron rua tan Paskua ona; ema sei saran Oan Mane atu hedi Nia ba krus.”

³Amlulik boot sira nian ho katuas sira povu nian halibur an iha amlulik boot naran Kaifas nia uma boot, ⁴hodi hakotu lia atu, hodi lohi, kaer no oho Nia. ⁵Maibe sira dehan: “Ita keta halo buat ne’e iha loron festa, atu povu la bele hamriik hasouru.”

Mina morin iha Betania

⁶Wainhira Jesus iha Betania, iha Simao nebe moras lepra nia uma, ⁷feto ida lori botil ho mina morin folin boot hodi hakbesik ba Nia nebe tur dau-daun iha meja, no fakar ba nia ulun. ⁸Hare tiha ne’e, eskolante sira hirus dehan: “Tansa soe deit buat ne’e? ⁹Basa mina morin ne’e bele fa’an ho folin boot no bele fo osan ne’e ba ema kiak sira. ¹⁰Maibe hatene tiha buat ne’e, Jesus dehan ba sira “Tansa imi hasusar feto ne’e? Nia halo buat diak mai Ha’u. ¹¹Basa imi hetan nafatin ema kiak sira iha imi le’et; Ha’u fali, imi sei la hetan nafatin. ¹²Nia fakar mina morin ne’e ba ha’u nia isin hodi hadia ona Ha’u ba rate. ¹³Tebes, Ha’u dehan ba imi: iha fatin hotu iha mundu tomak nebe ema sei haklaken liafoun diak ne’e, ema sei haktuir nafatin buat nebe nia foin halo hodi hanoin nia.”

Judas koalia ho amlulik boot sira

¹⁴Tuir mai, sira na’in sanulu resin rua ne’e ida naran Judas Iscariotes, ba buka amlulik boot sira ¹⁵hodi dehan ba sira: “Ha’u saran karik Nia ba imi liman, imi hakarak fo hira mai ha’u?” Sira hakotu osan mutin tolu nulu ba nia. ¹⁶Houri oras ne’e, nia buka tempu diak ida atu saran Jesus.

Han kalan ba dala ikus

¹⁷Iha loron uluk festa Paun fermentu laek nian, nia eskolante sira ba husu Jesus; “Ita hakarak ami ba hadia ba Ita sasan atu han Paskua iha los nebe?” ¹⁸Nia hatan: “Ba hasouru ema ida iha sidade hodi dehan ba nia: ‘Mestre dehan: ‘Ha’u nia tempu besik ona; iha o nia uma mak Ha’u sei halo Paskua hamutuk ho ha’u nia eskolante sira.’” ¹⁹Eskolante sira halo tuir nudar Jesus haruka hodi hadia sasan ba Paskua. ²⁰To’o ona loraik, Nia tur iha meja hamutuk ho sira na’in sanulu resin rua. ²¹Wainhira sira han dau-daun, Nia dehan: “Tebes, Ha’u dehan ba imi; imi ida sei saran Ha’u.” ²²Ho neon nakraik teb-tebes, sira ida-ida hahu dehan ba nia: “Keta ha’u karik, Na’i?” ²³Nia hatan: “Ida nebe hatama nia liman hamutuk ho Ha’u iha bikan, nia mak sei saran Ha’u. ²⁴Oan Mane tuir nia dalan nudar hakerek nanis ona kona ba Nia; maibe susar boot ba ema nebe saran Oan Mane ba mate: nia la moris karik kala diak liu!” ²⁵Judas, ida nebe saran Nia dehan; “Keta ha’u karik, Mestre?” Jesus hatan ba nia: “O rasik mak dehan.”

Eukaristia ba dala uluk

²⁶Wainhira sira han dau-daun, Jesus kaer paun, haraik bensa, silu hodi fahe ba nia eskolante sira dehan: “Simu no han ba: ne’e Ha’u nia isin.” ²⁷No Nia kaer kalis, fo tiha agradese, fo ba sira dehan: “Imi hotu, hemu ba: ²⁸ne’e Ha’u nia ran moruk foun nian nakfakar ba ema barak atu kasu sala. ²⁹Ha’u dehan ba imi: Ha’u sei la hemu tan fuan uvas ne’e to’o loron nebe Ha’u sei hemu fali nia hamutuk ho imi iha Ha’u Aman nia reinu.”

Pedro sei heli lia

³⁰Hananu tiha knananuk ida, sira sai ba Foho Ai Oliveira nian. ³¹Jesus dehan ba sira: “Kalan ne’e imi laran la metin iha Ha’u, basa hakerek nanis ona; ‘Ha’u sei baku bibi atan, bibi sira luhan nian sei namkari.’ ³²Maibe moris hi’as tiha housi mate, Ha’u sei ba uluk liu imi iha Galileia.” ³³Pedro hatan ba Nia dehan: “Maski ema hotu laran la metin iha Ita Boot, ha’u lae!” ³⁴Jesus dehan ba nia: “Tebes, Ha’u dehan ba o katak iha kalan ne’e, molok manu kokorek, o sei nega Ha’u dala tolu.” ³⁵Pedro simu: “Maski ha’u mate ho Ita Boot, ha’u sei la nega Ita.” Eskolante sira hotu mos dehan nune’e.

Orasaun iha to’os

³⁶Jesus ba ho sira iha to’os ida naran Getsemani. Nia dehan ba eskolante sira: “Tur lai iha ne’e. Ha’u sei ba iha neba halo orasaun. ³⁷Nia lori tiha Pedro ho Zebedeu nia oan rua, Nia hahu laran susar no terus. ³⁸Nia dehan ba sira: “Ha’u laran susar to’o mate; imi hela iha ne’e hodi hader ho Ha’u.” ³⁹La’o uitoan ba oin, Nia monu taka oin ba rai hodi harohan no dehan: “Ha’u Aman, bele karik, hadook tiha kalis ne’e housi Ha’u; maibe la’os nudar Ha’u hakarak, maibe nudar Ita nian.”

⁴⁰Fila tiha ba eskolante sira, Nia hetan sira toba hela. Nia dehan ba Pedro: “Imi la bele hader netik ho Ha’u oras ida deit? ⁴¹Matan moris no harohan ba atu imi keta monu ba babeur. Espiritu hakarak maibe isin kbiit laek.”

⁴²Dala ida tan,Nia hadook An hodi harohan: “Ha’u Aman, kalis ne’e la liu karik, maibe Ha’u sei hemu nia, halo tuir Ita hakarak ba!” ⁴³Fila fali, Nia hetan sira toba hela, basa sira matan dukur tebes. ⁴⁴Husik tiha sira ba dala tolu ona, Nia ba atu harohan hodi dehan liafuan sira uluk. ⁴⁵Tuir mai Nia fila fali ba nia eskolante sira hodi dehan ba sira: “Oras ne’e imi bele toba hodi deskansa. Oras besik ona atu Oan Mane monu ba ema maksalak sira liman. ⁴⁶Hamriik ba! Ita la’o ona! Ema nebe atu saran Ha’u besik ona mai!”

Sira kaer Jesus

⁴⁷Jesus sei koalia hela wainhira Judas, sira na’in sanulu resin rua ida, mosu mai ho ema lubun boot, nebe kaer surik no aidona, housi amlulik boot sira no katuas sira povu nian. ⁴⁸Ida nebe atu saran Nia fo tiha sinal ida ba sira dehan: “Ida nebe ha’u rei mak Nia, kaer Nia!” ⁴⁹Nia hakbesik Jesus hodi dehan: “Salve, Mestre!” Hafoin nia rei Nia. ⁵⁰Jesus dehan nia: “Belun, o mai atu halo sa ida?” Tuir mai sira hakat ba oin, tau liman ba Jesus hodi kaer Nia. ⁵¹Teki-teki ida housi sira nebe hamutuk ho Jesus losu nia surik, ta amlulik boot nia atan ida hodi tesi tiha nia tilun. ⁵²Jesus dehan ba nia: “Hatama o nia surik ba nia fatin, basa ema hotu nebe kaer surik, sei mate ho surik. ⁵³O hanoin katak Ha’u la bele harohan ba Ha’u Aman atu haruka kedas mai Ha’u anju lubun sanulu resin rua? ⁵⁴Maibe oin sa mak sei halo tuir Eskritura sira nebe dehan katak buat hotu sei sai nune’e?” ⁵⁵Iha oras neba, Jesus dehan ba ema lubun boot: ‘Imi mai hanesan hasouru na’okten ruma, ho surik no aidona atu kaer Ha’u. Loron loron Ha’u tur iha templu hodi hanorin, imi la kaer Ha’u. ⁵⁶Maibe buat sira ne’e hotu mosu atu halo tuir Eskritura Profeta sira nian.” Eskolante sira hotu husik Nia hodi halai lakon.

Jesus iha tribunal

⁵⁷Ema sira nebe kaer Jesus lori Nia ba Kaifas, amlulik boot; iha neba eskriba sira ho katuas sira povu nian halibur an hamutuk. ⁵⁸Pedro tuir Nia housi dook to’o amlulik boot nia uma liur. Tama tiha, nia tur hamutuk ho atan sira atu hare buat ne’e nia rohan.

⁵⁹Amlulik boot sira no Sinedrio tomak buka lia sasin bosok hasouru Jesus atu bele saran Nia ba mate; ⁶⁰maibe sira la hetan, maski sasin bosok barak mosu mai. Ikus mai, sasin rua mosu dehan: ⁶¹“Ema ne’e hateten: ‘Ha’u bele sobu tiha Maromak nia templu no harii fali nia iha loron tolu nia laran.’” ⁶²Amlulik boot hamriik hodi husu ba Nia: “O la hatan ba lia sasin hirak ne’e hasouru O?” ⁶³Maibe Jesus nonok deit. Amlulik dehan teni ba Nia: “Hodi Maromak moris nia naran ha’u husu O atu dehan lolos; O mak Kristu, Maromak moris nia Oan?” ⁶⁴Jesus hatan ba nia: “Ita rasik hateten nia. Maibe Ha’u dehan ba imi: houri ohin imi sei hare Oan Mane tur iha Kbiit Na’in nia sorin kuana, hodi tun mai iha kalohan leten lalehan nian.” ⁶⁵Ho ne’e, amlulik boot les nia hatais hodi dehan: “Nia koalia aat hasouru Maromak! Ita kuran tan sasin sa? Imi rasik mak rona nia lia aat. ⁶⁶Imi hanoin sa?” Sira hatan: “Nia soi atu mate!”

⁶⁷Tuir mai sira tafui ba Nia oin hodi basa Nia. Sira seluk baku Nia hodi dehan: ⁶⁸“Kristu, se mak baku o?”

Pedro nega Jesus

⁶⁹Pedro tur dau-daun iha uma oin, atan feto ida hakbesik ba nia dehan; “O mos hamutuk ho Jesus Galileia nian.” ⁷⁰Maibe nia heli lia iha ema hotu nia oin dehan; “Ha’u la hatene buat nebe o hateten!” ⁷¹Nia sai tiha ba liur, atan feto seluk hare nia hodi dehan ba sira nebe iha neba: “Ida ne’e mos hamutuk ho Jesus Nazare nian.” ⁷²Dala ida tan nia heli lia ho juramentu: “Ha’u la hatene ema ne’e.” ⁷³La kleur, sira nebe iha neba hakbesik ba Pedro hodi dehan: “Los duni, o mos sira ne’e ida, basa o nia koalia hatudu o.” ⁷⁴Nia hahu hotar no jura: “Ha’u la hatene ema ne’e!” Iha oras ne’e kedas, manu kokorek. ⁷⁵Pedro hanoin hetan liafuan nebe Jesus dehan nanis: “Molok manu kokorek, o sei nega Ha’u dala tolu.” Hafoin, sai tiha ba liur, nia tanis ho neon sala.

Jesus iha Pilatos nia oin

¹Dadersan hela, amlulik boot hotu ho katuas sira povu nian halibur hamutuk hodi hakotu lia atu oho Jesus. ²Sira futu Nia, hafoin lori hodi saran Nia ba emboot Pilatos.

Judas nia mate

³Wainhira Judas nebe saran Nia hare katak sira tesi lia hasouru Nia, nia hakribi nia sala no ba lori fali osan mutin tolu nulu ba amlulik boot sira no ba katuas sira hodi ⁴dehan: ^“Ha’u sala hodi saran ran sala laek.” Sira hatan: “Ne’e sa ba ami? O hare rasik ba!” ⁵Soe tiha osan sira iha templu, nia hadook an, sai hodi ba tara an. ⁶Amlulik boot sira kaer osan mutin sira ne’e dehan: “Ita la bele tau osan ne’e iha osan fatin, basa ne’e ran nia folin.” ⁷Koalia hamutuk tiha, sira ba sosa to’os ema halo sana rai nian atu halo rate ida ba ema la’o rai sira. ⁸Tamba ne’e, to’o ohin loron ema hanaran to’os ne’e rai ran ninian.” ⁹Nune’e sai tuir duni lia nebe profeta Jeremias dehan nanis: “Sira kaer osan mutin tolu nulu, folin nebe Israel oan sira hanoin naton atu sosa Nia, ¹⁰hodi ba sosa rai ema halo sana nian nia to’os nudar Na’i haruka ha’u.”

¹¹Jesus hamriik iha emboot nia oin nebe husu ba Nia: “O Judeu sira nia liurai?” Jesus hatan: “Ita rasik mak dehan.” ¹²Maibe wainhira amlulik boot sira ho katuas sira dun Nia, Nia la hatan buat ida. ¹³Tan ne’e, Pilatos dehan ba Nia: “O la rona buat hotu nebe sira hasasin hasouru O?” ¹⁴Maibe Nia la hatan buat ida, halo emboot hakfodak teb-tebes.

¹⁵Iha loron festa, emboot toman atu husik sai housi kadeia ema dadur ida nebe povu hakarak. ¹⁶Iha ema dadur ida ho naran Barrabas nebe ema hotu hatene. ¹⁷Wainhira povu halibur an hamutuk, Pilatos husu ba sira: “Imi hakarak ha’u husik ida nebe: Barrabas, ka Jesus nebe ema hanaran Kristu?” ¹⁸Basa nia hatene katak sira saran Nia tan laran moras. ¹⁹Wainhira Pilatos tur hela iha tribunal, nia feen haruka dehan ba nia: “O keta tama kahur tan ho ema diak ne’e, basa ohin ha’u terus teb-tebes iha mehi kona ba Nia.” ²⁰Maibe amlulik boot sira ho katuas sira soran povu atu husu Barrabas hodi oho Jesus. ²¹Emboot husu ba sira: “Sira na’in rua ne’e, imi hakarak ha’u husik ida nebe los?” Sira hatan: “Barrabas!” ²²Pilatus dehan ba sira: “Ba Jesus nebe ema hanaran Kristu, ha’u sei halo sa ida?” Sira hatan: “Hedi Nia ba krus!” ²³Ne’e duni, Pilatus dehan: “Nia halo aat sa ida?” Maibe sira hatan ho lia maka’as liu tan: “Hedi Nia ba krus!” ²⁴Wainhira Pilatus hare katak nia la bele halo tan buat ida, basa ema sira hetok haklalak liu tan, nia fase liman iha ema lubun boot nia oin hodi dehan: “Ha’u nia liman mos kona ba ema ne’e nia ran: imi mak hare ba.” ²⁵Povu tomak hatan: “Husik nia ran monu iha ami no ba ami nia oan sira leten!” ²⁶Tuir mai Pilatos husik Barrabas ba sira, maibe haruka baku Jesus hodi saran Nia ba sira atu hedi Nia ba krus.

Jesus to’o mate iha krus

²⁷Emboot nia soldadu sira lori Jesus ba pretoriu. Iha neba soldadu sira hotu hale’u Nia. ²⁸Sira kolu nia hatais hodi taka fali ho unuk mean ida. ²⁹Hafoin sira leu aitarak hamutuk hodi tau iha nia ulun; sira halo Nia kaer fafulu ida ho nia liman los. Sira hakneak iha nia oin hodi hamoe Nia dehan: “Salve, Judeu sira nia liurai!” ³⁰Tuir mai sira tafui ba Nia, kaer fafulu ne’e hodi baku nia ulun. ³¹Hamoe tiha Nia, sira kolu unuk mean hodi fo fali nia hatais. Hafoin sira lori Nia atu hedi iha krus. ³²Wainhira sira sai ona, sira hetan mane ida housi rai Sirene, naran Simao hodi obriga nia atu lori Jesus nia krus. ³³To’o tiha fatin ida naran Golgota, katak “fatin ulun ruin nian,” ³⁴sira fo tua kahur naan horun ba Nia; maibe koko tiha, Nia lakohi hemu. ³⁵Hedi tiha Nia iha krus, sira fahe ba malu nia hatais sira hodi koko sorte; ³⁶hafoin sira tur iha neba hodi hein Nia. ³⁷Iha nia ulun leten sira hakerek lia nebe fo sai hasouru Nia: “Ne’e Jesus, Judeu sira nia liurai.” ³⁸Hamutuk ho Nia, sira hedi mos iha krus ema naokten rua, ida iha sorin los, ida iha sorin karuk. ³⁹Sira nebe liu dau-daun, hateten aat Nia, doko ulun dehan: ⁴⁰“O nebe sobu templu no harii fali nia iha loron tolu nia laran, soi O nia an ba! O Maromak nia Oan karik, tun housi krus ba! ⁴¹Na’ilulik boot no eskriba sira ho katuas sira mos hamoe Nia hodi dehan: ⁴²“Nia soi ema seluk, maibe la bele soi Nia an rasik! Nia liurai Israel nian, tun lai housi krus, hafoin ita sei fiar nia! ⁴³Nia tau laran metin ba Maromak: Maromak hakarak karik, husik Maromak soi Nia, basa Nia dehan: ‘Ha'u Maromak nia Oan.” ⁴⁴Ahuna’in sira nebe hedi ho Nia iha krus mos hateten aat Nia nune’e.

⁴⁵Hahu loron fahe rua to'o tuku tolu loraik, rai tomak sai nakukun. ⁴⁶Besik tuku tolu Jesus hakilar ho lia maka'as: “Eli, Eli lama sabaktani?” katak, “Maromak, Ha’u nia Maromak tansa Ita husik Ha’u mesak?” ⁴⁷Rona tiha ne'e, ema balun nebe iha neba dehan: “Nia bolu Elias!” ⁴⁸Sira ida halai kedas, hola espunia nebe habokon iha tua sin, tau iha fafulu ida hodi fo hemu Nia. ⁴⁹Maibe sira seluk dehan: “Husik ba! Hare to'ok Elias mai soi Nia, ka lae!” ⁵⁰Tu'ir mai, hakilar maka'as dala ida tan, Jesus iis kotu.

⁵¹Iha oras neba, kurtina templu nian nakles fahe ba rua, housi leten to'o kraik. Rai nakdoko, fatuk sira nakfera; ⁵²rate sira nakloke. Ema santu sira barak nia isin mate moris fali, ⁵³ema sira ne'e, liu tiha Nia moris hi'as, sai tiha housi rate, tama iha sidade santa hodi mosu ba ema barak. ⁵⁴Hare tiha rai nakdoko ho tan buat hotu nebe mosu dau-daun, kapitaun ho soldadu sira nebe hein Jesus tauk teb-tebes hodi dehan: “Los duni, ida ne'e Maromak oan.”

⁵⁵Feto barak mos hamri'ik iha neba hodi hateke housi dook; sira ne’e tuir Jesus housi Galileia hodi serbi Nia. ⁵⁶Iha sira le’et mak Maria Madalena, Maria, Tiago ho Jose nia inan; ho tan Zebedeu oan sira nia inan.

Sira hakoi Jesus

⁵⁷Iha kalan, ema riku ida housi Arimateia, naran Jose, nia mos Jesus nia eskolante ida, to'o mai^.⁵⁸Nia ba koalia ho Pilatos hodi husu Jesus nia isin. Pilatos haruka atu fo ba nia. ⁵⁹Simu tiha isin ne’e, Jose falun nia iha lensol mos ida, ⁶⁰hodi tau Nia iha ninia rate foun ida nebe nia ke'e tiha iha fatuk. Hafoin nia duir netik fatuk boot iha rate ibun hodi ba tiha. ⁶¹Maria Madalena ho Maria ida seluk hela iha neba, tur hela iha rate oin. ⁶²Liu tiha loron ida, katak liu tiha loron hadia Paskua nian, amlulik boot sira no fariseu sira ba hamutuk hare Pilatos hodi dehan ba nia: ⁶³“Na’i, ami la haluha buat nebe ema lohidor ne’e dehan wainhira Nia sei moris hela: ‘Liu tiha loron tolu, Ha’u sei moris fali.’ ⁶⁴Ne'e duni, haruka ema atu hein netik rate to'o loron tolu; keta eskolante sira mai na’ok nia, hafoin dehan ba povu: ‘Nia moris fali housi mate.’ Lia bosok ne'e sei sai aat liu fali ida uluk.” ⁶⁵Pilatus hatan ba sira: “Imi iha guarda sira; ba hodi hein nudar imi hatene.” ⁶⁶Sira ba taka metin rate ho fatuk ida hodi tau guarda sira.

Jesus moris hi'as

¹Liu tiha loron Sabadu, iha dadersan nakukun loron uluk semana nian, Maria Madalena no Maria, ida seluk ba hare rate. ²Teki-teki rai nakdoko maka'as, basa Na’i nia anju ida tun housi lalehan, hakbesik mai, duir tiha fatuk hodi tur iha nia leten. ³Nia oin hanesan rai lakan no nia hatais mutin hanesan neve. ⁴Guarda sira nakdedar ho tauk tanba nia, to'o sai hanesan mate. ⁵Maibe anju koalia hodi dehan ba feto sira: “Keta tauk. Ha’u hatene katak imi buka Jesus, nebe ema hedi iha krus. ⁶Nia la iha ne'e, Nia moris hi'as tiha ona nudar Nia dehan nanis. Mai hare fatin nebe sira hatoba Nia. ⁷La’o ba hodi dehan ba Nia eskolante sira: 'Nia moris hi'as ona housi mate, no sei ba uluk liu imi iha Galileia. Imi sei hare Nia iha neba. Ha’u fo sai ona ida ne’e ba imi.”

⁸Sira husik kedas rate; ho laran tauk no ksolok boot, sira halai atu fo hatene ba eskolante sira. ⁹Teki-teki Jesus mai hasouru sira dehan: “Haksolok ba!” Sira hakbesik, hakoak Nia ain hodi adora Nia. ¹⁰Jesus dehan ba sira: “Keta tauk; ba dehan ba Ha’u nia maun alin sira atu ba Galileia; iha neba sira sei hare Ha’u.”

¹¹Wainhira sira la'o ona, guarda balun ba sidade laran hodi fo hatene ba amlulik boot sira buat hotu nebe mosu. ¹²Sira ne'e halibur hamutuk ho katuas sira. Hafoin, sira lia tuir malu hotu tiha, sira fo osan mutin barak ba soldadu sira ¹³hodi dehan: “Imi dehan katak Nia eskolante sira mai iha kalan hodi na’ok Nia wainhira ami toba dau-daun. ¹⁴Emboot rona karik buat ne'e, ami sei koalia ho nia atu imi la bele hetan susar.” ¹⁵Simu tiha osan mutin, sira halo tuir nudar ema hanorin sira. Lia ne'e la’o iha Judeu sira le’et to'o ohin loron.

Jesus nia lia menon ikus

¹⁶Eskolante sanulu resin ida ne'e la'o ba Galileia, ba foho nebe uluk Jesus haruka sira. ¹⁷Hare tiha Nia, sira adora Nia; maibe sira balun laran namlele hela. ¹⁸Jesus hakbesik hodi koalia ba sira dehan: “Kbiit tomak iha lalehan no rai fo tiha ona mai Ha’u. ¹⁹Ne'e duni, la’o ba, hanorin nasaun hot-hotu; sarani sira hodi Aman, Oan no Espiritu Santu nia naran, ²⁰hanorin sira atu halo tuir buat hotu nebe Ha’u haruka imi. Ha’u sei hela nafatin hamutuk ho imi, to'o mundu nia rohan.”

Sabtu, 25 November 2017

Liafuan Di'ak (São Mateus)